Wp/kek/Li loq’laj awk ixim.
Li awk a’an jun li loq’laj k’anjel cho’q qe laa’o laj Q’eqchi’ xb’aan naq laa’o ralal laj mayab’ ut tentook xtzolb’al chi us re naq ink’a’ t-uxmanq xmajewankil li chaab’il na’leb’ ke’xkanab’ chaq qe li qaxe’ qatoon.
Li k’alek a’an na’uxmank xb’een wa chi ru li awk.
Naq eb’ li poyanam xe’xk’uub’ li awk xb’een wa nake’xik xpatz’b’al rokeb’aaleb’ sa’ li loq’laj tzuul taq’a re naq te’xyoob’ li xk’alenkil li xna’ajeb’ ut re aj wi’ naq maak’a’ texk’ul sa’ li xk’anjeleb’ ut re aj wi’ li rosob’tesinkileb’ li xk’anjelob’aal ch’iich’.
Chi rix li k’alek nake’rixima li iyaj.
Naq ak xruuk chaq li xna’aj neke’ok riximankil li iyaj re rilb’al naq maak’a’ reek’ li ixim li te’raw ut naq neke’xyoob’ xb’aanunkil a’an, eb’ li junkab’al tentook naq te’roxloq’i rib’eb’ ink’a’ chik nawank li xkanab’ankil li xeel ka’aq re ru.
Naq ak xyaalo’k li iyaj nawank li awk.
Naq ak xyaalo’k li iyaj nake’xsik’ jun wi’ chik li cheekel poyanam re naxik chi tijok sa’ li tzuul re xb’anyoxinkil li rokeb’aal, re xb’aanunkil naxk’am li pom li uutz’u’uj ut li kanteel li naroksi sa’ li mayejak.
Chi rix a’an naq ak xyaalo’k li iyaj laj eechal awk na’ok xk’ajb’ankil li iyaj naxk’e li iyaj chi ru li xna’aj Qaawa’ sa’ junaq koxtal ut maraj li chakach, ut li qana’chin naxk’e li saqi ya’al kaxlan ut li rax kakaw ut li qawa’chin naxk’e oxib’aq li k’ib’ chi sa’ ut wank nak’ehok re osob’tesinb’il ha’ ut li b’oj aj wi’ ut oxib’ q’oqyink nawank laj eechal awk chi xk’atq li riyaj aran naxhel junaq li xpoop re xwarib’ ab’anan ink’a’ nawark xb’aan naq junqpaatil yook xk’eeb’al li pom naq nawulak xkutankil li awk laj eechal re naxik xchapb’al li rawimj toj kaahib’ hoonal re q’ela naxk’am li rixim, junaq li xukup, li rax kakaw, li ruutz’u’uj ut li rawleb’ aran narosob’tesi chaq li xna’aj chi ru a’in. Ut naraw chaq wuqub’ toon li rixim, chi rix a’an nasutq’iik chaq xk’amb’aleb’ li xmoos.
Naq ak xhik’e’k ru li kutank yookeb’ chi ch’utqiik li moos ut nawulak waqib’ hoonal laj eechal awk naxjek’i li iyaj xb’aan naq laj eechal re nab’aanunk chi rix a’an nake’k’ehe’k li rawleb’ xb’aan naq ak xe’xk’ajb’a chikan, chi rix a’an nake’xik laj awineleb’.
Ut li nake’kanaak sa’ li ochoch ink’a’ naruuk nake’mesub’k ut ink’a’ aj wi’ naruuk nake’xtz’ap li ochoch xb’aan naq aran naruuk nake’risi xmuhel li ixim.
Chi rix a’in naq ak xe’sutq’iik chaq laj awinel nake’k’ehe’k chi hilank re naq te’wa’aq ab’an xb’een wa nake’k’ehe’k chi wa’ak li tz’i’ chi rix a’an li kok’al toja’ naq laj awineleb’. Naq ak xnume’k li jun xamaan nawank li ka’ aawenk, a’an naq wank iyaj ink’a’ namoqk ut na’uxmank xk’eeb’al xka’sutil li ixim ut aran naraqe’k li awk.