Wp/kac/JINGHPAW HTE MĂLUT SHAGYI HTUNGHKING

Malut shagyi htunghking,

     

           Moi prat nah buga nga mungchying sha shăgu ngu na wa,mălut shagyi shah shăjang ma ai.Mălut măya ai gaw alai akyang lăngai mi zawn re.Asak aprat ram sai ni yawng gaw,shagyi măya yang sha măsha pang shang ai zawn,prat lep ai zawn rai nga ai.Bumgah măsha ni aq sha chyalup chyai ai shahpa amyu mi zawn mung rai nga ai.

         Moi nga sa mădang nawq nem nga ai măsha ni gaw, tinang aq hkum hkamja san seng lam ni nchye gălaw shăjang ma ai.Tinang aq n~gup, wa ni hpe htuh arut kăshin na mung nchye gălaw ma ai.Dai măjaw, wa măchyiq,wa atung use sha ai ana byin chye nga ai.Dai shăloi, mălut  măya jang,ma~um jang,wa măchyiq mai ai,hkyam sa ai,wa use se ai hpe măkawp măga lu ai, ngu sawn lah shăjang ma ai.

         Jinghpaw Wunpawng sha ni mung , moi prat kaw nnah mălut maya ai lai hpe lang wa maq ai.Găra ten dăram kawq nnah,gădai ni kawq nnah len lah ,Shah lang wa ai,ngu ai hpe gaw atsawm  nchye lu nga ai.lăngai hte lăngai hkrum  shăchyen shăga hkat ai shăloi,tinang gun ai mălut hpajet shawq ya, mănang wa gun ai mălut yep hpawq măya nnah tsun shăga chye maq ai.Măhkawn shăbrang mi hkrum hkrum mălut hpajet yaman gălai măya chye nga ma ai.

         Jinghpaw bumga e shah ai malut shagyi gaw,Myen,Sam,Gala ni shah ai mălut shăgyi hte nbung nga ai.Myen ,Sam ,kăga amyu ni shah ai mălut shăgyi htaq,Bulap, Gawngze si ni bang lang măya maq ai.Grau nnah Gala ni sha ai mălut shagyi htaq ,alak mi gălaw dik dah ai mălut tărin tawng ni,mănam pyaw hpa ni,maknyinnyang si,n~gau pawt e si ai baw n~gau si (Hpala tum)ni bang jăhkum nnah adwi asau, mănam ngawn ai hku măya ma ai.

         Jinghpaw Wunpawng sha ni aq mălut shăgyi gaw; mălut ,shagyi,binglang,namhtun re ai ni sha bang nnah măya ma ai.Ndai ni hpe tinang raq ai dăram măhtiq dawq ,gangje jahkum shah ai lai sha re.Dai ni yawng jăhkum shah ai shăloi ,măyen gaw ahkyengh rai grai htap ai sha pru nga ai.

         Lahtaq e tsun lai wa sai mălut,shagyi ni hpe hpajet htaq jăhkumh bang gun chye ma ai.Nkau mi gaw;yep san lah nnah yep hta jăhkumh bang gun chye maq ai.Moi nah ni yawng htē ngu na wa,malut hpajet (shnr)mălut yep gun ra ra rai maq ai.

         Lăngai hte lăngai hkrum shăga hkat ai shăloi, hkuq hkau chye hkat nga sai wa hte rai rai,garai nhkuq hkau ,nchye hkat ai chyăsam wa hte rai rai ,hkrum ai hte rau,mălut hpajet shawq ,tinang aq mănang wa hpe ya,mănang wa aq tinang lah nnah shawq măya let shădaq shăchyen shăga chyai maq ai.Garai nchye ai chyăsam hte hkrum jang,La kăsha shădaq rai yang ''Hkau",num shădaq rai yang ``Ning" nga nnah ,``hkau gaw kădai bawq rai(shnr)hpa bawq amyu rai,"ngu shădaq daq san shăchyen hkat maq ai.

         `` Ngai gaw Marip wa re(shnr) Maran wa re ,"ngu tsun dan ra ai.San ai wa mung ``Ngai gaw Lahpai wa (shnr)Nhkum wa rai nngai,"ngu tsun dan ra ai.Ningrai chye ai shăloi,tinang kăjan ni dung ai amyu rai jang,Dama wa;tinang lah ai amyu rai jang gaw,Mayu wa;Amyu shădaq bung ai rai jang ,Kăhpu Kănau ngu măsat shăga mat wa ra nga ai.

         Măhkawn shăbrang shădaq shăchyen shăga hkat ra wa jang mung ,tinang lah ang ai bawq amyu ang jang ,``Gănam ni sheq rai nga ai,Gu ngu rit yaw,"ngu shăchyen lah ra ai.Tinang ni jawq ya ai bawq amyu rai jang,``Kăhkri she rai nga ai,Tsa ngu rit yaw,"ngu ra nga ai.Ndai gaw moi prat kawq nnah hkanh sa nga ai Jinghpaw  Wunpawng htunghking ningli kăja nan rai nga ai.

         Hkuq hkau chye hkat chyălu ni hte hkrum shăga ang tim, mălut hpajet gălai măya hkat nga ai.N shăchyen hkat ra sai măjaw,bungli bungsi hte seng ai san hkat ma ai.Nai mam găde lu ai lam,ri daq măka lam re ai ni,Yi găra deq hkyen na lam ni san hkat jăhta chye maq ai.

         Ningrai mălut shagyi n~gup mi gălai măya let shăchyen shăga ai gaw ,Amyu sai daw jinghku măjing zawn hkuq hkau mat wa nga ai.Dai măjaw Sam mung deq nah Jinghpaw htunghking hpe chye ya ai, Sam ni gaw, ``Hkang hki yau",Jinghpaw Amyu gălu ni ,ngu tsun shăjang nga maq ai .

         Wunpawng Jinghpaw Sha ni aq mălut shagyi htunghking aq,Simăni ai lai lăngai hpe na ga ai.Hpyen shădaq rai tim pyi, nmyit măda ai shăra htaq, nmyit măda ai hkrum hkat yang, mălut hpajet nawq gălai shah hkat maq ai daq.Dai ten htaq gaw ,shăwoi nah hku nrai;nhtu ntsa mălut hpajet măraq nnah gălai shah hkat ma ai daq.Dai gaw găde wa laklai dik ai mălut shagyi htung lai re,ngu ai hpe chye lu nga ai.

         Ndai mălut hpajet(mălut yep)hpe lăngai hkrai gun n nah,  lăngai hkrai gălai sha hkat ai nrai.Poi shingra ni htaq mung lang nga ai.Poi shingra htaq rai yang,mălut shagyi ni hpe Kaqhtang htaq jăhkum bang nnah tawn jawq maq ai.Hkungran poi ē mung lang nga ai; măkoi măyang poi ē mung lang nga ai.Kăga poi shingra ni htaq mung lang nga maq ai.Dai rē măjaw,poi shingra shăgu htaq nlawm nmai re ai shăwa lang ,mănam hkălum ai arai lăngai hku lang shăjang nga maq ai.

         Moi shawng deq mălut hpajet gălai let shăchyen shăga maq ai.Jinghku shăchyen maq ai.Dai hpang,Hpunau daw yang hpunau măjing zawn,hkuq hkau mat nga ai.Dai rai n nah moi gălang mi nah aten htaq Jimghpaw sha ni yawng ,mălut hpajet ,mălut yep gun ai arawn alai nga lai wa sai.Wunpawng Jinghpaw htunghking gaw,ndai aten du hkra rai tim ,shăra nkau mi htaq nawq matut lang nga maq ai hpe mu lu nga ai law.

Reference:  Hpaji Ginra (Htunghking Maka)

    Ndai ka ngau gaw Hpaji Ginra (Htunghking Maka) ngu ai Laika buk kawq nah`` Malut Shagyi Htinghking "ngu ai ka ngau re. Laika ka ai wa(Ka ngau mădu )hpe hkungga let!