Wp/khw/بابا شکور غریب

سلسلہ تعارف شعرائے چترال۔ اتالیق مرزا محمد شکور غریب۔۔۔(از اقرار الدین خسرو)۔ مرزا محمد شکور غریب کھوار غزلو باوا آدم غریب صاحبو کھوارا ہتے مقام شیر کیاغکی اردوا ولی دکنیو شیر۔ غریب صاحبو تعلق موڑکہوو سوم اوشوئے۔حاتم بیگے قومو جد اعلیٰ حاتم بیگو چشم چراغ۔ مرزا صاحبو زندگیو یا ھاتو زمانہ بارا کھوار نامور شاعر ، ادیب، و مورخ محمد عرفان عرفان صایب، ریران کہ مرزا صایبو زمانہ 1690 یار گنی 1772 اوشوئے۔ جبکہ مولانا نقیب اللہ رازی صائب کہ غریب صاحبو شعری مجموعو ترجمعہ کوریسور مولانا صاحبو مطابقہ غریب صاحبو پیدائش 1695 اوچے 1705 موژی اوشوئے۔ بہرحال اٹھارویں صدی غریب صاحبو زمانہ ۔۔ غریب صائب تاریخہ اتالیق نامو سورا دی مشہور، اتالیق ہتے وختہ فوجی سربراہوتے راوشتانی گویا غریب صائب ای وختہ صاحب سیف و قلم اوشوئے۔ غریب صائب کٹور میتار سنگین علی ثانیو (و شاہ افضل و شاہ فاضل ) دورا اتالیق بیرائے وا سنگین علیو سوم بیتی رئیس شہزادہ چھترارو حکومتو اچی گانیکار اچی ہندوستانہ دی بوغدو بیرائے۔ و مختلف ژاغین کوسی بو بو شہران پوشی کورا دی چھترارو مزو نو لے ہموش راسور۔ مسافر گشتہ دیدم شہر بیسیار نہ دیدم ھیچ جائے مثل چھترار۔ غریب صائب عام طورا فارسیہ شاعری کوریسور فارسی دیوانو آخرا فارسی اوچے کھوار امشتی غزل نیویشیسور۔ شکور غریب صائب عربیوچے فارسیو عالم فاضل بیکین دیتی ھاتے دورا عربیو مروجہ عروضو مطابقہ شاعری کوری اچہ گیاک کھوار نسلو بچے ای ہرین پیچھی بیسور۔ غریب صایبو بارا محمد عرفان صائب شہزادہ فخرالملک مرحومو حوالو دیتی نویشیران کہ غریب صائب ابتدائی تعلیم دورا تان حاصل اریر مزید تعلیم افغانستانہ بی حاصل اریر۔ شکور غریب صائب فارسیہ نعت حمد مثنوی کیہ دی صنفہ شاعری کوریسور ۔ کوریکو ہتے وختو قومی و دفتری زبان فارسی اوشوئے ہتیغین دیتی شاعری دی زیادہ تر فارسی زبانہ کوراوشتانی ۔ ہتے سوم جستہ دی غریب صاحب نانو زبان یا تت بپو زبان کھوارو نو روخچیتائے ۔ تان نیویشیرو ہتے غزلان وجہین کھوارو باوا غزل و اعزازو حاصل اریر۔ غریب صاحبو کھوار کلامن مجموعہ حاتم بیگے قومو ای قابل ژاؤ ہیڈ ماسٹر منیر احمد صاحبو کوششان سورا ۔ مولانا نقیب اللہ رازی صاحبو ترجمعو سوم جستہ "مشک ختن " نامو سورا منظرا گیتی شیر۔ مشک ختن نام دی ھاتو شعرار گانونو بیتی ۔ جبکہ کھوارو شیلی متلو ہموش چقہ شعرا بیان کوریسور۔ بیردوار پویا جام رویو قدرو کورونی ہوش آہو کہ اوبریستائے پاشینی مشک ختن را۔۔ محمد عرفان استاذو مطابقہ خوشوقتے مہتر شاہ خیراللہ 1782 عیسویہ چھتراروسورا حملہ اریر۔ مرزا شکور غریب چھور بشیر جو 82 سالو عمرا ژنگ کوری ہے ژنگہ زخمی بیتی دورا ھائے، ہورو اژغال شاہ سنگین علیو ژور اوشوئے، شہزادی مرزا صاحبوتے پھوک نخرا کوراوستائے۔ ہے آخری وختہ مرزا صایبو سوم بو پریشان بکو ہیہ شعرو رادو بیرائے۔ رافقا در زندگانی قدر ما نشاختی بعد مردن درپائے تابوت نالیدن چہ سود۔ غریب صاحبو شاعریار ایکما منتخب اشعار۔۔ ۔۔۔۔۔۔۔۔۔۔۔ تہ کہ لیم تہ تانتے غیروم چھوئے انوس۔۔ تہ نو لے خورانتے غیروم چھوئے انوس۔ تہ پھریشو گیرو چھوئے تہ موخ روشت انوس تہ چھوئے انوسانتے غیروم چھوئے انوس۔۔۔۔۔۔۔۔ ۔۔۔۔۔۔۔۔۔۔۔۔۔ ۔۔۔۔۔۔۔ اے بار خدایا مو چھینے قدر چمن را گرزینہ مو انگیے بہ کرم زاغ و زغن را۔۔۔ ہر گز مو انگیے اشپقیٹیو گلشانہ یارب۔۔ ہمدوش بہ بلبل کورے ریحان و سمن را۔۔ گر برسر قبرم کہ گسیرآں مس موخئی دلجو ڈازباز ریپھیسام بق پیچھی درگور کفن را۔۔۔۔ ۔۔۔۔۔۔۔۔۔۔۔۔ اے دل تو یکی سیر بعالم نو کوروس کو یک چند تماشائے دش و جم نو کوروس کو بے دل کہ اوشوئے موش نو تاریر عزتہ ہر گز عزت کہ تہ خوش تان سورو رستم نو کوروس کو۔ تہ دردا اوا عاقبت الامر اوبریستام۔۔۔ اے دلبر بے رحم تو ماتم نو کوروس کو۔ ۔۔۔۔ بے نمک چست کیمیریو سار نمکین دہہت بو جام، بے نمک چست بو اسونی نمکین جم لوئی کم، موخو اشکیٹ کوری ہر گز متے شوقہ موکورار، ہوس ہوساو ہر زمانہ دیار مہ بان از جورو ستم ۔ ۔۔۔۔۔