Wp/krl/Hristossanuško
![](http://upload.wikimedia.org/wikipedia/commons/thumb/4/46/Christian_world_map.png/220px-Christian_world_map.png)
Hristossanuško (kreikakši Χριστιανός, latinakši Christianismus) on avrahamilaini, monoteistini (yksijumalaini) uškonta, muajilman šuurin uškonta ta yksi muajilmanuškonnoista. Šen simvoli on risti ta pyhä kirja Piiplija. Vuotena 2020 hristossanuškolla oli yli 2,4 miljardie kannattajua, ta rissittyhenket muuvvoššettih enämmistö 157 valtijošša. Niise ajanlašku alkau Iisussan Hristossan smietityštä šyntymäštä.
Hristossanuško šynty Palestiinašša enšimmäisellä vuosišualla Iisussan opetukšista, kuten Uuši Šana kertou. Rissittyhenket pijetäh Iisussua Spuassuna ta Jumalan poikana.
Hristossanuškon kolme piäšuuntua ollah katolini ta ortodoksini kirikkö ta protestanttiset kiriköt. Uškonnan tärkeimmät moraliset opetukšet ollah miäritetty kymmeneššä käšyššä.
Hristossanuško Karjalan tašavallašša
[edit | edit source]Vuotena 2012 Karjalan tašavallašša 27 % eläjistä kuuluttih Moskovan patrijarkaattih. 62 % oli uškonnottomie, 2 % muita rissittyhenkie ta 1 % protestantteja. Muslimija ta vanhah itämerenšuomelaiseh uškoh kuuluvie oli vähemmin.