Wp/kea/Alimanha

Alimanha, ofisialmenti Rapúblika Fideral di Alimanha, é un país di Orópa Osidental. El sta limitadu, na si banda nórti, pa Mar di Nórti, Dinamarka ma Mar Báltiku; na lésti, pa Pulónia i Txeska; na sul, pa Ostria i Suísa; na oésti, pa Fransa, Luxenburgu, Béljika ma País Baxu. Si tiritóri konprende 357 021 kilómetrus kodradu i é nfluensiadu pa un klima tenperadu sazonal. Na 31 di dizénbru di 2015, es país teneba 82,8 milion di abitantis, u-ki fase-l país di Union Oropeu ku más grandi pupulason, i tánbi país ki ta sirbi di murada pa tirseru maiór pupulason di migrantis na mundu.

Un rijon txumadu Jermánia, abitadu pa munti pobus jermániku, foi kunxedu i dukumentadu pa rumanus désdi antis di anu 100. Dipos di séklu X, tudu tiritóriu alimon forma parti sentral di Sakru Npéri Rumanu-Jermániku, ki dura ti 1806. Na séklu XVI, nórti di Alimanha bira episéntru di Rafórma Prutestanti. Suma un mudérnu Stadu-nason, es país foi unifikadu pa purmeru bes na anu 1871, konsakuénsa di Géra Franku-Prusianu. Na 1949, dipos si Sugundu Grandi Géra, Alimanha foi rapartidu in dos stadus: Alimanha Osidental, ofisialmenti Rapúblika Fideral di Alimanha, i Alimanha Oriental, ofisialmenti Rapúblika Dimukrátiku Aliman, na paralélus di linhas di okupason di Aliadus. Apénas na 1990 okóre sugundu raunifikason di Alimanha.

Alimanha Osidental foi ménbru fundador di Kuminidadi Oropeu, na 1957, ki dispos bin bira Union Oropeu, na 1993.