Wp/kjp/ဝး
ဝးယိုဝ် လ်ုထီ့ခါန်ႋဍုံခါန်ႋဍုံဌာန့် ဆ်ုခေါဝ်ႋဆ်ုခၠိင်းၜးၯဝ်ႋ လ်ုဖးၮှ် မဲထင်းအးဝေ့လှ်။ ဝးယိုဝ်ဍဝ် ဝးကၠူး၊ ဝးတၠိုင်ၜံင်တိုင်၊ ဝးသေါဟ်၊ ဝးခုံပ်ုလုဂ်၊ ဝးကါင်းကံင်းမေံ၊ ဝးတုင်းတ်ုယျ၊ ဝးမာႋ၊ ဝးဖၠင့်၊ ဝးဆူး၊ ဝးမါင့်၊ ဝးဆင့်ၰေံ၊ ဝးကၠေဟ် အှ်ဝေ့ဍး၊ အးမိင်မာႋလှ်။ ဝးသီးယိုဝ် အ်ုၮိင်းယိက်ထင်းယာဲဆီ့၊ ၰူ့ဆီ့သီးၮှ် ဖဝ့်ထင်းလ်ုၜၠင်ၯံင် သီ့ဝေ့ဍးဆေဝ်ႋလှ်။ ဝးဖဝ့်ထင်းသးထင်းၮှ် ကိုဝ်ဝေ့ဍေ ဝးလင်လှ်။
ဝးယိုဝ် မွာဲဝေ့ ဆ်ုၜးဖံင်းၜးဖါ် ဆ်ုထုင်းဆ်ုၜံင် လ်ုမိင်ဆ်ုၜံင် လ်ုမိင်ၮှ်လှ်။ မၞီႋလ်ုၯာ က်ုတ်ုဒှဲ ထင်းဍုံလုက်ဖိုင်ၮှ်တာႋ ၜးကေဝ်ၮါင်းထ ၮိင်းမူႋလာဍေဝးခဝ့်က်ုတာၮှ်ၯံင် လ်ုဆေါဝ်တာၮှ် အင်းဍေၜင်း အှ်ဍေၯိင်းဝး ဖံင်းထင်းဖါ်လင် ဆ်ုဖါ်ဆ်ုမာလ်ုဖး မွာဲဝေ့ဍေဝးၮှ် ထၟါႋလှ်။ အ်ုကျးထုက် သီ့ခိုတ်သီးဍဝ် ၜးထါင်လ်ုသွးခေါဟ်အိုဝ် ဍေၜးၮှ်ဍာ်လှ်။
ဝးမဲထင်းသံင် ၜံင်ၮှ် အင်းၰုဲႋအင်း၊ အင်းဖံင့်အင်း၊ မာဆါင်းအင်းဝေ့ကိုဝ်ၮိင်းဍေလှ်။ ၯိင်းၮှ်သီး သုင်းထင်းၮေဝ်ႋဝေ့ ဍေဝးၮှ်လှ်။ ၯိင်းဖိုင်ဆာမွာဲအှ် ဒြပ်ခ်ုသိုဝ်လ်ုဖး ခၠဟ်၊ ခၠဟ်ခွင်၊ ဍင်၊ ခၠယ်၊ ပုဂ်၊ ၜူးဖင့်ၮှ်သီးထါင့်ၮေဝ်ႋဝေ့ ဍေဝးၮှ် ထၟါႋဆေဝ်ႋလှ်။
ဆ်ုၰောတ်၊ တိုင်၊ ၮါင်၊ ၮါင်သြင့်၊ ထ္ဍိုဝ်။ နောတ်ဝီႋသူးလ်ုဖးၮှ်သီး မွာဲဝေ့ ဝးထၟါႋဆေဝ်ႋလှ်။ နောတ်ထူႋ၊ နောတ်ထိက်၊ ဖိုင်ခါင့်ခွင်သီးလ်ုဖး ထါင့်ၮေဝ်ႋဝေ့ဍး ဝးၮှ်ထၟာႋဆေဝ်ႋလှ်။
ဆ်ုဖေါတ်ဆ်ုအူး ဖိုင်ၮှ်သီးဍဝ် ပီခံင်ႋ၊ တ်ုလုဂ်၊ ပီၜါ၊ ဖံင်ဍွာ၊ တယ်ပဝ်၊ ပးတၠါ့လ်ုဖးသီး မွာဲဝေ့ ၜးတါင်ဍေဝးဆေဝ်ႋလှ်။ ဆိက်ဖေါဟ်ဆာႋဆ်ုဖါ်ဆ်ုမာလ်ုဖးသီးဍဝ် ခြာႋမဲ၊ ခြာႋၜံင်၊ မယ့်စ်ုလူ၊ ၜုဂ်ကူႋ၊ လါင်းဍာ၊ ခၠဟ်ခွင်၊ စွးဆေဝ်ႋလှ်။
ထီ့ထံင်၊ ထီ့ထုံႋ၊ ထီးယှူး၊ တ်ုကၠိုဝ်၊ မှ်ေဍုံ၊ ဆ်ုၯင်၊ ပြဿဒ်၊ ဆ်ုဖံင်ႋထိုဝ်၊ ရာဇမတ်၊ ဆ်ုဖါ်ဆ်ုမာ လ်ုဖးၮှ် ၜးတာင်ဍေဝးၮှ် အှ်ဝေ့အးမိင်မာႋလှ်။ ဝးယိုဝ်မွာဲဝေ့ ဟ်ုၜးသုံႋအးထုက် ဆ်ုထုင်းလ်ုမိင် အ်ုခေါဟ်စံင် ၜးကၠေစိုဒ် သုင်းလင်အေအးၮှ်လှ်။ စာခဝ့်သီး ၜးတါင်ၮေဝ်ႋဝေ့ဍေ ဝးၮှ်ဆေဝ်ႋလှ်။[1]
ထိုဝ်ၜုဂ်[edit | edit source]
- ↑ ဖၠုံလိက်ပဝ်ႋ သိုင့်ဆင့်၊ လိက်မေံၜၠာ်(၃-၄)