Wp/kek/Qawa’ Ch’ux Teni’

Najter chaq kutank numtajenaq chaq li k’iche’, numtajenaqeb’ chaq li xul, toj maak’a’eb’ chaq jwal li k’aleb’aal, ab’an sa’ xtikib’ankileb’ chaq rib’eb’ li k’aleb’aal xsutam Salacuim nayeemank re anaqwank xteepal Kob’an, maare sa’ chaq li hab’ Lajeeb’ xb’eleelajuk’aal ro’ o’q’ob’ toj sa’ O’laju xb’eleelajuk’aal ro’ o’q’ob’, wankeb’ jun siir li poyanam ke’koheb’ chi yohob’k rocb’eeneb’ li xtz’i’, ke’rab’i naq li tz’i’ kixtaw li xul, ke’ok chi aanilak ab’anan sa’ xch’ooleb’ aj wi’ laj eechal re, naq xul li kixtaw, kixaqliik chi ruheb’ toj reetal naq ke’xtaw rib’eb’ rochb’een laj yo, aran ut ke’sach xch’ool chi rilb’al, naq jun li winq xaqxook chi xk’atq li pek ut eb’ li tz’i’ yookeb’ chi xwoob’al.

Ke’ok chi raatinankil, naxnaw li Q’eqchi’ ut eb’ laj yo ke’xk’am chaq sa’ li rochocheb’, naq kik’ulunk ke’xpatz’ re, ani li xk’ab’a’ ut kixye naq a’an aj Ch’ux xk’ab’a’ ut li xq’oot xk’ab’a’ a’an aj Teni’, jo’kan ut naq aj Ch’ux Teni’ nake’xye re.

Ke’xk’e reetal naq laj Ch’ux Teni’, wank aj wi’ li xjalanil chi ru yalaq ani, jwal kaw rib’, nawulak chi ru li xson li tusb’il che’wajb’, jwal kaw nab’eek ut ke’xkanab’ cho’q jun aj to’, aj taql re li junkab’al, nake’xtaqla chi xb’aanunkil li xtaqlankil sa’ li tenamit kob’an, li b’eek chaq sa’ li hoonal a’an waqib’ kutan nak’eemank re chi oqej, toj maak’a’ chaq li b’eeleb’aal ch’iich’, ab’anan laj Ch’ux Teni’ jwal junpaat naxb’aanu chaq li taqlaak, wank naq jun waral aj wi’ nasachk ak xsuq’iik wi’chik sa’ ochoch.

Naxye naq naxnaw li tz’iib’ak, ilok ru hu ab’anan maawa’ jo’ li tz’iib’ nanawmak ru anaqwank, jo’kan naq eb’ li nake’xnaw chaq tz’iib’ak sa’ li hoonal a’an, ink’a’ nake’xtaw ru k’a’ ru naxtz’iib’a, ka’aj wi’ a’an natawok ru jo’kan naq nake’xye naq a’an li tz’iib’ maay naroksi.

Li poyanam a’in najt kiwank cho’q taql, ab’anan jun reheb’ li hoonal naq ke’xtaqla sa’ li tenamit kob’an xkanab’ankil jun li iiq, aran ink’a’ kinawmank k’a’ ru li kixk’ul, xb’aan naq yal xjunes naq naxik ink’a’ naraj                                                                                                                            rochb’een b’ar naxik, ab’anan sa’ li hoonal a’an yookeb’ laj yiib’om q’a, re jun li nimha’ ut wank nake’yehok re naq aran ke’roksi cho’q re xxaqab’ankil li q’a ut ink’a’ chik kinawmank resilal toj chalen anaqwank.

Li seeraq’ a’in naxk’utb’esi chi qu naq li qaxe’ qatoon xe’wank aj wi’ chaq xnimal xsasal li xnawomeb’, cham tz’aqal ru chi us li xnawomeb’, ut moko naruuk ta naq tqatz’eqtaana, tentook b’an xtz’ilb’al rix li aatin a’in jo’ li ch’ol winq, a’aneb’ qaxe’ qatoon, moko naruuk ta naq te’qaxiwa ru, naruuk naqataw li rawimqeb’ sa’ li k’iche’ jo’ li kakaw, wank chaq sa’ junaq li xnimal k’iche’, ch’olch’ook naq aran xe’wank li qaxe’ qatoon, a’an li rawimqeb’ li xe’xkanab’ aran.

Qawa' chin

A’in moko yalaq ani ta li naseeraq’ink re, moko yalaq joq’e ta naruuk xseeraq’inkil, xb’aan naq eb’ li saaj anaqwank ink’a’ chik nake’xpaab’, ink’a’ chik nake’xk’e xloq’al jo’kan naq nawank xseeraq’inkil rik’ineb’ li cheek, sa’ junaq li komonil k’anjel, ch’utam chi rix li qanawom, xb’aan naq wank tz’aqal xyaalal.