Wp/kea/Spanha

Bandera di Spanha

Lukalizason di Spanha

Spanha, ofisialmenti Renu di Spanha, é un país di Orópa Miridional lukalizóde na Pinínsula Ibériku. Si tiritóri tánbi ta nklui Ilias Kanária, na kósta di Áfrika, Ilias Baliariku, na Mar Mediteráni, txeu pikénus ilia na Mar d'Alburan, i dos nklavis afrikanu, Seuta ma Melilia, u-ki fase-l úniku país oropeu ki tene un frontera tiréstri ku un país di Áfrika (Marokus). Spanha kontinental é limitóde pa Mar Mediteráni na si bandas sul ku lésti — isétu na un pikénu frontera ku Jibraltar; pa Fransa, Andora i Golfu di Biskaia na nórti i na nordésti; pa Purtugal ma Osian Atlántike na oésti i noruésti.

Ku un ária di 505 990 kilómetrus kodradu, Spanha é más grandi país di Orópa Miridional, sugundu más grandi di Orópa Osidental i di Union Oropeu (UO), i kuartu más grandi kantu kunsideróde kontinenti oropeu na si nteréza. El é séstu país más pupulozu di Orópa i kuartu di UO. Si kapital i sidadi más grandi é Madri; otu grandi árias urbanu ta nklui Barselóna, Balénsia, Sevidja, Málaga, Bilbau ma Granada.

Umanus mudérnu txiga pa purmeru bes na Pinínsula Ibériku sérka di 35 mil anus atrás. Kulturas ibériku, djuntu ku pobuamentus antigu di finísis, gregus, seltas ma kartajinezis, dizinvolvi na es pisínsula ti inísi di dumíni rumanu na rudói di 200 a.K., kantu el rasebe nómi di Spánia.