Wp/khw/بابا سیر

سلسلہ تعارف شعرائے چترال مرزا محمد سیر (بابا سیر ) () از اقرارالدین خسرو) چھترارہ صوفی شاعر بابا سیرو نام کوس کارہ نکی۔ بابا سیرو رومانس (پاکیزہ عشقو ) قصہ کوس کارہ نکی؟ بابا سیرو کڑوم یارمن ہمین دی چھترار بطنہ بو مشہور ہورو بعض شعر ضرب المثلو شکلہ دی بو رویان کارہ شینی خاص کوری " التی پیشمان بیکو سار نو التی ارمان مہ بو خوش) اکثر رویان زبانہ شیر ہنون دی۔۔ و بابا سیرو عشقو بارا دی شیلی بو مہذب قصہ لوک روایاتن ذریعہ اسپہ کارہ توری شینی ۔ بابا سیرو تعلق شوگرامو سوم بیرائے ہیس ریشنہ عاشق بیرائے، بابا سیرو دوست موش وینی بیرائے بابا سیر عاشق بکو سوم جستہ مہ اوان دی مہ دوستو سوم نو تاریر رے وعدہ کاردو بیرائے و ہے لوو سورا قایم بہچی بہتی اسور،، ای مکالہ یومونو وختہ بابا سیر شوگرامار ریشنی گیاوا شوگرامو سیرو موژا گیکو بابو دوست تان موشو سوم بیتی یئی ووشکی سیرا توریسور۔ ہورو موش ہوتے راسور کہ دی تو سیرین پھار چھو سیَر کیچہ بوئے ؟ سیرا جو نفری ایغو نسین نسیکو نو باوستانی بابا سیر لوڑیسور کہ پروشٹاسار دوست ئیی گویان پروشٹی بیکو، دوستوسوم اوان تاریران اچی بیکو دوستوتے کریم بویان رے، مہمیز کوری سینو موژو دیتی اوسنیے ئیی نسیسور۔۔ بابا سیر چھترارو شیلی دیہہ شوگرامہ محمد بیگے قومو نعمت اللہ شاخو دوست محمد لالو ژاو، ہورو تاریخ پیدائشو بارا سہی تاریخ معلوم نیکی، چھترارو نو یوکو شاعر ادیب مورخ محمد عرفان عرفان صاحب تاریخ پیدائش 1766 نیویشیسور۔ بابا سیرو تان ساوزیرو ختانو ای ٹھونہ ختانو ساوزیکو تاریخ 1236 ہجری نیویشی شیر۔۔ ہیغار اندازہ گانین بویان کہ بابا سیر اٹھارویں صدیہ پیدا بیتی انیسویں صدیہ شوخسی اسور بابا سیر ای عالم فاضل مگر علم کورا بی حاصل کوریسور ہے بارا یقینو سورا کا دی لو نو دیتیسونی۔ ابتدائی تعلیم چھترارہ تان حاصل کوریسور ہیغار علاؤہ کھوارو ادباء شعراء مورخین محترم مولانگاہ صاحب۔ ڈاکٹر فیضی صاحب۔ محمد عرفان صاحب غلام عمر مرحوم سف ہیہ لوا متفق کہ چھترار نیشی بی علم حاصل کوریسور۔ دی ہندوستانہ بیسور یا سمر قند و بخارا یقینو سورا کا لو دیکو نو بیتیسونی۔ بہرحال بابا سیر ای عالم فاضل عربی فارسیو ماہر بیرائے، فارسیو بو لوٹ پیمانو شاعر مقتدرہ قومی زبان بابا سیرو فارسی دیوانو شائع کوریسور۔ ہے فارسی دیوان کھوارو قابل فخر شاعر ادیب محترم مولانگاہ نگاہ صاحبو اردو ترجمعو سوم جستہ منظرا گیتی شیر۔ بہر حال بابا سیر چھترارہ تان پاکیزہ عشق و تان کڑوم یارمن ہمینو وجہین مشہور چھترارار نیشی فارسی شاعر مشہور۔ بابا سیرو فارسی دیوان ، شاہنامہ سیر، و کھوارو یارمن ہمین ، عام طورا یارمن ہمین و ایکما اشعار باشیاک باشینی محمد عرفان صاحب فیضی صائبو حوالو دیتی نیویشیران کہ ہیہ کڑومو 1300 اشعار شک بیرانی ۔ بابا 1830 عشرہ وفات بیتیسور۔ بابا سیرو زیارت شوگرامہ شیر، متے کفان موکورور مہ زیارتہ توغ ریپھاوور مہ زروٹھی پزا کہ ہائے مہ دینارو اہی ریپھاوور۔ ہیہ نصیحتو مطابقہ توری شوگرامو گولو ٹیکو توغ ریپھیرو زیارت شیر۔ بابا سیرو تان سوزیرو دور دی شوگرامہ شیر۔ ھاتو اولادان موژار مرحوم سردار زمان استاذو ژیژاو خلیق الزمان اوچیت و محمد عمر لال سف تعلیم یافتہ شیلی روئے، مگم ہے نسلہ شیلی شاعر کا نو نسیتانی ، عمر لال ریکو چے کار کوریکو حدا پت بو باذوق البتہ تان شاعری نو کوئی، بابا سیرو زیارتہ ستھار چھیچھیکو بچے رے دی بعض روئے بوغاوستانی ۔ بابا سیرو فارسی اشعار ایران ہندوستانہ پت توری شینی۔ و کھوار کڑوم یارمن ہمین دی کہ لوڑین بویان، تان تنہا اسلوب، نازک خیال و تان منفرد ہنگو وجہین دیتی جوشور سالار دی زیاد ہوئے مگم ہنیسے دی شروعو چقہ مشہور و خوشینو بویان ۔۔ بابا سیرو کلامار ایکما اشعار۔ اے کمتر از خروس چرا غافلی زحق پس از طلوع صبح تو بر خیز و آہ کن ہر گز سیر مہ ناز بہ طاعت خویشتن طاعت کنی و تکیہ بہ لطف اللہ کن اے نرکوکو سار دی غافل انسان چھوچی راغیشٹی ریپھی اللہو یاد کورے۔ اے سیر تو تان اطاعت اوچے فرمانبرداریو پروشٹی کوری چرق مو بوس، اطاعت اللہو کورے اچی اللہو مہربانیو سورا بھروسہ کورے۔۔۔ نیست اندر سینہ آرامی دل بیتاب را تابہ کہ دارم بدست این قطرہ سیماب را رفتہ رفتہ درحقیقت می کشد عشق مجاز قطرہ قطرہ سوئے دریا می برد سیلاب را مہ پریشان ہردیوتے پزہ قرار نیکی ۔ کلہ پت سیماوو تھییے لاکھوم۔ عشق مجاز لش لش کوری حقیقتو ویشکی مہ ژینگیران ۔ کیچہ کہ بو شیکو قطرہ ہون بیتی دریاہہ دویان۔۔۔ بابا سیرو کھوار کڑوم یارمن ہمین و ایکما اشعار۔۔ زومان سورین بغاتم کیہ مہ ژان پیچ قونان موژین بعاتم ۔۔۔ زروخ زروخ کیڑاو بعاتم اشروان مژاو بعاوتم۔۔ تو کہ دریاہ شور شور اوہ مہ ژان تے موژو اوہتونو اوا،، سپوک نظر کہ اریر اللہو پروشٹہ دوسونو اوا۔۔۔ ریشنو بوم رنگ گانی شیر دوستو یاقوت شوناری ، مہ دوست بشار گنیران شران