Wp/kiu/Muzikê ma de dı astarey

Müzıkê ma de dı astarey

3yê çeleyi de Berlın de müzisyen Mikail Aslan u Aynure (Aynur Dogan) konserê amade kerd. Çıqas (her çendı) ke karê bıletrotışi sıst bi ki salon bibi pır. Merdım ke rastiye vajone, bewnayoxi (temaşekeran) elaqayêda (berzı) gırse mısna (nişan dê). Bı taybeti ki qısmê dıyıne yê konseri cande

3yê çeleyi de Berlın de müzisyen Mikail Aslan u Aynure (Aynur Dogan) konserê sazkerd (amade kerd). Çıqas ke karê bıletrotışi sıst bi ki salon bibi pır. Merdım ke rastiye vajone, bewnayoxi (temaşekeran) elaqayêda gırse nişan dê. Bı taybeti ki qısmê dıyıne yê konseri cande bi.

Ez Mikaili rew ra şınasnen / nas ken. Tawo ke CD ya ey „Kilıtê koü“ vejiyabi, mı ser o meqalayê nüştibi u cayê de wına vatibi: „...Müzikê Mikaili hemdemi yo, modern o. Labelê ey müzikê ma yo klasik ki xo viri ra nêkerdo. Müziko newe, bı hostayiye otantikê müzikê me ser o vırasto. Merdım ke CDye goş dano, şono welatê xo, peyser şono domaniya xo, bı formêde modern melodiyê pi u kal⁄kann goş dano. Mikail no het ra serkewte yo. Tekstê lawıkanê CDya Mikaili ki têpiya mılet u welatê ma ra duri niyê. Kalita xo ya edebi çı ya, çı niya o çiyde bino labırê nê teksti ciya ciya hetan ra his, wastış u qin/inan (baweriya) komê (komela) ma anê verê çiman.“ Nıka derheqê müzıkê Mikaili de no diyayişê mı de vürriyayişê çın o, eyni yo.

Rastiye a ya ke Mikail müzikê mayê klasiki ser o vırastışê müzıkê moderni de zaf serkewte yo. Merdım ke goş nano ro ey ser, hetê ra müzikê ewroyêni (hemdemi) hetê ra ki lawıkanê Dêrsimi yê klasikan goş dano. Mikail tenya veng de nê, o u embazê xo enstrümanan de ki xêza / xeta xo ya serkewtiye ramenê. Çımanê xo pêro cınê, tembürê Mikaili goş dêne; şıma raste-rast şonê Dêrsım, benêr perçeyêde ücayi. Xanım Aynure çend reyi mı Kürdistan TV de temaşe kerda. CDyanê aye ki ez rew-rew goş dan. Raya vırêne no konser de mı a cande diye. Aynure bı Mikaili ra eyni herêma ra yê. Dewê inan yewbini ra nêzdiyê. Zonê Mikaili Zazakı/Dımli/kırmancki, ê Aynure kıradski ya ki kürmancki ya. Labelê Aynure tenya bı kürmanci nê, bı kırmancki ki vana. Aynure Íekakıj (sekakız) a. Tırki, na aşire ra „şavak“ vanê, miyanê Kırdasan de no name „şewaq“ o. Íekaki, Dêrsım de koçer ê. Ma u piyê Aynure koçeriye kerda nêkerda nêzanen labelê na aşire seserran ra bı nat nê kari kena. Ê hamnani şonê koyanê Mızüri ser, üca wareyan de manenê, payizi peyser ênê. Pêndirê şekakan zaf namdar o. Vengê Aynure ser o merdım (mordem) çı vajo nêzanen. Hetê ma de ke kesê wayirê hunerêde rındi bi, şari vatêne „Dayên Heqi“ya. Ê Aynure dayêne çıki ya nêzanen labelê tarifkerdışê ê vengê pakê zelal u zengini qolay niyo. Rınde a ya ke merdım vajone vengê aye, awa Çewres çıme / Çel kani ya. A awa sıpiya, bı hir u bereketa ke bınê koyê Mızüri ra ber bena, bena Çemê Mızüri u bı eşq u coşêde gırs miyanê koyanê Dêrsımi de pêl dana pıro şona, a ya. Gelo, müzik u programê nê dı hunermendan çiyo merdım de sey (jê) kemiye biyaro ra zıwan (zon) çın o? Bêşık esto. Vajime ke ez bı xo ke bı saetan goş ro Mikaili ser nine, dıltengiye nêdano mı. Çı ke müzikê Mikaili, kültüro ke ez pê biyane pil, parçeyêde ey o. Ez mısayê nê müzıki ya u cı ra mırd nêben. Labelê kesê ke Dêrsim ra niyê, eceba ê derheqa müzikê ey de çı fıkırinê? Ê şikinê sey mı bı saetan ey goş dêne u bêzar mebêne. Zahmet o ke merdım her tım cewabêde positif bıdo nê persi. Aye ra Mikail ke bışikiyo çımey (bıngehê) müzikê xo tayêna bıkero hira, rınd beno. Ma vajime ke hem lawıkê kırmanckiyê ke cayanê binan de vajine inan hem ki kırdaski bıgêro verê çıman. No, müzıkê ex keno hira, keno zengin. Xora CDya xo ya peyêne de hunermendi no het ra game ki esta. Bı baweriya mı, lazım o ke Mikail ke programanê xo de ca bıdo müzike govende. No, müzıki monotoniye ra xelesneno, can dano cı. Derheqa pêşkêşkerışi de ki tayê nüqatayi estê ke merdım gani zaf bı diqqet nina ser o bıfıkıriyone: 1. Tayê hunermendê ma elaqa xo bıbo-nêbo zaf qesey kenê, çiyanê bêmaneyan vanê. Aynure u Mikaili de na xüye çın a, no zaf rınd o. Tawo ke lazım bi ki, pêşkêşkerdış gere kılm u net bone. 3. Pêşkêşkerdışê her dı hunermendan de ki tırki hakim o. Bêgüman no ki seba inan kemiyêda mühım a. Her çi ra avê, goreyê qenaatê mı welatanê Ewrupa da bı tırki pêşkêşkerdış hewce niyo. Merdım Kırdaski (kürdki) u kamci welat de ke konser ame dayene, bı zıwanê ê welati anons bıkero, bes o. Tawo ke bı zıwanêde bin mesajdayiş lazım bo ki merdım gani sıfte bır Kırdaski bıdone. Her dı hunermendê hêcayi çıtür ke lawıkan bı Kırdaskiyêde paki vanê, gani pêşkêşkerdışi ki bı o tore bı zıwanêde paki bıkerêne. Aynure bı Mikaili ra müzikê ma de dı astare yê, inan nıka ra dılê mıletê ma de text girê do. Ne dı astareyi hina cıwan ê / genc ê. Bextewar bê, vırêniya inan de emrêde derg esto. Eke rêça xo ya piroze ca meverdê, şikinê kültürê mıletê ma rê, bı taybeti müzikê ma de xızmetêda zaf-zaf gırdo, zaf-zaf vay bıkerêne.

Her dı astareyan ra canweşiye u sereberzey wazen. Qandê/semed (Seba) karê xo yê erciyaye/hewıl weş u war bêne.

Munzur Çem, Peyama Nu, Çele