Wp/khw/وادی کھوتو ادبی منظرنامہ

وادی کھوت ݮھترارو شہرار 129 کلومیٹر دودیری شمالو ویݰکی شیرو ایک ݰئیلی دیھ شیر کھوت 70 فیصد علاقہ میدانی وا 30 فیصد ٹھنگالی دیھان سورا مشتمل شیر۔وادی کھوتو تان وسیع رقبو اوچے کھوتو وارزین گیاک جو ژویان وجھین بو مشہور خاص کوری کھوتو را ژوئے بو زیاد اہمیتو حامل شیر وادی کھوتو آبادی سن دو ہزاز دسہ 1014 بیرانی وا رویان تعداد 10 ہزارو ݰوئی بیرانی۔ کھوتو ادبی تاریخو بارا ہمونیا پت ہش کوستے صحیح معلومات نیکی ۔معلوم تاریخو مطابقہ کھوتہ ہموغار 60 سال پروشٹی صرف ای شاعر آستائے ہتوغو نام طلال بیرائے۔ مگر ہتے وختہ تعلیمو کیہ ذریعہ نو بیکو وجھین دیتی روئے کا سبق راردو نو استانی وا نیویشیکو طریقہ کوستے نو گیاؤ استائی ہتے وجھین دیتی طلالو کیہ شعر محفوظ نیکی۔ بوممکن شیر طلالو سار پروشٹی دی کا شاعر بونی مگر ہتیتان بارا کوستے معلوم نیکی۔طلالو سار اچی ای یا جو نسل شوخڅیکا پت کھوتہ ادبو چے شاعریو وا کیہ اثرات غیچھی نو گونیان۔موجودہ وختہ وادی کھوتہ شاعرانن تعداد کافی زیاد بیتی شیر مہ معلوماتو مطابقہ وادی کھوتہ شاعریو آغازو رحمت عزیز چترالی1985 عیسویہ کوری اسور رحمت عزیز چترالیو سار پروشٹی کھوتہ کا شاعر نو استانی یا کھوشت استانی۔بو ممکن شیر ہے دورا ظفراللہ جمالی دی شاعری کوراک بوئی مگر منظر عامہ صرف رحمت عزیز صائبو شاعری گیاوتانی۔ ہیغار اچی کھوتہ بو جم وا بو ݰئیلی شاعرانن پیدا بیکا پرانی ہتیتان موژی حیدر علی، غلام اکبر، سراج احمد ساقی ،فخرالدین ساجد،فدا علی آدف،حافظ ظہیر اظہر،ابراہیم خلیل، کلیم اللہ،منظور ولی خان مسرور،احمد ناظم،نادر ولی، علی احمد تھونکوی،میر اجمل، نجم الدین نجمی زار مراد خاکسار وا اخیرا ناچیز دی ای کما الفاظان اییا ݯاکیاؤ ہیتان صفا شامل بیکو کھوشش کومان وادی کھوت ادبو دنیا بو ملالہ پونگ لاکھیتائے مگم سرزمین کھوتوتے ادبو دنیا ھیہ اعزاز حاصل شیر کہ کھوارو اویلو مزاحیہ شاعریو کتاب کھوتو سوم تعلق لاکھاک نامور شاعر و ادیب رحمت عزیز چترالی صائب نیویشی اسور وا ای خور بولوٹ اعزازو دی رحمت عزیز چترالی صائب کھوتو نامہ کوری اسور کہ کمپیوٹرا کھوار نیویشیکو بچین سافٹویر ساوزے کھوار ادبہ ای لوٹ مقام دی حاصل کوری اسور ہیغار علاوہ پاکستانو 40 مقامی زبانن کمپیوٹرا نیویشیکو قابل سافٹ وئیرو رحمت عزیز چترالی ساوزے ہے اعزازو دی کھوتو نامہ کوری اسور رحمت عزیز چترالی صائب ادبی خدماتن بچین بے اݰمار انعامات وا ایوارڈ حاصل کوری ݯھترارو سفان سار زیاد ایوارڈ یافتہ شخصیت دی اسور۔رحمت عزیز صائبوتے ماہنامہ شندورو ووݰکیاری شندور ایوارڈ، چترال ھیومین ڈولپمنٹ ایوارڈ، شندور ایوارڈ(۲)،اینوویٹیو یوتھ فورمو ووݰکیاری اینوویٹیو اینیشئیٹو یوتھ ایوارڈایوارڈ، تحریک جوانان پاکستان چترال ونگو ووݰکیاری یاسراللہ شہید ایوارڈ ۲۰۱۵،جرنلسٹ فاونڈیشن پاکستانو ووݰکیاری پرائڈ آف دی نیشن ایوارڈ و گولڈمیڈل ۲۰۱۴،نظریہ پاکستان کونسل اسلام آبادو ووݰکیاری ڈاکٹر عبدالقدیر خان گولڈمیڈل و ایوارڈ ۲۰۱۵،پکسوٹو نامی ای بین الاقومی تنظیمو ووݰکیاری رائزنگ اسٹار ایوارڈ ۲۰۱۴، مائی لینگویجز نامی ای بین الاقوامی لسانی تنظیمو ووݰکیاری سند لسانیات، دعوۃ اکادمی بین الاقوامی اسلامی یونیورسٹی اسلام آبادو ووݰکیاری سند فضیلت، وزارت تعلیم حکومت پاکستان اوچے نیشنل بک فاونڈیشنو ووݰکیاری سندتوصیف، برٹش کونسلو ووݰکیاری سند وغیرہ دیونی بیتی شینی گلدستہء رحمت ۔گلدان رحمت، گل افشانیات اقبال، گل و بلبل، کھوار رموزاوقاف،حمدوثنائے رب جلیل،چترالی گرامر،گلځوخ،کھوار ووکیبلیری، کھوار کلوزڈ کلاس ورڈز،کھواریونی کوڈز، کھوار قاعدہ، بلتی قاعدہ، شینا قاعدہ،ہندکو قاعدہ،سرائیکی قاعدہ، پہاڑی قاعدہ،براہوی قاعدہ،کالاشہ قاعدہ، دامیلی قاعدہ، پالولہ قاعدہ، بروشسکی قاعدہ،ڈوماکی قاعدہ، وخی قاعدہ، مداکلشٹی قاعدہ، کشمیری قاعدہ، سندھی قاعدہ، بلوچی قاعدہ،گاووری قاعدہ،پنجابی قاعدہ، ہندکو قاعدہ، عربی قاعدہ، توروالی قاعدہ، انڈس کوہستانی قاعدہ،فارسی قاعدہ وغیرہ شامل شینی، رحمت عزیز چترالیو یاد لاکھیکو بݰ ادبی خدماتن سار علاوہ ݯھترارو اویلو خاتوں شاعرہ رحیمہ نازو تعلق دی وادی کھوتو ݰاریگرامو سوم شیر رحیمہ نازو اردو شعری مجموعہ چھاپ بیتی منظرعامہ گیتی شیر۔کھوار زبانہ اویلو ناول دی ناچیزو ہوستہ مکمل بیتی کھوار ادبہ ای نوغ اضافو سوم جوستہ وادی کھوتوتے ای خور ادبی اعزاز دیکو امکان شیر ۔کی لوڑین بویان وادی کھوت ادبو دنیا بو اچہ گیتی شیر مگر بو ݰاؤ کھوار ادبہ بو لوٹ مقام پیدا کوری شیرامید شیر کہ کھوار ادبو ترقی بچین کھوتو شعراء وا ادیبان تان تمام صلاحیتن کورمہ انگونی وا کھوار ادبہ تان سوم سوم جوستہ کھوتو نامو دی نویوکو کونی(نیویشک:محمد طاہر شادان)