Wp/krl/Kuukšo
Kuukšo ili kuukšoi (Perisoreus infaustus) on varoijen heimoh kuuluja lintu, kumpasen pituhuš on 26-29 senttimetrie ta paino 75-95 grammua. Siipien kokkaväli on yli 40 senttimetrie; isäččy on emäččyö šuurempi. N'okka ta jalat ollah muššat. Šelkä on pruuninharmua, puršto punakeltani ta rinta haliemman punakeltani. Piä on pruuni.
Kuukšo ešiintyy luajalla alovehella Europan ta Aasijan pohjasella havumeččäalalla Skandinavijasta Venäjällä, Mongolijah ta Kiinah šuaten. Pohjasešša laji on erityisen ylehini. Kuukšo viihtyy šoisešša ta hil'l'ah kašvajassa korpikuušikošša, kumpasešša puijen okšat ollah n'uavan ta lupon peittämät. Kuukšon šuattau nähä niise nuorissa männiköissä, ka šuurie aukehie še kiertäy. Kuukšo eläy kaukana imehnisašutukšešta ta on paikkalintu.
Kuukšo šyöy kaikenluatusie marjoja, šiemenie, šienie, hyönteisie ta niijen toukkie, huaškoja ta muijen lintujen poikie. Koko lumettoman ajan še keryäy talvivaraštoja, kätköy ruokapaloja kuarnankoloih ta okšien n'uavatyppeih.
Kuukšuo pijetäh ylehisešti "meččämiehen tovarissana". Še tulou näpiešti nuotivopaikalla praukkumah ruuvvantähtehie. Uškotah, jotta kuukšo on mečäštäjän onnenlintu ta riähkä tulou, hoš šen tappau. Mečäššyšonni katuou šilloin lopullisešti. Šuomelaisešša ta karjalaisešša muinaisuškošša kuukšo oli šielun lintu ta meččämiehen henki šiirty šiih hänen kuoltuoh.