Wp/khw/اقرارالدین خسرو کھوار کلام
غزل
کاکہ بے خودیو عبث باہ بونیان
میخانو راہار نیسی گمراہ بونیان
موخ کوری دُوروت ہاتو ہوسین بویان
پھوک دوری پھتوکین پھورین زاہ بونیان
عشقِ مجازیہ حقیقیو خوشپ۔۔
غیچ غیچہ توریکو سوم انگاہ بونیان
اقتلو الموذی ریکو ژینگوغ خفا
پھیک بیکو ہیت یی رویوت بلاہ بونیان
بے مَحل محفلہ ہتے بو لو دیاک ۔
قالپتو مشکو مانی دی واہ بونیان
زمانو ہوا تھے تہ پالیکو چق۔
روے مگم مزاجہ سف چیلاہ بونیان
فرنگو تہذیب متے وبالِ جان ۔
مہ قومو معمار ہیسوم تباہ بونیان
مہ کوستے خداے بکو طاقت نکی
کیچہ کوم انسان بیکین گناہ بونیان
وا تہ کیہ اقرارو ضرورت نکی
وخت اوچے حالات تتے گواہ بونیان۔
غزل
تیرو کمان گنی گئے کوری نشان مہ قاتل
مہ ژان تہ سورا نذر تو کہ خوشان مہ قاتل
بیکو نوژان سریران کھلی جہاں مہ قاتل
مہ قتل کا نوکوروۓ کہ ھوۓ انسان مہ قاتل
ھونی یاردوست مہ یغی نو کوم دشمانوت گلہ
بوین مہ شئخچہ گیرو ہرای مہمان مہ قاتل
ھم نشین حورو صلہ ھیہ رقیبو اعزاز
وا دی مکین جنت گر کہ نوژان مہ قاتل
دونی شمشیرو کورمو نوبوۓ کھونگیر ضرورت
چشم نیم باز مہ خوشو لب خنداں مہ قاتل
چشم سیاہ مہ قاتل توغو ادا مہ قاتل
نازک بدن مہ قاتل ژنو دشمن مہ
ای کشمکشو منظر لوڑے خسروو دنئیو
سۓ مہ آرمانن قاتل توغو ارمان مہ قاتل
۔۔۔۔ غزل۔۔۔۔۔
خوشانی دشتہ بویا ؟ عشقہ کیہ سکون دی بویا؟
تہ ستم ران وا زیاد حداری افزوں دی بویا؟
جنونو دشتہ پوشی رنج و غمو ژان کِٹوری
نصیب پسہ تے ہنون مہ غونہ مجنون دی بویا؟
ھنون ای آغو کوری مخُتو پھوکئے ریتاے آرزو
ھسے مہ دِش لا ڑیرا نو سے متے تھُون دی بویا؟
بے ڈھپ سے رویا کہ ھائے بو"ژونان" غیچ سال استالہ
سورا دراوُوکو دی نو ھاروش کورا خون دی بویا؟
کھونگیرو تیغتو اسوم پونہ اژدار زندگی رے
منزِلئے تا توریکو م مہ غونہ ای ژون دی بویا؟
یہ دورا دیوا چاکے گیر چھویو شوائے چوپاکے
کانوتے شونجی پتین کورے ریک موزون دی بویا؟
زہچ رینی شاپیرو یار ملکو سیاستہ ھنون
شیاڑ انصاف ژانیرا ؟ جنگلہ قانون دی بویا؟
چقار لگینی کہ ہوئے ہردیو ایمان اُوتیرا؟
ٹھونگ شلی برارو ژانئے چھترارہ بوسون دی بویا؟
خؔسروے شئیلی لو پراو کار تہ نصیحتو اریت
ٹھاشٹہ اُوغو تھئیکو تہ ھتے پُورون دی بویا؟
غزل.
مس کیہ وت غَربیل چھیتی تھُولخ بویان۔
مہ ہردیو بار بار موژا بخ بویان۔
امید تہ آمدو مہ روز ببہو غون۔
اؤچ ہتے افسہ مہ ادرخ بویان۔
پلمنڈوک نسینین سلامی دیکو۔
ہوبہو جنت مہ خوشو نَخ بویان۔
کیچہ اپک پھت کوری ای لو نو دوس۔
دار تہ اشتکھیکہ مہ زینخ بویان۔
ہردی مہ اُوخوئران می رویان پوشی۔
مشٹہ کھیو بہچوران کدارخ بویان۔
من و سلوا متے مہ ہوستو نغزی۔
شکر ای ٹاٹھوریو سوم کہ شخ بویان۔
دھماکان مہ شہرا کیہ حساب نیکی
کَلکوران مس گویا کہ ای ٹھخ بویان۔
خسرو تے کورمان کوری دنیار بوغے
کیچہ کورکو گور کہ تتے فرخ بویان۔
""غزل""
وصلو افس کہ بُرِد کیہ حاجت ارمان مہ نکی۔
غیرداو کوچہَی تہ گوم چُمراری کیہ ژان مہ نکی۔
تو دیہی سیلو غراضہ بی استام شابوک بیتی۔
لوڑیتم دورا گیتی نوغ ذپو گیروان مہ نکی۔
لاکے تماشہ کورے بوخت بوشاوے مہ کپالہ۔
تو کہ ای دار جاشوسان اوا دی ریم ژان مہ نکی۔
ہنسے دربتہ ریسان چھؤچھو التی شامتو دوسان۔
کیہ بقا زندگیو شیرا کہ خفتان مہ نکی۔
اِسپریم کلہ پت ای بتین شرین چوڑینیو۔
ای غیری یی لوڑے کہ خور وا کیہ ارمان مہ نکی۔
تتے ہردییے ریمان خوشیے وا مہ ژانیے ریمان۔
خور تھک ناتھکیو غونہ شعرو کیہ دیوان مہ نکی۔
دنیا مہ دستاری بیکو متے خسرو ہش سریتاے۔
کیچہ ای دوست مہ نکی یار ای مہربان مہ نیکی۔
"غزل"
مہ دی گلستانو تے افس بویان
گمبوریان چمانوتے افس بویان
ھنون متے ران ای ہردی پھت ہردی
جنتہ خوبانوتے افس بویان۔۔۔۔
تان غیچہ اشروان لُوو کا دویان۔۔
تہ شونہ مسکانو تے افس بویان۔۔۔۔
ای دی مہ دوچھارا کہ گوئے چھوم ہوسی
ای خور امتحانو تے افس بویان۔۔
۔تہ غونہ حوران بچے ژانو نو دوم،
تان چقہ انسانو تے افس بویان۔۔۔۔
سورو چے پہھان توغو بار ای قسمہ،،
ھش ای مہربانو تے افس بویان۔۔۔۔۔۔۔۔۔
شخچہ ای غریبو دی چھوئی بوتی بار۔۔
ای نوغ پاکستانو تے افس بویان۔۔۔۔۔۔۔۔۔
ہردیہ اقرارو کیہ لحاظ دی بار،،،
ھروݰ مسلمانو تے افس بویان
غزل
خوش بے رحمی مہ سورا ھتاری افزوں کوریتائے
مہ پُھک سکونو پلے تھے تانتے سکون کوریتائے
فلک شکست کورویان ای وشکی نصیبو کمی۔۔۔۔۔۔
ادائے ناز ھتوغو ای قسمہ مجنوں کوریتائے
آباد رقیبو گلشن بیکو مہ گمبوریان سورا
فلک عشقو دُقتان مہ گوڑو کھومون کوریتائے
جوشی خنگی ھتوغو تان باغہ ھالئے اسیتام
ھسے مضر فطرت مہ تانتے سامون کوریتائے
وا بُور بُور دیک کیہ اریر چت گیتی دوچھارا ھسے
ادائے دید ھتوغو ہردیو پورون کوریتائے۔۔۔
روئے آبِ حیات جاشونیان ھمو ناشکریو لو،،
کو لئے براغوس کوروسان کیہ گناہ تہ شون کوریتائے
تُو کہ نان بیلیو حوال نو کوم رے رحمو اپیلو
خسرو دی تہ سو وعدہ شوت چھوئی ھنون کوریتائے۔۔
غزل۔
وصلو ارمانو دی ارمان اوچھیتائے
شوایو گون ہتے یادان اوچھیتاے
دوش تان نقشو پوشاوت کوس کہ غیچہ
ہنون کڑبوکی تے غیچھان اوچھیتاے
اوا ہوسی ہنون دونیکی بغات
سلسلہ کھیوتے تہ غمان اوچھیتاے
دیر و حرم کلیسا مہ کراچینیان
رشتہ خلوصو تے نعمان اوچھیتاے
یرا نمرودو خدائیو لو ہوئے
یرا انسانو سار انسان اوچھیتاے
احساس کہ ٹھوخی پرائے فکرو گورزینہ
رشتہ تو ہش جوشے رویان اوچھیتاے
اوا تہ ویدو مقدس جوشیتام
کو تہ مندرا مہ فرقان اوچھیتاے
نو ہوئے شاگہتو کیہ آبرو خم آخر
ہوستہ استاذو شیرو بان اوچھیتاے
ہوئے مہ خیال پھتوکی تہ برکشہ
تہ فاعلات گیکو عنوان اوچھیتاے
خسرو جنونو دنیا ہش دی وخت ھائے
خومیتائے مہ سورو آسمان اوچھیتاے ۔۔۔۔۔۔۔۔۔۔۔۔۔۔۔۔۔۔۔۔۔۔۔
غزل
بو آھ شینی بو غم شینی عشفو می ستم خور
غضب متے اے جان من تہ نظر کرم خور،
ھے موج تلاطمو سو اشٹوک مو کورے تو
اۓ ناخداۓ عشق مہ امیدو سنگم خور،
کیہ کم اوشونی ہردیہ خواہش ھیہ دنیو
ارمانو مسکن گاھہ ہوۓ آرزوو جنم خور،
عشقو کھمینہ جنونو لذت اوتیکو سوم،
مجنون ریتاے واعظوتے مہ باغ ارم خور،
عشقو ھتے مندرا مہ سجدا ہونی بے سود،
محرومو ماتم بش متے ہمراز صنم خور،
مہ پھانہ ای قسمتو یہ لکیر متے ریران،
نیویشی شیر ازالہ تان کاتبو قلم خور،
عشقو ھیہ بازیاری کیہ سود تتے خسرو،
حیاتو بیلک بیش تہ سوم ہردیو ماتم خور،
غزل
شبِ تاریکو سوم نسبت چوڑینیو
کیچہ تب گیر ہمیش قسمت چوڑینیو
صبا تہ شوت لا ہے ٹمبو کیو نامہ
دلاسہ دیت کہ ہردی پھت چوڑینیو
نظر رحمو مہ ویشکی کو نو بویان
کو نو لاڑیران ای دربت چوڑینیو
تہ سوم ہردی چکیے کیہ ہاز اریتم
پرونہ اوغ ہونی محنت چوڑینیو
نظر خودکش بیتی نس نس کوریکو
نسان چاپیم کورا نس پھت چوڑینیو
مہ اللہ کوس یرا محتاج نو کورے
ہوالوت چت کویان غربت چوڑینیو
بو شرمندہ تہ سر مشکیکو نو ہوے
ہیہ خسرو کوری غفلت چوڑینیو
(بحر, ہزج مسدس متصور )