Wp/khw/برنس

برنس۔ از۔۔۔ اقرارالدین خسرو۔ ۔ برنس لوئر چترال یا موڑی ݯھترارو أخری ای ݰییلی دیہو نام۔ برنس خاص ݯھترارار جو بشیر کلو میٹر شمالو ویݰکی (مستوجو راہہ ) شیرو ای ݰیلی دیہہ۔ برنسو جنوبو ویݰکی مرویو دیہہ شیر شمالو ویݰکی نوڑ، جنوب مغربو ویشکی پرئیت مغربو ویشکی سینہ ہے ویشکی ادرخ یا زوم شیر ہے زومو اچو غیری ای ویݰکی اویرو دیہہ ای ویݰکی پھستو دیہہ شینی۔ برنسو مشرقو ویݰکی اددرخ شیر ہے زومو اچو غیریکو گولینو دیہہ شیر۔ برنس پّھّان لشٹہ شروع بیتی ݰاچرہ پت ای درونگ دیہہ، برنسو درونگاری نیوف کلومیٹر وا بیروغنی کورا جُو وا کورا ای کلومیٹر، برنسو آبادی پونج ہزار تقریبا ، برنسو نامو بارہ بو قسمہ روایات شینی ای روایت ہیہ کہ برنس ۔ بار۔نیست۔۔ ہمی لفظان سار نیسی شیر مطلب بار نیکی، لوک روایتو مطابقہ ریاستو دورا ریاستو سامانان مختلف دیہو روے تان ژاغار پھار ئی الیکو ذمہ وار بیرانی، ہے ذمہ واریہ برنسو روے ہیغار خالص بیرانی یا ہے بندوبستو ریاست تان کوراوستاے ہیغین دیتی بار نیست رے ہیغاری برنس ساوز بیتی شیر۔۔

جوو روایت ہیہ اصلہ بیورنیس بیراے، بیورنیس چینو ای باݯھو نام بیراے ھاتو حکومت ݯھترارہ دی شیراے، وا برنسو جومشیلی نامین دیہہ ہاتو نوغور دی شیراے، ہورو ای ثبوت برنسو جومشیلی دیہو پروشٹہ سینہ بیارو ای بوختہ قدیم کیہ زبانہ نیویشیرو شیر، پروفیسر اسرارالدین تان کتابہ نیویشیران کہ لسانیاتو ماہرین ہورو اردوا ہموݰ ترجمعہ کوریسونی (جے ورمن کی طرف سے خداؤں کے نام ہدیہ تبرک ) جے ورمن دی بیورنیسو سار پھوک اݯھو چینو باݯھا بیراے، ہیغین دیتی ہیہ روایت پھوک سہی سریران۔ برنسو سرزمین بو زرخیز ، برنسہ تروے گولوغ شینی ہیتان سورا زمینان اوغ کورونو بویان۔ برنسو لوٹ گول، جمشیلی گول وا داڑوم گول، برنسہ گوم، جواری وا شالیو پیداوار بو جام بونی، میوان موژی داڑوم، دروڅ، ژوڑی ، پلوغ ٹونگ، املوک، لوکاٹ ݯھترارہ شیرو کیہ دی میوہ بونی۔

معیشتو لوٹ دارومدار زراعتار علاوہ ملازمت شیر، برنسو روے تعلیمو میدانہ بو پروشٹی اسونی، برنس شرح خواندگیو حسابہ ݯھترارہ سفانسار پروشٹی شیر،

ای روایتو مطابقہ ݯھترارو اویلو سکول دی برنسہ ساوزینو بیتی شیر، شجاع الملک میتارو وختہ برنسو روے سرکاری بنگلو سورا قبضہ کوری، تان ویشکیار استاذ دوسی سکول کھولاو کوریرو بیرانی، البتہ ہے وجہ بوے ݯھترارو جو کالج ڈگری کالج و کامرس کالج کھاڑان اولو پرنسپل برسنی بہچیسونی۔

برنسہ ہنیسے تعلیمو بچے گورنمٹو ویݰکیار ای مردانہ یاسر شہید ہائر سکینڈری سکول وا ای زنانہ ہائی سکول وا مختلف پرائمری سکول شینی، وا ای پرائیویٹ کالج، جو پرائیویٹ سکول، وا ای مدرسہ دی شیر۔