Wp/khw/کغاز عزیز بنام فیضی

مہ ژن برار ڈاکٹر عنایت اللہ فیضی صائیب‎ ‎‏ خوشان ہال بوس وا زندہ ہال بوس

اسلام علیکم ورحمتہ اللہ وبرکاتہ، امید شیر کہ تو خیریتو سورا بوس، آوا تاتے ھیہ لوو دیتی بو فخر محسوس کومان کہ آوا کھوار اکیڈمی ‏اوچے ویکیمیڈیا فاونڈیشنو یاردوئیو (اشتراکو) سورا کھوار زبانا ای بین الاقوامی انسائکلوپیڈیا یعنی کھوار ویکیپیڈیا ساوزیکا کامیاب ‏ھوتم وا کھوارو کمپیوٹرو زبان غیرئیکو بچے ای معمولی کوششو آغازو کوری خدائے پاکو زاتو مددو سورا تان ہے منصوبا کامیاب ہوتام وا ‏کھوار زبانو بچے کوروم کوریکو بچے تو مہ بچے تان ای کغازا ھیہ پیشن گوئیو کوری اسیتاو کہ کھوارو بے لوث خدمات کوریکو بچے تہ موژا ‏جذبہ شیر رے مہ شیریستو کوریکا واحد شخصیت تو (ڈاکٹر عنایت اللہ فیضی) اوشوئی اوا تہ ہے پیشن گوئیو حقیقت غیرئیکو بچے ‏ھتے انوس کوروم شروع کوری اسیتام وا ھنون انوس تہ دعان براکتہ اوا تان مشنا کامیاب ہوتم وا کھوار زبان آویلو انسائکلوپیڈیا کھوار ‏ویکیپیڈیا نمو سورا جاری کوری تان ای معمولی خذ متو تہ پروشٹہ لاکھومان کہ تو کھوارو خور پروشٹی آلیکو بچے تان مشوران کہ پراو تہ ‏ساری بو مینادار بوم، مہ ژان برار مورخہء ۲۵ جنوری ۲۰۱۱ء کھوار زبانا ای بین الاقوامی آن لائن انسائکلوپیڈیو اجراء کوریکو کھوارو ای ‏ادیب حیثیتہ تتے کندوری خوشانی حاصل ھوئی وا ھمو بچے تو کیہ کیہ فیلڈا اسپہ سوم قلمی تعاون کوریکو بوس، اسپہ ھر قسمہ ‏کھوار خبار دی ضرورت، شاعری دی، کالم دی وا قدیم مخطوطاتن کمپیوٹرا محفوظ کوری اصل مخطوطاتن آچی دیونو بوئی وا کا اسپہ سوم ‏بیغر لالچا کوروم آریر ھتوتے اسپہ ملکی اوچے بین الاقوامی اعزازاتن بچے ہردیار سفارشو دی کوروسی۔ مہ بازوئو قوت برار کھوار زبانا ھیہ آویلو آن لائن انسائکلو پیڈیو نیزیک مہ زندگیو ای آرمان اوشوئی وا مہ ہے آرمانو خداوند قدوس پورا ‏آریر وا ھنون کھوارا ھیہ ویکیپیڈیا پسہ غون کھوارو محسنان پروشٹہ شیر ، مہ ذاتی کوششان سورا کیہ کھو قام تان دورا نیشی انٹرنیٹا تان ‏ژاغو بارا، زبانن بارا الغرض ہر موضوعا مضمونن لوڑیکو، آپلوڈ کوریکو، ڈاون لوڈ کوریکو وا تان مضمونن تان دورا نیشی نیویشکو وا انزئکو ‏بونی، آوا کھو قامو بچےای بین الاقوامی ویکیپیڈیا جاری کوری بو زیات خوشانی محسوس کومان امید شیر کہ مہ سار زیات خوشانی تتے ‏حاصل بیتی شیر وا تہ غون کھوارو عظیم شخصیتو قلماری نیسیرو ای لوظ مہ بچے ای کھوررو روپیو ساری دی زیات شیر مہ ژان برار روئی متے رینیان کہ ھیہ دیوانہ، وا تان پیسان کھوار زبانو ت خزمت رے فالترو کورمہ خرچ کویان رینیان وا متے ھیہ طعنو ‏دی دونیان کہ روئی مسہ تورتانی تو کھوتا تان تت بپو پولی ٹھسکورک ختانی تان زندگیو پھار دوسان متے ھیہ لوئو دی دونیان کہ تو تان ‏پیسان کھوارو غون بکواس وا چھتراریان پونگہ پولوغ زبانو بچے ضایع نو کاردوا تہ کراچیا بنگلہ بیسینی رینیان مہ ژن برار مہ بنگلو ‏ضرورت نیکی مہ ژن برار مہ ساوزیرو بنگلو سورا مہ بریکار آچی خور روئی قبضہ کونی وا مہ تان زبانوتے خزمتو سورا قبضہ کوریکو نوبونی ‏ھمیت مہ لو وا آوا بریکا پت تان زبانو طرقیو بچے کوروم کوم تان زبانا الفاظان کتاب ساوزیم، تان زبانو ختم بیکو نو لاکوم، تان زبانا ‏اخبار نیزم وا کیاغ دی کہ مہ وسہ بیرو بیرائی اوا تانتے بنگلہ ساوزیکار پروشٹی تان زبانو ترقیو بچے کوم، کھوارا لو دوم کھوارا نیویشیم وا ‏کھوار ریم۔ مہ ژن برار تہ ساری دی ھیہ امیدو کویان کہ تو دی تان زبانو ھیہ انسائکلو پیڈیو ترقیو بچے کوروم کوروس وا تان مادری زبانا(کہ ھوتے تو ‏تت بپو زبانو سوم تشبیہ دیتی مہ ژانو لوو پراو) کالم، مضمون یا خبار نیویشیس آوا کھوارو خور ادیبانن ساری مایوس بیتی اسوم وا صرفی ‏تہ ساری ھیہ امیدو کومان کہ تو تان خوش زبان کھوارا نیویشی تان کھواروتے ترقی دوس وا کیچہ کہ پروشٹی مہ شیریستو کوری اسیتاو ‏ھتے قسمہ تہ راھنمائیو ضرورت شیر وا مہ ھیہ پیغامو ھر ھتے چھتراریو سوم تاراوے کہ اسپہ کوساری پیسہ نو مشکیسیان وا نہ ‏کوساری اشتہار مشکیسان وا نہ تھیش مشکیکو چال اسپتے گوئی وا نہ خدائے اسپہ کوس پھانہ محتاج کورار، آمین بس ھر ای سبق راردو ‏کمپیوٹر استعمال کوراک زبان دوست وا ادب دوست شخصیاتنتے ھیہ گزارش کہ ای کھوار لوظ، ای کھوار مضمون، ای کھوارا نماکین ‏لو، ای کھوار شعر، ای کھوار شیلوغ یا خور کیہ مضمون کہ ھسے انپیچ فامیٹا یا ورلڈ ڈاکومینٹا یا مہ ساوزیرو کھوار کیبورڈا نیویشیرو بائی ‏اسپہ کھوار اکیڈمیو سافٹ ویرو زریعا ھتیتان کھوار یونی کوڈا کنورٹ کوری چاپ کوسی وا کیہ مضمون دی کہ ای دفعہ کھوار ویکیپیڈیا ‏چاپ ھوئی وا ھتوغو اسپہ اجازتاری غیر کا بوغیئکو دی نو بوئی وا انٹرنیٹا بہچور، وا کا کہ بو زیات کھوار آرٹیکل نیویشیتائی ھتوعوتے ‏اسپہ ایوارڈو دی اعلانو کوسیان وا ھیہ ای بین الاقوامی ایوارڈ شیر وا ھیہ ایوارڈو ھتے زبانو خوشداراک نیویشاکان خزماتان اعترافا ‏ویکیمیڈیا فاونڈیشن اوچے کھوار اکیڈمی دیکو اعلانو کوری اسونی امید شیر کہ پسہ ھے ایوارڈو حاصل کورومی وا تان قلمی تعاونو کھوار ‏اکیڈمی اوچے ویکیمیڈیا فاونڈیشنو سوم جاری لاکھومی انشاء اللہ ‎‎ ‎‎