Wp/kjp/ထေါဟ်လိင့်အွာ
ထေါဟ်လိင့်အွာသီးယိုဝ် အှ်အးမိင်အးစိင်ဆေဝ်ႋလှ်။ အ်ုယံင့်အွာ၊ အ်ုယံင့်ပျုဂ်၊ အ်ုယံင့်သိုင့်ပျုဂ်သီး အှ်ဝေ့ဆေဝ်ႋလှ်။ ထေါဟ်လိင့်အွာယိုဝ် လ်ုဆ်ုခေါဝ်ႋဆ်ုခၠိင်းအ်ုဖိုင် အ်ုဝေ့သီးအင်းလယ်ခွိက် အ်ုသာသှ်ေဝေ့လှ်။ ထေါဟ်လိင့်အွာလ်ုမိင်ၮှ်ဍဝ် အှ်ကုံဝေ့ဍေအ်ုဍံင်းၮှ်လှ်။ အ်ုဝေ့သီး ဆံင်ႋလင် လ်ုဝဝ်ၜိင်းပၞါႋလံင်ၯံင် အ်ုဝေ့သီးစောဝ်အင်းခွိက် ဆ်ုဖေါဟ်ဆ်ုၰာႋသီး ထံင်အ်ုလုက်ၮှ်လှ်။ အ်ုသီးစါင်းယူလင် လ်ုဆိက်ဖိုင် ဍေစောဝ်အင်းခွိက်ဝေ့ ဍေဟ်၊ ယး၊ ဆွဲ (ဆိုဲး)၊ သ္ဍင်းဖေါဟ်သီးကာဍာ်အေး စောဝ်အင်းခွိက်ဝေ့ ၜူးၰာႋ လ်ုမာၯံင်ၜူး (သာ်မူႋမာတ်ုကၠုဂ်) သီးလ်ုဖးၮှ်လှ်။ အ်ုဝေ့သီး စောဝ်အင်းခွိက် သာ်မူႋ လ်ုအ်ုမာၯံင်ၜူးသီး လ်ုဖးၮှ် အ်ုခေါဟ်စံင် ပ်ုလဝ်ၜးကဲ ဍေအ်ုသီးမာၜိုဝ်မာဆိုင်ဆိက်ဆာႋသီးၮှ် ဆေဝ်ႋလှ်။
လ်ုဆ်ုနိုင့်ပၞါႋလံင် ဍေ သိင်းခီ့လံင်ၮှ်ဆံင့် လင်ဝေ့ၯံင် အေဍးစိုဝ်လင်ဝေ့ ဆ်ုၰာႋဖေါဟ်သီးယူလင် လ်ုမိင်မိင်ၮှ်တာႋ လေဝ်ၜၠူး (ၜၠိုဟ်) လံင်စောဝ်အင်းခွိက် ဝေ့လုက်ခၠါလှ်။ အ်ုသီးဝေ့ လံင်ၜၠူး (ၜၠိုဟ်) အင်းခွိက်ဝေ့ လ်ုဖေါဟ်ဆ်ုၰာႋ မာၯံင်ၜူးဍေ ဆ်ုထုင်းဆ်ုၜံင်သီးၮှ် အ်ုခေါဟ်စံင် အ်ုသီးၮှ်မွာဲဝေ့ဍး မာၜိုဝ်မာဆိုင် ဆိက်ဆာႋ၊ ကၠောဝ်ဆာႋသီးၮှ်လှ်။
"စောဝ်"၊ "စိုဝ်"ဆ်ုခၠါင်ယိုဝ် မ်ုၜးသံင့်လင်ဆ်ုခၠါင် ၜေ့ယိုဝ်လှ်။ "ဆင့်စောဝ်အ်ုဆး၊ ထေါဟ်စောဝ် ဆ်ုၰာ" (စောဝ်)။ "လေဝ်ကိုဝ်စိုဝ် ၮ်ုဖါႋၮှ်"၊ "ၮ်ုဍးစိုဝ်ၯး"၊ "ယောဝ်ႋစိုဝ်အေထီ့" (စိုဝ်) ၮှ်လှ်။