Wp/krl/Kärkettäjälintu

Kärkettäjälintu

Kärkettäjälintu (Caprimulgus europaeus) on kärkettäjien heimoh kuuluja lintu. Še on liikkehellä piäašiešša yöllä ta on harmuan, muššan, ruškien ta ruošmienkeltasen kirjava. Šilmät ollah šuuret; muštanruškie n'okka on pieni, a kero šuuri. Linnun pituvuš on 24–28 senttimetrie, šiipien kärkiväli 52–59 senttimetrie ta paino 56–85 grammua. Pešän še luatiu muah ta šyöy itiköitä. Elinpaikkoja ollah harvapuiset, peskupohjaset mäntykankahat ta kallivoalovehet.

Kärkettäjälintuo on ylen jykie nähä, ka helppo kuulla. Šen rukin iäntä muissuttaja, helpošti tunnettava kiimaiäni "rrrrrrrrUrrrrrrrrrrrrrrrrrrUrrrrrrrrrrUrrrr..." kuuluu kešäyöššä pitkien matkojen piäh. Onnakko kärkettäjälintu on harvinaistumašša ta mašinat šurmatah ušein teillä lepyävie kärkettäjälintuja.

Ennein on ušottu, jotta kärkettäjälintu imöy maituo vuohista, kut šentäh tultih šokeiksi; šiih vihjuau niise linnun tietehellini nimi Caprimulgus, mi merkiččöy vuohenlypšäjyä.