Wp/krl/Tampere

Tambere (suomeksi da vienankarjalaksi Tampere, ruočiksi Tammerfors) on Suomen linna da Pirkanmuan muakundakessus, kumbane on Näzijärven da Pyhäjärven rannoilla. Tamberen linnassa eläy lässä 259 000 ristikanzua da leviembäh kogo alovehella lässä 440 000 ristikanzua. Sidä vastah Tamberen linna-alovehen kundayhtymän ruanda-alovehella eläy lässä 421 000 ristikanzua. Tambere on eläjäluvulda Suomen kolmanneksi suurin kunda da sen lähikundien kera toizeksi suurin linna-aloveh.

Tambere on eläjäluvulda Pohjaismualoin suurin syväinmualinna. Tamberen susiedakunnat ollah Kangasala, Lembiälä, Nogia, Orivezi, Ruovezi da Ylöjärvi.

Tamberen kessusta-alovehen keskehizin oza on järvi- da harjualovehella Näzijärven da Pyhäjärven välizellä kannaksella, kumbazen läbi virduau Tammerkoski Näzijärvestä Pyhäjärveh. Tammerkossen langiendakorgehus on 18 metrie. Sen rannoilla nägyjät ruskiekirpiččäzet fuabrikkarakennukset kerrotah Tamberen tevollizushistoriesta. Tambere ongi historiellizesti Suomen enzimäne da suurin tevollizuslinna. Tammerkossen koskimaizemua on nimitetty yheksi Suomen kanzallismaizemista.

Kustaa III perusti Tamberen vuodena 1779, ga linna algo kazvua vasta 1800-luvun puolivälin jälgeh, konza siidä tuli tärgie tevollizuskessus. Liijatengi tekstiil'atevollizus oli merkittävä. Myöhembäh tevolliszustuotanduo on muuttan iäreh linnasta, da Tamberen talohus on keskittyn palveluloih da korgien tehnolgien yrityksih.

Tambere on ližäksi kulttuura- da sporttalinna. Sielä ruatah Suomen vanhimbih teatroih kuulujat Tamberen Teatra da Tamberen Ruadorahvahan Teatra. Muzeikessus Vapriikassa on äijä muzeida da ozutteluo, ga matkualullizesti tärgein kohta on yhelläh Särgänniemen kizapuisto. Popul’arnoissa kulttuurassa Tambere tunnetah liijantengi Manserock-nimen suanuosta muuzikkaluavusta. Paikallizena syömizenä pietäh mustuamakkarua. Tamberella kizuau monda sportan piäsarjajoukkovehta, da linnua pietäh tuagieh suomelazen jiäkiekon “kätkyönä”. Linnan omat SM-liigajoukkovehet ollah muan mänestyneimbih kuulujat Ilves da Tappara.

Lähe: Tampere. Suomenkieline Wikipedia. https://fi.wikipedia.org/w/index.php?title=Tampere&_welcomesurveytoken=b02behj40jeg4fb9ekot4r3rgjjvg9rq&source=welcomesurvey-originalcontext (kačottu da kiännetty 22.10.2024)