Wp/isv/Incubator:Pet kolon

Vse glavne, oficialne pravila Vikipedije možno jest oprěděliti petju kolonami Vikipedije:

Vikipedija jest enciklopedija	Vikipedija prědstavjaje nevtralnu točku zrěnja	Vikipedija jest svobodno dělo	Vikipedija trěbuje pristojno provodženje	Vikipedija ne imaje tvrde pravila

	Vikipedija jest enciklopedija, ktora sodrživaje elementy obyčnyh enciklopedij, specializovanyh enciklopedij i različnyh almanahov. Članky ne mogut obsegati vlastne izslědovanja avtorov i imajut byti osnovani na točnyh, prověrimyh izvorah. Vikipedija ne jest město za publikovanje vlastnyh mněnij, argumentov i izkušenostij. Kromě togo, Vikipedija ne jest sbirka neporednyh informacij i trivialnyh faktov, ne jest město ni za reklamu, ni za ličny vebsajt, ni za katalog linkov v internetu. Vikipedija takože ne jest slovnik, sajt za noviny ili hranilišče dokumentov; za take cělje jestvujut sesterske projekty: Vikislovnik, Vikinoviny i Vikiizvornik. Nakonec, Vikipedija ne jest eksperiment s anarhijeju ili demokracijeju.
	Vikipedija prědstavjaje nevtralnu točku zrěnja, čto znači, že my ne propagujemo nijedno mněnje. Ako sut različne točky zrěnja, usilujemo, že v člankah vsaka iz njih jest prědstavjena objektivno i kako možno točněje, uměščena v neobhodimom kontekstu, bez nezasluženogo prěvagy jednoj nad drugoju, i tako, da by čitatelju vsegda bylo jasno, ktoro mněnje jest čije. Nijedna versija ne može byti prědstavjana kako «najlěpša» ili «jedina pravda». Koliko možno – osoblivo pri rabotě nad spornymi temami – sodržanje imaje byti prověrimo posrědstvom iztočnikov na věrodostojne, měrodajne, avtoritetne izvory. Kogda dohodi k konfliktu o tom, ktory variant jest najvyše nevtralny, trěba dočasno ostaviti članok v pokoju, označiti go šablonom kako «nenevtralny», poprobovati razrěšiti spor na danoj besědnoj stranici i postupati shodno s směrnicami za razrěšenje konfliktov.
	Vikipedija jest svobodno dělo, ktoro vsekto može praviti i ulěpšiti. Vsaky tekst jest dostupny pod licencijami GNU za svobodnu dokumentaciju (GFDL) i Creative Commons, čto znači, že može byti izměnjeny, razširjeny i koristany shodno s jihnymi uslovjami, s podanjem avtorstva. Imajte svědomost, že vsekto može izměniti vaš tekst, i nikto ne imaje pravo na vlastnost člankov ili izključiteljnu kontrolu nad sodržanjem: vse, čto pišete, može byti nemilosrdno prěobraženo i razširjeno drugymi. Zabranjaje se uměščenje materialov, ktore narušajut avtorske prava ili sut protivrěčne s licencijami.
	Vikipedija trěbuje pristojno provodženje. Vsaky učestnik povinen jest považati svojih kolegov, daže kogda ne suglašaje se s njimi. Vsegda budite učtivi. Izběgajte osobnyh atak, grozb, agresije i generalizacij. Zadrživajte hladnu krov, kogda atmosfera goreča pri rabotě nad spornymi temami, i izběgajte vojen pravok; imajte v vidu, že jest 1,404 člankov, nad ktorymi možete rabotati. Postupajte v dobroj věrě, a prědpokladajte dobru volju i u drugyh. Nikogda ne narušajte enciklopediju s cěljem dokazanja, že imajete pravdu. Budite otvorjeni i privětlivi. Pametajte, že rabota nad Vikipedijeju jest dobrovoljna i ne obvezna.
	Vikipedija ne imaje tvrde pravila, kromě povyših četyreh glavnyh principov. Vy možete svobodno praviti, prěměščati i ulěpšati sodržanje člankov, učestvujuči za samu radost pravjenja. Ačekoli vse izměny povinny sut služiti někakomu naměrnomu cělju, sovršenost jest stremjenje, a ne trěbovanje. Ne bojte se, že sdělajete neporedok ili čtokoli popsujete: vse poprědnje versije člankov sut shranjene i vsegda možno jest vrnuti se k njim, zato vy ne možete trvalo poškoditi Vikipediji ili bezpovratno udaliti něčto. Ale takože pametajte, že vse, čto vy dělajete tu, shranjaje se na vsegda.