Jump to content

Wp/jax/Ayam Pop

From Wikimedia Incubator
< Wp‎ | jax
Wp > jax > Ayam Pop

Ayam Pop adolah salah satu makanan khas Sumatra Barat. Makanan iko tebuat dari ayam yang digoreng, tapi bentoknyo idak samo dengan ayam goreng lainnnyo karno warno dari ayam pop ko poteh pucat. Walaupun kayak gitu, tapi raso dari ayam pop ko adolah gurih samo manis. Rahasio rasonyo adolah dari aek yang dipakek untuk ngerebus, yaitu aek kelapo. Karno itulah mako ado raso manis samo asam di dalam ayam pop.[1]

Ayam iko memang biasonyo ado di tempat makan padang, tapi idak semuo tempat yang nyedioin ayam pop. Kalau ado pun, biasonyo cepat abes karena peminatnyo memang banyak. Bahkan kalau lagi makan, orang biso ngabisin paling dikit 2 potong ayam.[1][2]

Sejarah

[edit | edit source]

Masih belom pasti sebenarnyo dari mano ayam pop ko ado, tapi banyak orang pecayo kalo tempat petamo kali yang bikin ayam pop ko adolah Rumah Makan Family Benteng yang ado di Bukittinggi. Rumah makan iko adolah rumah makan yang betahan sejak lamo, yaitu sekitar tahun 1950-an.[3]

Awalnyo restoran iko cuman jual ayam goreng kereng bae layaknyo ayam goreng yang kito makan saat iko. Tapi suatu hari, rumah makannyo rame pembeli, jadi karno idak tetangani, makonyo pemilik rumah makan akhirnyo masak ayam pop. Pihak rumah makan ko bikin ayam yang direbos dulu pakek aek kelapo samo bawang poteh. Lalu setelah matang, ayam digoreng bentar biak bagian koletnyo agak lebih keras bae, tapi idak sampe gareng.[3]

Sedangkan untuk namonyo dewek, masih belom tau apo sejarah yang menyatakan namo ayam ko “pop”. Tapi, mungkin bae kareno singkatan dari “populer” kareno waktu adonyo ayam ko, ayam pop jadi populer di kalangan masyarakat.[3]

Bahan Pembuatan

[edit | edit source]

Ado beberapo bahan yang dipakek ontok masak ayam pop, tapi bahan-bahan ko sebenarnyo udah banyak orang tau karno merupokan bumbu masak biaso.[3]

Bahan Ayam

[edit | edit source]
  • Seekor ayam kampong yang jantan, potong jadi 4
  • 750 ml aek kelapo
  • 2 cm jahe, geprek
  • 2 cm lengkuas, geprek
  • 2 lembar daon jerok
  • 2 lembar daon salam
  • 1 batang sere, gepengin

Bumbu Halus

[edit | edit source]
  • 5 siung bawang poteh
  • 3 bijik bawang merah
  • 3 bijik kemiri
  • 2 sdt gulo paser
  • 2 sdt garam

Sambal

[edit | edit source]
  • 2 bijik tomat merah
  • 5 bijik cabe merah besak, dibuang bijiknyo
  • 3 bijik bawang merah
  • 2 bijik bawang poteh
  • 1 sdt gulo paser
  • 1 sdt garam

Pelengkap

[edit | edit source]
  • 250 gram daon singkong mudo
  • 500 ml aek
  • 1 sdt soda kue

Daftar Pustaka

[edit | edit source]
  1. 1.0 1.1 Odilia WS (9 September 2020). "Resep Ayam Pop Khas Bukittingi yang Sedap". Food.detik.com. Diakses pada 22 Mei 2021.
  2. Syifa Nuri Khairunnisa (4 Oktober 2020). "Resep Ayam Pop Khas Padang Lengkap dengan Sausnya". Kompas.com. Diakses pada 22 Mei 2021.
  3. 3.0 3.1 3.2 3.3 Silvita Agmasari (31 Juli 2017). "Ini Asal Usul Ayam Pop Khas Minang". travel.kompas.com. Diakses pada 22 Mei 2021.