Wp/khw/ہردی خوشان بویان کھوار کوریکو

From Wikimedia Incubator
< Wp‎ | khwWp > khw > ہردی خوشان بویان کھوار کوریکو
Jump to navigation Jump to search

نظم[edit | edit source]

ہیہ دنیا انسان غیرداؤ بہچوران ــــ کرینیران بیلیران سیراؤ بہچوران

شئوئیي دوستوسوم نو توراؤ بہچوران ــــ ای ہزار برئیوران اژاؤ بہچوران

ای چئت کی تسوم نیشی پُھوک لوان دوم

نو بیتام یہ عمرو درونگار کوریکو

ہردی خوشان بویان کھوار کوریکو

اے برارگینیان! کوس حقا مو دیور رایو ــــ ہردی کی چئھوئ اوشوي مثالی پایو

بشار پسہ سار بوئ غم کورور پھایو ــــ پسہ تین کیاغ نو کوي آیو کیہ بایو

کا کی ھاي تان جیپھو ٹیپھیاؤ بغاي

داشئمان وا کیاغ اریر میتار کوریکو

ہردی خوشان بویان کھوار کوریکو

اوا بؤتوت نیشیتام ای ھاز اوشوي ــــ مہ پروشٹہ ای کریم کوٹی ای پاز اوشوي

ہیتان پُھوک اچا ژیبوم، یہ راز اوشوي ــــ پختیو لوساؤ گیاوا ای ناز اوشوي

ناگہان سرحدی میکی خومیتاي

مہ کھوڑا ورینز اریر سے پھار کوریکو

ھردی خوشان بویان کھوار کوریکو

تہ دیہی بو کوسیتام ییری پھاری ــــ بیتی کھنگال تتین سیری اشناری

چئکھیي مہ قمقامی الفاظ شُناری ــــ دی مہ کا یُو خمیئر بوختو ٹیکھاری

تہ تت نو اسیکا تہ رینی واقھیر

اپاکا گوغ، خدائ مو دار کوریکو

ھردی خوشان بویان کھوار کوریکو

ھُوزورا کا مہ شعران کار نو اریر ــــ ھیہ کیاغ ریران ریي درونگار نو اریر

ای عبس لو جوشئی بشار نو اریر ــــ شُکر کی وا دی کا آزار نو اریر

بوکو تان نسہ نشیکو سے ریتائ

مہ براٹ پُولوئیران تہ کار کوریکو

ہردی خوشان بویان کھوار کوریکو۔

محمد الیاس ۔ گولدور، چترال۔