Wp/khw/توفیق احمد جاویدو شاعریو ای تنقیدی جایزہ

توفیق احمد جاویدو شاعریو ای تنقیدی جایزہ

توفیق احمد جاوید کھوارو ای نوجوان شاعر، وا ھو شاعریو نمونہ اپنا چترال نامیں ویب سایٹا چاپ بیتی شیر، ھو ای کما اشعارن بارا اوا تان رایو دیتی آسوم۔امید شیر معزز راکانتے پون دویی البت۔ کھوارو نوجوان شاعران تان شاعریا نہ وزنو خیالو نو لاکھونیان نہ استاد گنی شاعری کونیان، وا ھیتان شاعریا نہ تلفظ صحیح بویان نہ املا، مہ ہے شاعراننتے مشورہ شیر کہ تان شاعریان استاز شاعرانن چکیے اصلاح کوری چاپ کورانی۔ کھوارو ای شاعر تان شاعریا ھموش ران کہ

تو مہ مجبور مو کو خدایو نامہ ۔ مہ تن ضرور مو کو خدایو ناما

شاعر ھیہ آویلو شعرا نامہ وا جوو شعرا نامہ نیویشی آسور، لیکن کھوارو صحیح لوظ نمہ شیر۔ وا متے نیویشکو ژاغہ مہ تن نیویشی آسور۔

تو تان گادیریو نا فخمیو لوان ۔ جہانہ شور موکو خدایو نامہ

ھیہ شعرا شاعر گادیریو[پاگل] نیویشی آسور مگم ھیس گادیرییو[پاگل پن] ریک مشکیران۔

کی مہ مریسان تو تن قاتل نظرین ۔ کیانی بؤی مو جو خدایو نامہ

ھیہ شعر مہ سمجھی نو ہای ھیا با الکل وزناری خالی شیر، شاعر ھیہ شعرا کیاغ ریک مشکیران کیہ خبار۔

گاہ پھساؤ ہوتم رقیبو چلا ۔ مہ تن گلہ مو کو خدایو نمہ

ھیہ شعرا لوظ گاہ مہ سمجھی نو ہای، وا شاعر اردو لوظو یی گنی پھساؤ کوری تان شعرا استعمال کوری آسور۔

دیتی عشقو راھہ نگہ م روءیتو ۔ مہ سر پردہ مکو خدایو نامہ

ھیہ شعرا مہ نیویشیکو ژاغا خالی م[میم] نیویشی آسور وا لوظ موکو ژاغا مکو نیویشی آسور۔ وا شاعر اردو لوظ سرپردہ کھیوت استعمال کوری آسور ھیس دی سمجھی نو ہای۔

خوسشان نو کو تو تان زران سومہنون ۔ غچاشرومکو خدایو نامہ

ھمیہ لوظ خوشان بیلک اوشوی لیکن شاعر ھیہ لوظو خوسشان نیویشی آسور، وا موکو نیویشیکو ژاغا نوکو نیویشی آسور، غیچھہ آشرو نیویشیکو ژاغا غیچاشرو وا موکو نیویشیکو ژاغا مکو نیویشی آسور۔

جد تنا بچتا نن جان ۔ ت دی تنا ن بس خدایو نام

بو کوشش آریتام ھیہ شعرو کیہ داراکہ دوما رے لیکن ھمو ھش کیہ پنجو نو لیتام، معزز راک کیہ خبار ھمو کیہ داراکہ دونیا نو شاعر تان ھے شعرو کیہ سیاق و سباقو بیان کویا؟ توفیق احمد جاویدو ای کما خور شعران تنقیدو غیچھین لاڑیسی۔

تازہ زخمان کوری ہسیران اسے ۔ مہ پریشان کوری اسیران

ھیہ شعرا شاعر ځخمان نیویشکو ژاغا زخمان نیویشی آسور وا لوظ ھسے نیویشکو ژاغا اسے نیویشی آسور، ھش ساریران کہ توفیق احمد جاویدو تت بپو زبان کھوار نو۔

کیچہ الفتہ ہنون زندگیو ۔ واامتحان کوری ہسیران اسے

ھیہ شعرا انتحان نیویشکو ژاغا امتحان نیویشی آسور، لوظ امتحان اردو زبانو لوظ وا ھے لوظ کھوار گیتی انتحان غیری شیر۔

جلوہ مسو پشے گلستابا ۔ گلو حیرانکوری ہسیران اسے

لوظ گلستابا مہ سمجھی نو ہاءے اوا ھے شعرو کوڑومیا توریکو نو بیتام۔

ہنون مقتلا ای مظلومو وشکی ۔ قاتل غیچان کوری ہسیران اسے

ھیہ شعر جم مگم ھیہ شعرا دی اردو زبانو لوظ مقتل، مظلوم، قاتل استعمال بیتی شینی، ہے لوظان ژاغا کھوارو تان لوظ بیروا جم بیسیر۔ کھوار زبان مظلومو محلوم نیویشیلک اوشوءی۔

نسومے گیتی تان سورو ہنون چمنہ ۔ مہ تن نخرا کوری ہسیران اسے

شاعرو ھیہ لوظ نسومے مہ سمجھی نو ہاءے، لوظ ہنونو ژاغا نون بیروا وزن دی برابار بیسیر، مہ تن نیویشکو ژاغا متے نیویشیلک اوشوءے۔

ہردیہ شیرو ہنون جاویدو راز ۔ محفلہ شور کوری ہسیران اسے

ھیہ شعرو آخرا رازو ژاغا رازان نیویشیرا ھمو وزن برابار بیسیر۔

• نقندہ کوراک:رحمت عزیز چترالی