Wp/jax/Nasi Gemuk
Nasi Gemuk adolah salah satu makanan yang sering ditemuin di Provinsi Jambi. Nasi gemuk iko adolah sarapan favorit masyarakat di Jambi. Bentuknyo sebenarnyo mirip samo Nasi Uduk yang ado di Pulau Jawa, tapi Nasi Gemuk merupokan andalan orang Jambi samo Sumatra Selatan. Raso dari nasinyo mirip dengan Nasi Guri dari Aceh, samo Nasi Lemak yang ado di Riau, Malaysia, Singapura dan Brunei Darussalam. Tapi bedanyo nasi gemuk samo nasi uduk ado pado jumlah santan yang dipakek. Kalau nasi gemuk, santan yang dipakek biasonyo lebih banyak, jadi raso dari nasi gemuknyo jauh lebih gurih.[1][2]
Sejarah
[edit | edit source]Sejarah nasi gemuk ko sebenarnyo belum diketahui nian. Tapi sejak tahun 1970-an, nasi gemuk ko sudah banyak dimakan samo orang Jambi, terlebih untuk sarapan orang tu. Namo nasi gemuk jugo belum diketahui darimano datangnyo, tapi dipercayo karno tinggi kalori efek dari pakek santan yang banyak.[1][2]
Bahan Pembuatan
[edit | edit source]Bahan Utamo
[edit | edit source]Ado beberapo bahan utamo dalam pembuatan Nasi Gemuk, yaitu:[2]
- Beras
- Santan
- Daun salam
- Daun pandan
- Daun jeruk
Bumbu Halus
[edit | edit source]Demi menambah cito rasonyo, ado beberapo bumbu halus yang jugo ditambahin dalam pembuatan Nasi Gemuk, yaitu:[2]
- Bawang merah
- Bawang putih
- Lada
- Ketumbar
- Jinten
Laok Pelengkap
[edit | edit source]Nasi gemuk idak dimakan gitu bae, perlu yang namonyo laok untuk menambah raso. Biasonyo, nasi gemuk di pagi hari laoknyo telok rebos atau telok dadar, keropok, timon, bawang goreng, samo cabe. Tapi ado jugo penjual yang nambahin kari ayam atau sapi, kacang tanah, samo ikan teri.[2]
Daftar Pustaka
[edit | edit source]- ↑ 1.0 1.1 Jicom (5 Juli 2015). "Nasi Gemuk Sarapan Pagi Khas Jambi". Jambi Independent.co.id. Diakses pada 9 Mei 2021.
- ↑ 2.0 2.1 2.2 2.3 2.4 Andi Annisa Dwi Rahmawati (16 Oktober 2018). "Sarapan Kenyang dan Komplet dengan Nasi Gemuk Khas Jambi". Detik.com. Diakses pada 9 Mei 2021.