Wp/kjp/ဖၠုံပီၜါ

From Wikimedia Incubator
< Wp‎ | kjpWp > kjp > ဖၠုံပီၜါ
Jump to navigation Jump to search

ဖၠုံဆိုဒ်ဖောဟ် ဆ်ုဖောဟ်ဆ်ုအူး ပီၜါယိုဝ် အေအူးထင်းဏှ် လ်ုအ်ုလူႋမုက်စွးသဝ့်အးမိင်ဆေဝ်ႋလှ်။ ပီၜါယိုဝ် ဖၠုံဆိုဒ်ဖောဟ်သီး ထံင်လင်ဆ်ုဍာဖိုင််လ်ုၜၠင်ဆ်ုအူးသှ်ေ ယှာလင်လာႋဏင့်သီး အှ်လ်ုခေါဟ်လံင်ကၠာ လ်ုခါန်ႋဆိုင့် သာင့်ခါန်ႋဌာန့်ဝသယ်အိုဝ်ဏှ် ခံင်ၜိုဝ်ဏာင်းယိုဝ်သီး ဆ်ုအူးသှ်ေဍာ် အှ်အးဝေ့လှ်။

ပီၜါဏှ် ထံင်လင်ဆ်ုဍာဖိုင် ဖၠုံဆိုဒ်ဖောဟ်လ်ုဖး တာင်ဏေဝ်ႋၜးကးၯယ်အူးၜးကးၯယ်ဝေ့ လ်ုမိင်ဏှ်တာႋ ဆ်ုတာင်ဏေဝ်ႋယှာ ခါစွးဝေ့ဆေဝ်ႋလှ်။ ဖၠုံဆိုဒ်ဖောဟ်အှ်ခေါဟ်လံင်ကၠာဏှ် စာင်းကိုဴ ကေမူႋဏာ စာင်းဆောတ်ဝေ့ ဍေပီၜါဖောဟ်အူးဝေ့ယိုဝ်ဝေ့ ကၠ်ုလှ်။ ပီၜါယိုဝ် အ်ုဆိုဒ်ဖောဟ် လ်ုအ်ုၰာႋၰံင်သီး အူးဝေ့ယိုဝ်ဝေ့အှ်အးမာႋလှ်။ ကောဝ်ကြင်ဖိုင် အ်ုမေရိက​မေံထာခေါဟ် ပီရူးခါန်ႋဖေါဟ်လ်ုဖး အူးယိုင်ဝေ့ ပီၜါဏှ်လှ်။ အ်ုမေရိကအ်ုသာကၠာ မက္ကဆီကိုဝ်ခါန်ႋဖောဟ်သီးဍဝ် အူးယိုင်ဝေ့ပီၜါဏှ်ဆေဝ်ႋလှ်။

ပီၜါဏှ် အ်ုပၠံင်ဖိုဟ်လ်ုမိင် အ်ုပၠံင်ထဝ့်လ်ုမိင် အှ်ဝေ့ဍး ဏီ့မိင်ဆေဝ်ႋလှ်။ အ်ုဖိုဟ်လ်ုမိင်ဏှ် ဖောဟ်သးဖၠာဲသယ် စာင်းကိုဲကေမူႋဏာ စာင်းဆောတ်အူးပျဝေ့လှ်။ အ်ုထဝ့်လ်ုမိင်ဏှ်ဍဝ် အူးဃှုက်ဍေ ဆ်ုဖောတ်ဆ်ုအူး အ်ုဃှာႋၰံင်သီးခဝ့်သှ်ေ၊ အူးဍိင်ဍေဆ်ုမာထာခေါဟ်ဏှ်သီးခဝ့် သှ်ေဝေ့ဆေဝ်ႋလှ်။ ပီၜါယိုဝ် အေအူးထင်းဖဝ်ႋစာ်ၜိုဝ် ကိက်ထင်း (ဖံင်းထင်း) ထံင်ႋပီၜါဍုံဏှ် စူးလာႋခဝ့် ၜေဟ်ုၜါဆ်ုသိုဝ်ၯံင် စူးလ်ုခဝ့်လီႋၜံင် ၜးလင်ဆင်းပျ ပီၜါအ်ုဖိုင်ဏှ်လှ်။

စူးမူႋဏီ့ၜံင်ဏှ်ဍဝ် လ်ုအ်ုမေံယာ့ခဝ့် အ်ုဖိုင်ဖောဟ်ဏီ့ဖိုင်ဏှ် ၜးဆင်းလင်ကာၜါ်ပျ ကိုဝ်ထီး ကိုဝ်ထီးဏှ်လှ်။ ဆ်ုအူးပီၜါသီးယိုဝ် ပြိုင်ကုံၜူးကေမူႋဏာ၊ ဆ်ုအာင်လင်ၜးသင့် ကေမူႋၯး ၜုံးၜးသယ်ဏှ် ယိုင်လင်ထာခေါဟ် အူးပျ​ဍေပီၜါဏှ်လှ်။ ပီၜါဏှ် ဆ်ုဆံင့်ဏးမုက်ဝေ့လှ်။ ပီၜါအ်ုခေါဟ်လ်ုဆီ့, ဏီ့ဆီ့သီး အူးပျဖိုင့်ဃှင်(ဖၠိုင့်ၰင်)စာ်ၜိုဝ် အ်ုလူႋသင်းဝင် ဆံင့်ဏးၯိုင့်စိုဝ်ယာင်ဝေ့ဆေဝ်ႋလှ်။ စင်ၜိုဝ် ပီၜါယိုဝ် ဟ်ုၜးအူးၜေဟ်ုၜါဆ်ုသိုဝ်ဏှ် ကိုဝ်ဝေ့ဍေပီၜါ မွာဲၜိုဝ်လှ်။

ပီၜါယိုဝ် မွာဲၜေပီခံင်ႋပီခယ်သိုဝ်အေး၊ အ်ုပၠံင်ဏှ်မွာဲဝေ့ ဝးအ်ုဖောတ်ထဝ့် ဝးဆင့်ၰေဟ် ဏှ်လှ်။ ပီၜါဏှ် အ်ုပၠံင်အှ်ဝေ့ လ်ုခဝ့်ယာဲၜံင် ထံင်လုက်ဆိင့်ဆီ့ၜံင်ၯံင် လ်ုဏင်ဏှ် အ်ုပၠံင်အှ်ဝေ့ လ်ုခဝ့်ၰိုဝ်းၜံင် ထံင်လုက်ဆိင့် လ်ုဆီ့ၰူ့ၜံင်သီးဍာ်လှ်။ ပီၜါအ်ုဍုံဏှ် မွာဲဝေ့ဍး ၜးဖ်ုၯုက်ဏေဝ်ႋ ဍေသိင်းအ်ုလယ့်ဆာ အေလ်ုမွာဲၜး ဍေသိင်းမာ၊ သိင်းဝင်းယှံင့် (ၯင်းယှံင့်) သယ်ဏှ်လှ်။ ဖ်ုၯုက်ဏေဝ်ႋဝေ့ပုံးလုံး ၜါင်းၜါင်းၯံင် အ်ုမေံယာ့ခဝ့် အ်ုခေါဟ်ထိုဝ် ၜေနူႋခေါဟ်ထိုဝ်သိုဝ် အှ်ကှ်ေဝေ့အူးလင်ႋၜးလူ့ဖုံႋ (ဖၠိက်ဖၠံင်) ဏေဝ်ႋဝေ့လှ်။

ပီၜါဍုံဏှ် ဖ်ုၯုက်ဏေဝ်ႋၯံင် မ်ုဖၠင်းလင်အ်ုပၠံင်လင်ႋဏှ် ၜးဖၠာဖၠံင့်ခွိက်ပီၜါဍုံ ဖင့်ခေါဟ်ဖင့်လ ထံင်အ်ုဖၠံင်ၯံင် အ်ုဍွယ်ဖိုင် အ်ုဏာင်းဃှံင်လာႋခဝ့်ဏှ် ၜးဖၠာအင်းအောဝ်ဝေ့ လာႋခဝ့်မဝ့်မှ်ဏှ်လှ်။ ပီၜါပၠံင်ဏှ် အ်ုထဝ့်ထုက်အှ်ဝေ့ ဏီ့ဖၠာႋထာ့သီးဏှ်လှ်။ အ်ုထဝ့်ဏီ့ၜံင်ၯံင် ဆင့်လင်ထာင်သာ ဖိုဟ်လင်စူးသိုင့်စူးသိုင့်အှ်ဝေ့ ဏင်ဖၠာႋထာ့ၜၠဲသီးဏှ်လှ်။ ပီၜါဍုံဖင့်လဏှ်ဍဝ် ပီၜါပၠံင်လင်ဆယ်အှ်ဝေ့ ၜုဂ်ကးဏင်ဖၠာႋသီးဆေဝ်ႋလှ်။ ပီၜါဍုံဖင့်ခေါဟ်ခဝ့် ပီၜါပၠံင်လင်ႋဏှ် အ်ုယှဝ်ၜးအှ်ဏင်စူးလီႋၜံင် မာဖၠံင့်ဝေ့အ်ုဖိုင် လ်ုဖိုင်လ်ုဖိုင်ဏှ်လှ်။ အ်ုမေံယာ့ထုက် အ်ုပၠံင်ဖာထဝ့်ဏှ်ဍဝ် လ်ုမေံယာ့ခဝ့် မာဖၠံင့်ပျ​ဝေ့အ်ုဖိုင် ဏီ့ဖိုင်ဆေဝ်ႋလှ်။

ပီၜါပၠံင်ဏှ် လ်ုဏင်တာင်ဏေဝ်ႋဝေ့အ်ုပၠံင် ဍေစေဝ်ဍေထံင်ႋၜင်သယ်သီးဏှ်လှ်။ လာႋဏင့်ၜိုဝ် ပီၜါပၠံင်ယိုဝ် ဆ်ုတာင်လ်ုအ်ုအးထုက်ဏှ် မွာဲဝေ့ဍး ဝးမာင့်ပၠံင် လ်ုမွာဲၜးဍေဝးၜင်ဖောဟ်ပၠံင်သယ်လှ်။ ဝးပၠံင်ဏှ် အ်ုခင်းထာ် မာထေံထဝ့်ၯံင်လ်ုၜၠင် ဍေအ်ုခီ့ထိုဝ်အ်ုထဝ့်ထုက် ဏီ့ပၠံင်ဏှ်မာဏေဝ်ႋ အ်ုထဝ့် ဏင်လီႋထာ့ၯံင် အ်ုပၠံင်ဏှ် ၜးစိုင်ၰိက်ထ ဍေလူးဖၠာင့်လ်ုဆင့်လ်ုဆင့်လှ်။ လ်ုဏင်ဏှ် ဆာင့် ဏေဝ်ႋဝေ့ ဍေၯေဝ်ႋဍေစေဝ်ပးသယ် အှ်လ်ုဏင်ဆေဝ်ႋလှ်။

ဝးပၠံင်ဏှ် သာ်လင်လ်ုခဝ့်ဃှိုဝ်းၜံင် ထံင်ႋပီၜါဍုံဏှ်ၯံင် ၜးသာ်ၰိက်ထ​ဍေၰုဲႋၜေလီသူးထင်း အ်ုၰံင်လ်ုသှ်ၜေးသိုဝ် ၜးလိက်ၜါ်ထ ဍေကိုဲဖောဝ့်အှ်ေသယ်ၯေဝ်ၯေဝ်ၜးၜးဏှ်လှ်။ အ်ုပၠံင်ဏာင်ဃှံင် လာႋခဝ့် မ်ုထင့်ထင်း အ်ုပၠံင်လင်ႋဏှ် ၜးကုဂ်ဖုံႋထ​ဝေ့ ကိုဝ်ၜံင်ဍေအေထီ့ဆာလှ်။ ပီၜါအ်ုဖၠေဝ်ဏှ် ၜးထင့်ထင်းဍေစေဝ်ပးထံင်ႋပးၯံင် ၜးတာင်ဏေဝ်ႋအ်ုဖၠေဝ်ဏှ် ၜေခိုဲဖၠေဝ်ဏှ် ၜးထင့်ထင်းဍေစေဝ်ပးထံင်ႋပးၯံင် ၜးတာင်ဏေဝ်ႋအ်ုဖၠေဝ်ဏှ် ၜေခိုဲဖၠေဝ်သိုဝ် ပေဝ့်လင်ဝေ့ လ်ုၜိင်းလ်ုၜိင်းဏှ်လှ်။ အ်ုဖၠေဝ်ဏှ်ဍဝ် ၜးထင့်ထင်းဝေ့ အ်ုပၠံင်ဏာင်ဃှံင် လ်ုၜိင်းလ်ုၜိင်းဏှ်ဆေဝ်ႋလှ်။

စင်ၜိုဝ် ၜေမ်ုကဲထင်း ပီၜါလ်ုခေါဟ် ၯေဝ်ၯေဝ်ၜးၜးသိုဝ် ဟ်ုတာင်ၜးကးဝေ့ စွးမာႋဆေဝ်ႋလှ်။ ပီၜါယိုဝ် အူးအေသှ်ေ အ်ုလူႋသဝ့်မုက်စွး အ်ုယံင်ထဝ့် ဟ်ုၯိုင့်ၜးဆ်ုယူႋသာ ကိုဝ်ၯာဍေဏှ်လှ်။