Wp/kek/Li Paab'ank
Sa’ xyanqileb’ laj Q’eqchi’ li paab’ank k’iila paay ru na’elk, qilaq kiib’ oxib’aq:
Paab’ank sa’ li komon k’anjel: a’an xb’aanunkil junaq k’anjel li nake’xxaqab sa’ xb’een junaq li komon. Wank xloq’al li k’anjelak chi ruheb’ li komon, jok’an naq xik’ ilb’ileb’ laj q’em malaj aj sub’ul kutank. Sa’ li junjunq chi teep malaj k’aleb’aal na’uxmank li xnumsinkil resilal Junaq li k’anjel re Junaq poyanam malaj re komonil. Tento sa’ xb’een li poyanam xpaab’ankil li b’oqe’k malaj li taqlaak xb’aaneb laj k’amol b’e re junaq k’anjel ch’olch’ook ru ut usilal cho’q reheb’ li komon malaj re uxtaanank u.
Paab’ank chi ruheb’ na’b’ej yuwa’b’ej: re naq taawanq li sahil wank cho’q reheb’ li alalb’ej, tento naq t-uxmanq xpaab’ankil li raatineb’ xna’ xyuwa’.
Naq ink’a’ na’uxmank xpaab’ankil raatineb’ li qana’ qayuwa’, ra nake’reek’a ut moqon naru nakoohe’xq’oqo. Li xq’oq junaq li na’b’ej yuwa’b’ej, ra xtojb’al rix, li taqlank ut li taqlaak tento naq t-uxmanq sa’ tuqtuukilal ut sa’ sahil ch’oolejil re twanq li sahil wank.
Li paab’ank sa’ junaq li paab’aal. Laj Q’eqchi’ jo’ xcha’aleb’ li tenamit aj mayab’ jwal aj paab’aaneleb’. Jo’kan naq ch’olch’o chi ruheb’ xk’eeb’al xloq’al li teneb’anb’il sa’ xb’eeneb’; a’in na’ilmank naq li komon nake’xik sa’ rochochil li paab’aal, sa’ Junaq chinamil, sa’ Junaq xb’eenil ermiit, malaj li xik sa’ Junaq li tz’uultaq’a.
Li qas qiitz’in nake’jolomink sa’ junaq li paab’aal, toj sik’b’ileb’ ru xb’aan li cheek ut li komonil, a’yaal naxye li xyehom xb’aanuhom ut li xpohol xchahimal.
Junaq aj jolominel malaj aj k’amol b’e tento tk’e chi ru ut troxloq’i li jalanjalanq chi paab’aal natawmank sa’ li xteepalil, re naq sa’ li na’ajej a’an twanq li sahil wank.