Wp/kjp/ဖၠုံဆိုဒ်ဖောဟ် ဆ်ုထုင်းလီႋထုင်းထာင်

From Wikimedia Incubator
< Wp‎ | kjpWp > kjp > ဖၠုံဆိုဒ်ဖောဟ် ဆ်ုထုင်းလီႋထုင်းထာင်
Jump to navigation Jump to search
ဖၠုံဆ်ုၰီ့ဆ်ုလာ ဆ်ုထုင်းလီႋတုံႋ လာင့်တၟိုဝ်ဖၠါင်ႋဏါင်(လါင့်ခၠိင်းဆူ့ကၠံင်ထါ်)


ဖၠုံဆိုဒ်ဖောဟ်သီး လ်ုအ်ုဝီႋ အှ်ခေါဟ်လံင်မိင်လးကၠာခါ့ၮှ် ဖေံအင်းၰီးၰုဂ်၊ ထံင်းအင်းၜူး၊ ထံင်းအင်းအာင်ဍေသုင်းလင်အင်းဖိင်ႋသုဲ့သယ်ၮှ်လှ်။ အေၜးလေဝ်ဖေံၜိုဝ် ဖေံဆိုင်လောတ်သာ အေၜးထံင်းလင်ၜူးအိုဝ် လေဝ်ထံင်းၜိုဝ်ထံင်းဆိုင်လောတ်သာ ကိုဝ်စံင်းဍေလှ်။ မ်ုလေဝ် မာၜိုဝ်မာဆိုင်လောတ်သာဖဝ်ႋစာ်ၜိုဝ် အူးထင်းခိုဲ ကိုဝ်ကုံလောတ်သာ ကိုဝ်ဆိုဝ်ဍေလှ်။ ၜူးၰုဂ်သယ်ၮှ်ဍဝ် ၜူးအ်ုသာဆံင်း ၜူးဆောဝ့်သယ်ၮှ် လာၮင့်ဖိုင် ဝဝ်ထင်း ၜးကုဂ် လာႋၮင့် ၜူးအ်ုသာဖုက် အ်ုသောဟ်အ်ုယာင်အး ၜူးဖၠါ်ၮှ်ဍဝ် ဖၠောဝ်ထင်းဝဝ်ထင်း လာလိင်ဖိုင် အ်ုခေါဟ်ကျံင် ၜးကုဂ်ဝေ့ လာလိင်ဖိုင်ၮှ်ဆေဝ်ႋလှ်။ ကုဂ်ၜူးအေၯံင်စာ်ၜိုဝ် ဖုက်လင်ကုံစူး မာၜိုဝ်မာဆိုင်လောတ်သာ မူးမူးခွါ့ခွါ့ ကိုဝ်ၯာဍေလှ်။

ဖုက်လင်ကုံၜူးၮှ်ဍဝ် မူးၮင်ဖောဟ်သးခွါ့ ဖုက်လင်ၜူးခဝ်ခဝ့် ယိုင်ပျထာခေါဟ်ခဝ်ခဝ့် မူးဍေ ခွါ့ၰူ့ၰင်သၟဝ့်ၮှ်လှ်။ ဖုက်လင်ၜူးအှ်ပွါ်ခါ့ ဖောဟ်သးဖၠာဲလ်ုဖး ပါမုက်ပါလာ ယိုင်ပျထာခေါဟ် ဍယ်ပျ​ဍေစူး ခင်းလ်ုခဝ့် ခါ့ပျ ယာင်ႋပျမိင်ဆေဝ်ႋလှ်။ ခင်းခါ့ၜေမ်ုသၟဝ့်သိုဝ် ယာင်ႋပျခင်း ၜေမ်ုၜးၯဝ်ႋသိုဝ်ၮှ် ထာ်လင်ထီ့ထုင်ႋခါင့်ဍေၯင်းခေါဟ်ထုံထုံၮှ်လှ်။ အ်ုနိုဝ်မာထာခေါဟ် အ်ုစူး ဍယ်ပျုက် အ်ုၮင့်ဆာႋဝိက်သာ အ်ုခင်းယာင်ႋပျုက်ထီ့ထုင်ႋသဝ့် ထုံထုံၮှ် သၟဝ့်ၰူ့ၰင်စွး ဆ်ုယောဝ်ႋဖိုင်မုက်ကိုဝ်ၯာဍေလှ်။ ခင်းယာင်ႋပျုက်ထီ့ထုင်ႋ သဝ့်ထုံထုံၮှ်တာႋ ဆ်ုကိုဝ်ပျုက်ဍေယာင်ႋထီ့ထုင်ႋ ထုံထုံၮှ်လှ်။

လ်ုခါင့်ယိုဝ် ယာင်ႋထီ့ထုင်ႋမွာဲလိုင်အေး၊ ကိုဝ်ထာင်ဝေ့ ယာင်ႋထုင်ႋၮှ်လှ်။ လ်ုခါင့်ယိုဝ် ယာင်ႋထုင်ႋမွာဲလိုင်အေး၊ ကိုဝ်ထာင်ႋဝေ့ ယာင်ႋတုင်ႋၮှ်လှ်။ ဖၠုံဆိုဒ်ဖောဟ်သီး သုဂ်လင်သာ လ်ုထဝ်ၜးလ်ုထဝ် ထံင်လင်ထာင် ယူၮါင်ခါန်ႋဖိုင်ၮှ် ဍးလောဟ်ၮေဝ်ႋ သာင့် (ထာင်ႋ)သယ် အာင်ၰေံ အာင်သာင်ႋဝိက်သာၮှ် ယာင်ႋတုင်ႋမွာဲလိုင်အေး၊ ကိုဝ်ထာင်ဝေ့ ဍေ "အာင်တုံႋ"ၮှ်ဆေဝ်ႋလှ်။

ဖၠုံဆိုဒ်ဖောဟ် ယာင်ႋတုံႋလ်ုဝီႋခါ့ စူးပါအေး၊ ယာင်ႋက်ုယာဲခင်းၮှ် ကိုဝ်ဝေ့ယာင်ႋတုံႋ ၮှ်လှ်။ ဍးလောဟ်ဍးဍံင်ၮေဝ်ႋသာင့် အာင်ၰေံ အာင်သာင်ႋၮှ်တာႋ ဖၠုံဆိုဒ်ဖောဟ်သီး ယာင်ႋတုံႋၮှ် ထုင်းလီႋခွဲပျ ဍေစူး ဍေခင်းလ်ုၜၠင် ကိုဝ်ထာင်ဝေ့ဍေ "အာင်တုံႋ" မွာဲၜိုဝ်လှ်။ ဖၠုံဆိုဒ်ဖောဟ်သီး သုဂ်လင်သာ လ်ုထဝ်ၜးလ်ုထဝ် ထံင်လင်ထာင်ဆ်ုဍာဖိုင် ခါန်ႋပ်ုယင်ဖိုင်ၮှ်တာႋ ဆ်ုယာင်ႋတုံႋ အာင်တုံႋ အှ်ထင်းထာင်ဝေ့ အ်ုမိင်မိင်ၮှ်လှ်။

ထုင်းလီႋတုံႋ ထင်းဍေပုံသင်ႋၮာခၠံင်လ်ုဖး အှ်ဝေ့လှ်။ ခၠုက်ဍေဆ်ုခေါဟ်ၰုဲး တုံႋဆ်ုအုဂ်၊ တုံႋထ်ုရာဲ၊ တုံႋပၞာႋ၊ တုံႋခေဝ့်သယ် ထင်းဍေပုံ ထုင်းလီႋသင်ႋၮာခၠံင်ၮှ်လှ်။ ဍးလောဟ်ၮေဝ်ႋပ်ုယင် ကိုဝ်ယှာမာထင်း မင်ယိုဝ့်မင်ယိုဝ့်ၮှ် မာဍံင်ၮေဝ်ႋကိုဝ်ပျ​ဝေ့ ဍေတုံႋမင်ယိုဝ့်ၮှ်ဆေဝ်ႋလှ်။ ၜိုဝ်ၮာင်းယိုဝ် ထုင်းလီႋတုံႋၮှ် မွာဲဝေ့တုံႋဆ်ုၰီ့လာ တုံႋဝိက်၊ တုံႋကၠီးသယ်အှ်ထင်းထာင်ဝေ့ အ်ုမိင်မိင်ၮှ်လှ်။ ဖၠုံဆိုဒ်ဖောဟ်သီး ဆ်ုထုင်းလီႋလ်ုကံင်ႋၮှ်ဍဝ် အှ်ထင်းဝေ့ ဍေပ်ုယင်ဆိုဒ်ဖောဟ်သီး လ်ုကံင်ႋမဝ့်မှ် လ်ုကံင်ႋထုင်းလီႋၯင်းခေါဟ်ဍာၮှ်လှ်။ ဖၠုံဆိုဒ်ဖောဟ်လ်ုကံင်ႋလ်ုဝီႋၮှ်ဍဝ် အ်ုမိင်ဖၠဟ်ဝေ့ တာ်ခေါဟ်မူး အ်ုမိင်ၮှ်လှ်။ လ်ုကံင်ႋၮင်ႋသိင်းစင်၊ လ်ုကံင်ႋၮင်ႋဖဝ့်တ်ုကောဝ်၊ လ်ုကံင်ႋၮင်ႋဖဝ့်လးယေဝ့်သယ် ၮှ်လှ်။

ဖၠုံဆိုဒ်ဖောဟ်သီးလ်ုကံင်ႋ လ်ုခါင့်လ်ုခါင့်ယိုဝ်ၮှ် အ်ုမိင်ဖၠဟ်ထာင်ဝေ့ ဍေမၞီဟ်ဆ်ုလင်ကိုဟ်သာ (ဖၠုံမောဝ်လာ်) အ်ုမိင်ၮှ်ဍဝ်လှ်။ လ်ုကံင်ႋဖာ့ဝဝ်၊ လ်ုကံင်ႋဖာ့သိုင့်၊ လ်ုကံင်ႋဖာ့ခၠေါဟ် ဍေလ်ုကံင်ႋဖာ့ ခေဝ့်သယ် ၮှ်လှ်။ လ်ုခါင့်ယိုဝ် လ်ုကံင်ႋအ်ုမိင်ဖၠဟ်ထာင်ၮှ်ဍဝ် ဍေအ်ုရွာဲၮှ်လှ်။ လ်ုကံင်ႋပညာ ရာဲသီ့၊ လ်ုကံင်ႋ ယောတ်ထင်းသင့်၊ လ်ုကံင်ႋသစ္စာမိက်တာ ဍေလ်ုကံင်ႋ သစ္စာသုဲးဝဝ်ဝဝ်သယ်ၮှ်လှ်။ စင်ၜိုဝ် ဖၠုံဆိုဒ်ဖောဟ် လ်ုကံင်ႋလ်ုခါင့်ယိုဝ် ဆ်ုဖောတ်ဆ်ုအူးဍုဂ်ပါင် မှ်ေ, ဆ်ုကံင်ႋဆ်ုသိုဝ်သယ်ဍုဂ်ပါင် အ်ုရွာဲသီး အးထင်းဝေ့ဆေဝ်ႋလှ်။