Wp/jax/Ratumas Sina

Ratumas Sina adolah pejuang cewek dari Jambi yang berusaha mempertahankan tanah Jambi dari Belando. Walaupun cewek, Ratumas Sina iko merupokan pejuang yang ditakuti samo Belando, bahkan diusianyo yang masih kecik. Dirinyo merupokan anak sikok-sikoknyo pasangan Datuk Raden Nonot dari suku Kraton dan jugo Ratumas Milis binti Pangeran Mat Jasir.

Latar Belakang

Ratumas Sina merupokan seorang cewek yang lahir di Kampung Pudak, Kumpeh, Muaro Jambi pado tahun 1887. Dirinyo merupakan anak sikok-sikoknyo dari Datuk Raden Nonot dan jugo Ratumas Milis. Diketahui kalau Ratumas Sina ko merupokan saudaro sepupu Ratumas Zainab.

Kehidupan Ratumas Sina idaklah mudah. Dirinyo dibesakin di area perkebunan Paal VIII yang ado di belakang Kampung Pudak. Idak itu bae, dio pun dinikahin samo seorang cucu Pangeran Poespo yang merupokan kerabat maknyo yang menjadi rajo di Merangin, Permas Kadipan. Ketiko menikah, umur Ratumas Sina baru masuk 13 tahun, tapi itu bukan masalah bagi dirinyo.

Perjuangan

Walaupun Ratumas Sina udah nikah sejak dio berumur 13 tahun, itu bukanlah alasan untuk menjadikan dirinyo sekedar ibu rumah tangga biaso. Bahkan dirinyo pun ikut samo suami dan pamannyo yang benamo Pangeran Haji Umar untuk menyerang Belando. Pamannyo merupokan Wakil Panglima Perang wilayah Merangin yang ditakuti samo Belando. Pangeran Haji Umar ko terkenal karena taktik-taktiknyo menyerang Belando, salah satunyo adolah dengan nyerang di malam hari. Bahkan kelompok pejuang iko begerak secaro dinamis di dalam hutan belantara dari Merangin sampe ke arah ulu Muaro Tebo.

Di tahun 1902, suami Ratumas Sina gugur dan sebuah serangan markas tentaro Belando yang adi di Sungai Alai. Karno berhasil menggugurkan suaminyo, pihak Belando pun menyikso mayat tesebut dengan siksoan yang pedih. Diketahui kalau keduo tangan mayat tesebut dipaku di sebatang kayu dan jugo kulit kepalonyo dikocek dan diletakin di haluan kapal. Idak itu be, kulit kepalonyo pun dipertontonkan ke khalayak ramai. Hinggo saat iko dak ado yang tau berapo lamo mayat suami Ratumas Sina tu disikso dan dimano mayatnyo dibuang atau dikuburin.

Karno hal yang biadab tesebot, Ratumas Sina dan Pangeran Haji Umar pun emosi dan naek pitam. Dio besamo Pangeran Haji Umar, Pangeran Seman Jayanegara dan jugo Pangeran Diponegoro mulai mengatur strategi buat nyerang Belando lagi. Mereka menyerang markas-markas penting Belando yang ado di beberapo tempat kayak Ulu Tebo, Muaro Bungo dan sampe ke Merangin.

Wafat

Ratumas Sina diketahui meninggal di usia 80 tahun di Muaro Bungo.