Wp/kiu/Google

Google Inc. hem namê jü motorê cıcêraişi u hem ki namê şirketê raverberdoğê ni motorê cıcêraişio.

Dı wendekarê ke namê ho Larry Page u Sergey Brino ke Universıtê Standfordi de doktora kenê, roza 7ê Payiza Wertêna 1998ine de ebe 25 milyon dolar sermaye ra Googlei nanê ro.

Dınya de 10.000 gureker u emegdarê Google'i estê, ofisê merkezi Kaliforniya dero u cı rê GooglePlex vajino. Barebıraê sermayê şirketi, Kleiner Perkins Caufield & Byers u Sequoia Capital ki cênê zerrey ho. Şirket zobina ki, seba firmanê "zerrek vênıtoğu" taê xızmetunê web-cıcêraişi keno. Qimetê piyasa Google'i peyê 2007ine ra gore 219 milyar dolarê Amerikanio. No reqem mısneno ke Google borsaunê Amerika de şirketo tewr gırso 5ino. Peyê serra 2005ine de ki qimetê ho 114 milyar dolar bi.

Tarixçe u raverşiyaisê cı

Larry Page u Sergey Brin sıfte serba gurenaisê tezi, jü motorê cıcêraişio ke namê ho BackRub bi, ey sero guriyay. İnu waşt ke informasyonê zerrê interneti kategoriye bıkerê u çiyo ke internet dero dıha asan/reet bêro vênais. Serba nae ravêrberdışê jü teknolociya newiye sero guriyay. Na teknolociya newiye, motorunê klasiku ra gore jü metodê pratiki ra guriyêne. Na sebeb ra namê ho jü periyodê kılmeki de nas bi, bi namdar. Google sıfte adresa google.stanford.edu de kot faeliyet, u diskê terabytê ke serba istifkerdene bêrê gurenais, yurt de oda Larry de nêne ro. Badêna serba ke inu waşt na proce ticaret de pere bıkero, cêray ra mıteşebbisu.

Ronaoğê Yahooy David Filoy de kunê irtıbat. David, inu rê vano ke procê ho ravêr berê u eke proce bi hewl ho rê mışteri cıfeteliyê. Nê dı wendekari borzal (fıkır) kenê ke nêşikinê alaqa firmunê gırsu boncê ho ser, qerar danê hoser hereket kenê. Serba merkezê databanki pangu ra kredi oncenê, labelê na rey ki sebebê kartunê kredi ra sarê ho kuno tenge.

Na wext de, ronaoğunê "Sun Microsystems"i ra Andy Bechtolsheim wazeno ke nê dı xortu de qesey bıkero. Fıkrê ni dı wendekaru ra zaf qail beno u serba şirketê Google'i ecele ra jü çekê de 100.000 dolar-kerdoği cı rê nuseno. Hama serba ke şirketo nianên çino, xorti nêşikinê pere boncê. Badêna naskerdoğ u embazunê ho ra 1 milyon dolar sermaye danê arê, ebe na sermaye 7ê Payiza Verêna 1998ine de garacê jü embazê ho de Google'i nanê ro. Oncia a serre de, pêseroka "Pc Magazine" Google’i wertê "100 situnê tewr hewlu" de asnena u Google'i "cıcêraisê motorio tewr hewl" çinena we. Na rzce ra tepia Google pıra (hêdi hêdi) beno namdar.

Teknolociya cı

Hurêndia teyna cıcêraisê etiket u çekuya kilıte ya ki teknolociya cıcêraişio meta de, prensibê guriyaisê Google'io tewr/en muhim, phoştia ho teknolociya PageRank™i ra guretena.

PageRank, jü denklemo ke "500 milyon parametre u 2 milyar terimu ra yeno pêra", ni denklemi rê cüab vêneno u gorê ni cüabi pelunê interneti hetê muhimiye ra hesabneno u keno rêze (sıre) u çı ke yeno cıcêrais ano ekran.

Serba ke metodê Google'i otomatik u zaf alozbiyae, mordem nêşikino nê metodu sero kay bıkero . Ferqê mabênê Google u cıcêraisê motorunê binu ra jü ki; sistemê Google'i heni amo vırastene ke, kes nêşikino serba amacunê ticariu ni sistemi bıvurno u qe jü motorê cıcêraişio bin nêşikino jê Google'i listekerdis de neticunê dıha berzu bıvêno.

İdarekarê cı

Eric Emerson Schmidt, İdarekar u Mudirê Pêroinu
Larry Page, Ronaoğo 2ın & Serdar, Lızgê Produktu
Sergey Brin, Ronaoğo 2ın & Serdar, Lızgê Teknolociye
Omid Kordestani, Asistanê Serdari, Lızgê Raverberdisê Ticareti & Rotişi
Wayne Rosing, Asistanê Serdarê Lızgê Mıhendisiye
Cindy McCaffrey, Asistanê Serdari, Xeberdariye
Joan Braddi, Asistanê Serdari, Lızgê Servisunê Cıcêraişi
Tim Armstrong, Asistanê Serdari, Lızgê Rotisê Reklami
Urs Hölzle, Ezaê Google'i
Craig Silverstein, İdarekarê Lızgê Teknolociye

Etimolociya çekuya "Google"i

Çekuya googlei, çekuya "googoli" ra yena. Çekuya googoli, matematik de jü terimo ke morê 10¹⁰⁰ ifade keno. No terim hetê werezaê matematikkarê Amerikanıji Edward Kasneri <<Milton Sorotta>> ra amo pêdakerdis.

Girê teberi