Wp/kjp/အင်းၜူးသင့်ခေါဟ်

ဖၠုံဆိုဒ်ဖေါဟ်သီးယိုဝ် မာဆိက်မာၮာၯံင် ၜူးသင့် ထံင်ထင်းလ်ုၜူးဖင့်ဖိုင် စါ်ၜိုဝ်လ်ုၮိင်းလ်ုၜၠင် ကိုဝ်ၮိင်းဍေ မာပ္တံင်ဝေ့ဆ်ုၜုံး အင်ၜူးသင့်ခေါဟ်ၮှ်လှ်။

အင်းလင်ၜူးသင့်ခေါဟ်ယိုဝ် လ်ုတ်ုဝါန့်ဍေလ်ုတ်ုဝါန့် လ်ုစံင်းဍေလ်ုစံင်း ၜးဍံင်လိုတ်သာအေး။ လ်ုၮင်ၮ်ှ လ်ုၜူးၯံင် လာလိင်ယေါတ်ထင်းၮှ် အင်းလင်ၜူးသင့်ခေါဟ်လှ်။ လ်ုၮင်ၮှ်ဍဝ် ထါင့်ခုက်ဖေါဟ်ယောတ်ထင်းၮှ် အင်းလင်ဝေ့ၜူးသင့်ခေါဟ်လှ်။

အင်းလင်ၜူးသင့်ခေါဟ်ဖဝ်ႋစါ်ၜိုဝ် ဆုင်း၊ ခၠိင်းဆူ့၊ ဖိုင်ၯုက်လ်ုဖးၮှ် ဍောဟ်ထေါတ်ဝေ့ ဍေနောတ်ဝှး ကိုဝ်ၜူးလာၯံင် ခါန်ႋဝေ့ဍေ ထေါဟ်ကါင်ကေါဝ်ႋယောတ်ၮှ် သိုင့်ဝင့်ၮှ်လှ်။ အင်းလူ့လင်ၯံင်ဝယ် ၜူးသင့်အါင်သင့်ၮှ်ဍဝ် ၯုက်ဝေ့အင်းဆူ့သာ့ဝေ့လှ်။

အါင်သာၮှ် ၜံင်းဝေ့ မေဝ်ထံင်၊ အင်းဆူ့ၮေဝ်မေဝ်သေဝ်၊ တါင်ၮေဝ်ႋမေဝ်အါင်ဍူးလှ်။ ၜူးသင့်ၮှ် အင်းဖံင့်ထင်းဝေ့မေဝ်ၯံင် သိုင့်ၰူ့ထီႋဍေခၠေါဟ်လ်ုမွာဲၜး သိုင့်ၰူးထီ့ဍေဍေဟ်ၮှ် အင်းဖံင့်ၮေဝ်ႋဝေ့ၯံင် လၟံင်ႋၮေဝ်ႋ သုင်းကေသာယှာႋ ဍာအင်းပ်ုကျာၯံင် ဆေါဟ်ၜုံးဖှ်ေ ထါင်ဝေ့ၯိင်းဆာႋၮှ်ဆေဝ်ႋလှ်။

ၜးအင်းဖံင်သိုင့် ၰူႋထီဍေခၠေါဟ် ဍေဍေဟ်ၮှ် မွာဲၜးၮှ်လဲ၊ ဆ်ုလ်ုၰူးယိုဝ် ဆ်ုယဝ်ခါ့ ၮှ်ဍးအ်ုလးၮင်ႋၜိင်းအေးလာၮင့် ဆ်ုဆိုင်လင်လ်ုၜၠင် ၰူးမဲထင်းထါင်ကိုဝ်ၮိင်းဍေလှ်။ ခၠေါဟ်သီး ဍေဟ်သီးယိုဝ်ဆ်ုယဝ်ခါ့ ထီ့သါ်ခါ့ ၜိုဝ်လင်သါလ်ုဖိက်လး ၮ်ုလ်ုဍးၜးလာၮင့်သီး ဆ်ုဆိုင်လင်ခိုတ် ခၠေါဟ်သီး ဍေဟ်သီးအှ်ထင်းထါင်ဆေဝ်ႋလှ်။ မွာဲၜေ့ၮှ်သိုဝ် ပ်ုဖၠုံဆိုဒ်ဖေါဟ်သီးလ်ုဖး တံင်ၮံင်းလါၮင့်ဍေဆ်ုကးၯယ်အ်ုမိင်မိင် လင်မာႋသှ်ေလာႋဝေ့လ်ုၰေဝ်။ ဆ်ုဆိုဒ်ၜံင် ခိုင့်ၮံင်ယိက်လာႋဆါ်ၮှ် အင်းလင်ၜူးသင့်ခေါဟ် ဍေၰူးထီႋ ဍေခၠေါဟ်ၮှ်လှ်။

လ်ုၮင်ၮှ်ဍဝ် ထိုင့်ဖူႋဝဲါလ်ုစုဂ် ပ္တံင်ထင်းသါ မာဝေ့ အင်းလင်ၜူးသင့်ခေါဟ်ၮှ်လှ်။ လ်ုၮင်ၮှ်ဍဝ် ထိုင်ႋတ်ုဝါန့်သာ့ သၟဝ့်ၰူ့ၰင်မာကုံမာဆိုင် ဝေ့ဍးဆေဝ်ႋလှ်။ လ်ုၮင်ၮှ် ဆီ့ဆဲတ်ုဝါန့်မာကုံသၟဝ့် အင်းလင်ၜူးသင့်ခေါဟ် ဍေဆ်ုအါင်လင် ဍေတုံႋ ဍေလ္ကံင်ႋ က်ုဆိင့်ပွယ်သ္ဘေင်ႋ မာၜုံးမာၜါ ပ်ုကျာဍာအင်းဝေ့ ကိုဝ်ၯာဍေလှ်။

မေဝ်ၜူးသင့်ဍေသိုင့်ၰူးထီႋ၊ ခၠေါဟ်ဍေဍေဟ်ၮှ် အင်းလင်ၯာစယ် ၯာစယ်ကိုဝ်ၯာဍေလှ်။ အေအင်းၜးၜူ့သင့်ခေါဟ်ၮှ် ဖံင်စုဂ်ဖံင်ဆါ့၊ ၜုံးဍောဟ်သာထဝ့်အှ်ၜးဝေ့ ယှူးမုက်ၜှ်ယဝ့် ကိုဝ်ဆိုဝ်ဍေလှ်။ ဍေဆ်ုဖေါတ်ဆ်ုအူး ၮာႋဍိင်သင့်ထံင်ႋ၊ ဍေထုင်းလီႋတုံႋသုင်းၰုဲ့သာယဝ့်၊ ကိုဝ်ပါင်ဖ်ုအဝ် အင်းလင် ၜူးသင့်ခေါဟ်ၮှ် မာကုံ့ဝေ့ လ်ုၮိင်းလ်ုၜၠင် ကိုဝ်ၮိင်းဍေလှ်။