Wp/khw/چُمُٹکیرو فریاد
چُمُٹکیرو فریاد[edit | edit source]
گوشئوچین چپوتی ہوستار نو بویان __ پُھواؤ بُوک چوکی دی انگار نو بویان
کیہ وخت اوشک کیہ وختی دار نو بویان __ تہ ارمان مگم ژُور انکار نو بویان
اے تت تو اف ساری مہ موشانتے دیت __ نیسین وا مساری دُرونگار نو بویان
متین گُرزینا دی قرار نو بویان
مہ ژُور ریئ متین کیہ رخُم تہ نکی __ ای غیری مھروتین فخُم تہ نکی
پُھک کیہ غیرت ہردی زخُم تہ نکی __ کیہ موخہ شرم کُھل فخُم تہ نکی
تُو مہ بیزیمیکا غیچ دیتی اسوس __ ھیرا پھُردل اسوس موخار نو گویان
متین گُرزینا دی قرار نو بویان
نو لوڑی خلتاباری اف ارُو تُو __ لغلو پھیروانو سُوم اصراف ارُو تو
مہ پھوستو نیژی تانتے ڈف ارُو تُو __ غیچھان نشکی گوڑو صدف ارُو تُو
کیہ نو کوریکو بشو سف ارُو تُو __ شوم شا جمار اژیتائ، ناف ارُو تُو
تُو رویان شئپیکوتین کیہ مشئکیسان __ مہ لیئ تہ گردنہ غوچھار نو بویان
متین گُرزینا دی قرار نو بویان
مہ ٹیکھو لالوت یفتالیوت نو پراؤ __ مہ لیئ کیڑیئ پُردُوم ولیوت نو پراؤ
سہیل، عمرانوچین علیوت نو پراؤ __ استورغاڑ کوراک، فُٹبالیوت نو پراؤ
مہ کورا بپوت پیتھیئ پیسہ گانیس __ اے رایت تسوم وا تکرار نو بویان
متین گُرزینا دی قرار نو بویان
لاؤریار اف تہ ہے جنّت مہ بو دش __ وے ننگو رویانسم محنت مہ بو دش
افو ہے موش دی تو مہ تت مہ بو دش __ نو کوروم مالوتین عزّت، مہ بو دش
مہ دوست میھ بوتی گوئ بیرموغو موڑا __ ھوروسوم نیسیکو مہ عار نو بویان
متین گُرزینا دی قرار نو بویان
(محمد الیاس، گولدور چترال۔ ١فروری، ٢٠١٣عیسوی)