Wp/jax/Kelenteng Hok Tek

Kelenteng Hok Tek adolah kelenteng paling tuo yang ado di Jambi dan menjadi saksi bisu dari perkembangan Tionghoa di Jambi. Kelenteng iko berado di Jalan Husni, Beringin, Pasar, Jambi. Bagian depannyo menghadap ke jembatan Sungai Maram.

Sejarah

Kelenteng Hok Tek adolah kelenteng paling tuo yang ado di Jambi. Diperkirakan kelenteng tuo sikok ko ado sejak 1838 Masehi. Data pendukung jugo ado karano di dalam kelenteng ado sebuah papan yang bertulis tanggal pado 154 tahun yang lalu. Lalu pado bagian lain papan itu, ado penjelasan tentang orang yang nyumbang ke kelenteng waktu dio bekunjung. Catatan itu ternyato dibuat pado tahun 2498 Imlek (1838 M).

Kelenteng Hok Tek idak cuman dipakek untuk ibadah bae, tapi jugo dalam perjuangan kemerdekaan Indonesia. Hal iko karano kelenteng pernah dipakek sebagai tempat untuk menyembunyikan senjato yang digunokan samo rakyat Jambi untuk melawan Belando.

Sekarang, kelenteng yang paling tuo ni idak lagi dipakek untuk tempat ibadah. Diketahui kalau sejak pendiriannyo, ado beberapo kali renovasi dilakukan. Sejarah mencatat kalau renovasi terjadi pado tahun 1931 dan jugo 1970. Lalu, renovasi terakhir terjadi pado tahun 1997.

Walaupun terakhir direnovasi tahun 1997, tapi sejak tahun 1984 Kelenteng Hok Tek idak dipakek sebagai tempat ritual lagi. Hal iko karano bangunan kelenteng yang kecik nian idak sebanding samo jumlah umat yang ado. Makonyo sejak tahun tersebut, Kelenteng Hok Tek menjadi cagar budayo dan sejarah yang dilindungi samo pemerintah.

Arsitektur

Kelenteng Hok Tek berdiri menghadap ke timur laut dan arah hadapnyo ni berdasarkan dari letak altar yang ado di dalam tata ruang bangunan kelenteng Cino. Di dalam tata ruang itu, bangunan kelenteng Cino selalu ngadap ke arah gerbang masuk.

Pado bagian atap ruang depan kelenteng, bebentuk jurai dan pelana (hsuan shan), sedangkan bagian ruang utamo samo samping atapnyo bebentuk pelana dengan dinding tembok (ngang shan).

Bagian bubungannyo itu bebentok simbol naga dengan mahkota tanduk sampo taring. Pado bagian dinding kiri samo kanan di pintu masuk ado lukisan yang mengisahkan tentang Sam Kok dan kisah seorang ibu yang nyelamatin anaknyo waktu serangan perusuh jalanan.