Wp/jax/Raden Mattaher
Raden Mattaher lahir dengan namo Raden Mohammad Tahir (lahir di Sikamis, Jambi, tahun 1807) merupokan putra dari Pangeran Kusin dan jugo Ratumas Esa (Ratu Mas Tija).[1][2] Raden Mattaher merupokan pejuang kemerdekaan Indonesia dan jugo sebagai Pahlawan Nasional Indonesia.[3]
Latar belakang
[edit | edit source]Raden Mattaher merupokan seorang anak yang lahir dari pasangan yang bekuaso di Sikamis (sekarang namonyo Desa Kasang Melintang), Kecamatan Air Hitam, Kabupaten Sarolangun, Jambi. Ayahnyo merupokan Raden Kusin yang begelar Pangeran Jayoningrat bin Pangeran Adi bin Sultan Mochammad Fachrudin. Sedangkan maknyo adolah Ratumas Esa (Tija) yang lahir di Mentawak, Air Hitam Pauh. Dulunyo daerah tesebot adolah daerah kuaso Tumenggung Merah Mato. Raden Mattaher jugo merupokan cucu dari Sultan Thaha Syaifuddin yang jugo pahlawan nasional.[4]
Mattaher silsilahnyo adolah Raden Mattaher bin Raden Kusin dengan gelar Pangeran Jayoningrat bin Pangeran Adi bin Raden Mochamad gelar Sultan Mochammad Fachruddin. Dio adolah cucu dari Sultan Thaha Saifuddin yang merupokan salah sekok Pahlawan Nasional. Hubungannyo datuk dari Raden Mattaher yang benamo Pangeran Adi adolah sodaro kandung dari Sultan Thaha Saifuddin.[5]
Perjuangan
[edit | edit source]Raden Mattaher lebih dikenal pulak sebagai seorang panglimo perang, dio lah begabung dengan laskar perjuangan di usia muda. Dio jadi panglimo menggantikan bapaknyo Raden Kusen yang meninggal dunio waktu menunaikan naek haji. Selamo jadi panglimo, dio lah mimpin perjuangan rakyat Jambi melawan Belando. Raden Mattaher setidaknyo lah mimpin sembilan ekok pertempuran lawan Belando. Sepanjang hidupnyo sampai meninggal, Raden Mattaher idup dalam perjuangan melawan Belandao, bahkan lebih banyak idup dalam pelarian sehinggo jarang bekumpul samo keluargo.[5]
Raden Mattaher dikenal dengan namo Singo Kumpeh karno kemampuan diok ngadepin penjajah yaitu Belando. Pado maso itu, Raden Mattaher panglimo yang paling ditakoti samo Belando karno banyaknyo taktik gerilya yang dio punyo untuk ngelawan pasukan Belando. Waktu dio betugas sebagai panglimo perang, diok ngebentuk kantong-kantong dan jugo barisan pertahanan dan perlawanan dari Tembesi sampe Muaro Kumpeh. Fokusnyo adolah nyerang kapal perang Belando yang berisi personil, obat medis dan amunisi yang mau masok ke Jambi lewat sungai.[1]
Di tahun 1885, Raden Mattaher samo Sultan Thaha berhasil nenggelamin kapal perang Belando yang ado di Sungai Kumpeh Muaro Jambi. Tapi ini bukan perang yang besak, perang besaknyo dari tahun 1890 sampe 1906, dan ini merupokan perang paling lamo tehadap Belando. Akhirnyo Raden Mattaher berhasil ngalahin Belando dan daerah yang dilawan adolah Sarolangun, Merangin, Bungo, Muaro Jambi, Kumpeh, Pematang Lumut, Merlung, dan Muaro Tembesi.[1]
Di awal taun 1900, Raden Mattaher besamo Pangeran Maaji di Tanjung Penyaringan melakukan penyerangan terhadap konvoi 8 jukung Belando yang ditarik samo kapal Musi. Kapal Musi samo jukung Belando ko bawak senjato, perlengkapan perang, samo bekal, untuk dibawak dari Muaro Tembesi ke Sarolangun. Pesenjataan ko diperuntukkan Belando untuk membantu militer Belando yang lagi betempur di benteng Tanjung Gagak. Pasukan Raden Mattaher samo Pangeran Karto serto Panglimo Tudak Alam dari Mentawak nyerang iringan jukung samo kapal Musi Belando. Semuo serdadu Belando mati tebunuh dan semuo senjato berhasil dirampas.[5]
Pado pertengahan April 1901 pasukan Raden Mattaher, Raden Pamuk samo Raden Perang begerak/nyerang Pos Pasukan Belando di Banyu Lincir (Bayung Lincir). Kepalo Bea Cukai samo pengawalnyo mati tebunuh. Banyak senjato pendek Belando biso dirampas. Pado penyerangan tu duit sebesak5.000 gulden samo 30.000 ringgit cap tongkat di dalam brangkas punyo perusahaan minyak berhasil dirampas pasukan Raden Mattaher. Peti kas baja beisi duit tu dibawak samo pasukan Suku Anak Dalam Pimpinan Raden Perang ke Bahar bis tu dibongkar. Dalam penyerangan tu sekok orang pasukan Raden Mat Tahir tewas dan 3 orang luko-luko.[5]
Di taun 1901 yang samo, pasukan Raden Mattaher melakukan penyerangan lagi ke pasukan Belando di Sungai Bengkal. Pasukan Raden Mattaher banyak merampas senjato Belando dan karaben. Dari Sungai Bengkal pasukan Raden Mattaher dibantu pasukan Raden Usman dan Puspo Ali terus begerak menyerang Belando di Merlung. Dari Merlung pasukan Raden Mattaher terus begerak ke Labuhan Dagang, Tungkal Ulu. Dari Tungkal Ulu pasukan Raden Mattaher besamo 40 orang pasukannyo lewat Pematang Lumut begerak ke Sengeti, bis tu ke Pijoan. Di Pijoan bivak Belando diserang, pasukan Raden Mattaher banyak dapek senjato kerabin.[5]
Pado taun 1902 Pasukan Raden Mattaher di Tanjung Gedang Sungai Alai melakukan penyerangan ke 30 ekok perahu jukung berisi serdadu Belando. Perahu jukung ko behasil ditenggelamkan dan semua serdadu Belando mati tebunuh.[5]
Seabis Sultan Thaha Saifuddin gugur pado tanggal 23 April 1904, perlawanan terus ditingkatkan dimano-mano, Raden Mattahir di bagian Ilir Jambi, dan Umar dibagian Ulu. Mattaher beserto panglimo-panglimo yang laen terus-menerus disano, ada kesempatan yang bagus, nyerbu, ngadang, samo nyergap patroli-patroli Belando di mano bae dalam daerah hukumnyo, daerah teriteorial yang telah dtetapkan Sultan samo dio.[5]
Kematian
[edit | edit source]
Perjuangan Raden Mattaher berakhir pado 10 September 1907. Dio ditembak mati di rumahnyo dewek pado sebuah operasi militer Belando.[6] Seabis tau Raden Mattaher mati tebunuh pasukan Belando langsung bawak mayat Mattaher ke Kota Jambi pakek kapal. Atas permintaan para pemuko agamo, maka Raden Mattaher dimakamkan secaro Islam[5] di pemakaman rajo-rajo Jambi di tepi Danau Sipin Kota Jambi. Selain tu jari kelingking Mattaher jugo dimakamkan di sebuah desa di Muaro Jambi.[6]
Masih ado lobang bekas tembakan peluru pado tiang-tiang kayu rumah. Rumah tu berukuran 6 x 12 meter pesegi, berado sekitar 30 meter dari lokasi Candi Astano komplek percandian Muaro Jambi. Pado peristiwa tembak-menebak di Muaro Jambi tu selain Raden Mattaher, gugur pulak Raden Pamuk samo sekok pengawal bernamo Gabuk. Keduonyo tewas ditembus timah panas serdadu Belando.[5]
Penghargoan
[edit | edit source]Namo besak Raden Mattaher diabadikan jadi namo Rumah Sakit Umum Daerah (RSUD) Provinsi Jambi[7], beberapo namo jalan, namo lapangan tembak dan namo yayasan di Kota Jambi.
Pado tanggal 10 November 2020, Raden Mattaher dianugerahi gelar pahlawan nasional samo Presiden Republik Indonesia ke-7, Joko Widodo.[8]
Daftar Pustako
[edit | edit source]- 1 2 3 Verelladevanka Adryamarthanino (31 Juli 2021). "Raden Mattaher: Asal Usul dan Perjuangannya". Kompas.com. Diakses pado 21 November 2021.
- ↑ Fitria Chusna Farisa (10 November 2020). "Raden Mattaher, Panglima Perang Jambi yang Jadi Pahlawan Nasional". Kompas.com. Diakses pado 21 November 2021.
- ↑ CNN Indonesia. Raden Mattaher, Panglima Andalan Jambi Melawan Kolonial. Diakses pada 21 November 2021.
- ↑ Gresi Plasmanto (10 November 2020). "Sosok Raden Mattaher, Ahli Strategi Perang Asal Jambi yang Ditakuti Belanda". liputan6.com. Diakses pado 21 November 2021.
- 1 2 3 4 5 6 7 8 9 Hidayat, Rahmat; Nurhidayat, Muhammad; Laila, Alfon Vekoli (2022). Pandak Tarikh Kesatria Jambi (KH. Muhammad Daud Arif & Raden Mattaher). Indramayu: Penerbit Adab. ISBN 9786235314686.
- 1 2 Liputan6.com (2019-11-08). "Jejak Raden Mattaher, Singo Kumpeh yang Bikin Penjajah Belanda Ciut". liputan6.com. Diakses tanggal 2025-04-03.
- ↑ "RS Raden Mattaher". www.rs-mattaher.com. Diakses tanggal 2025-04-05.
- ↑ Media, Kompas Cyber (2020-11-10). "Raden Mattaher, Panglima Perang Jambi yang Jadi Pahlawan Nasional". KOMPAS.com. Diakses tanggal 2025-04-05.