Wp/ii/ꅺꊈꄯꒉ

From Wikimedia Incubator
< Wp‎ | iiWp > ii > ꅺꊈꄯꒉ
Jump to navigation Jump to search

《ꅺꊈꄯꒉ》ꋍꀉꒉꆇꉙꆈꌠꄯꒉ。

꒔、ꂿꃅꋧꐈꋊ[edit]

ꀃꌋꂾꀊꆨ,
ꄩꆹꃅꂸꐛ,
ꃅꐛꏸꂸꅑ,
ꀏꆹꅉꂸꐛ,
ꅉꐛꏜꂸꋦꌦꂾ;
ꐧꆹꉒꂸꈴ,
ꈭꈫꃅꂸꐛ,
ꅉꐛꆳꂸꁏꌦꂾ;
ꄂꃢꄂꂸꐛ,
ꍯꃢꍯꂸꐛ,
ꆂꉘꀕꂸꐛ,
ꆂꍆꀕꂸꐛꌦꂾ;
ꏃꃅꆈꋧꋪ,
ꏃꃅꆈꅊꀕ。
ꏃꃅꂸꋧꌦꂾꆹ,
ꏃꃅꂸꈤꌦꂾꆹ,

꒔ꑍꌋꃅꋧ,
ꌋꈍꀕꃅꋧ,
꒔ꑍꉬꃅꋧ,
ꉬꈍꀕꃅꋧ,
꒰ꋧꒈꆏ꒔,
ꒉꉜꉚꆏꑍ,
ꉜꉚ꒰ꆏꌕ,
ꏃꃅꏸꍀꇖ,
ꏸꍀꇳꆏꉬ,
ꇴꎞꇊꆏꃘ,
ꐈꎞꇊꆏꏃ,
ꇁꉘꆿꆏꉆ,
ꉬꐮꈖꆏꈬ,
ꋦꐮꈣꆏꊰ,
ꂿꃅꋧꐈꋊ。

ꂿꃅꋧꐈꋊꀥꇱꅇ[edit]

ꋧꃅꄜꃤꋒ,
꒔ꃼꊂꑴꌋ。
ꃅꐛꃅꐙꌠ,
ꃅꐛꃅꐙꀱ,
ꀋꆴꀱꉈꒆ,
ꂸꊪꇓꅔꄰ,
ꀑꃅꐋꊂꄏ,
ꀑꊃꐋꌌ꒰,

ꇌ꒔ꋒꀋꇔꉾ,
ꇌꊰꇌꃢꉾ,
ꌩꐧꑍꀺꇖ,
ꌩꑆꇖꀺꁳ,
ꐎꉹꉧꄉꁻ,
꒰ꉈꏦꄉꁻ,
ꐯꇓꉽꇓꉧꊂꍅ。

ꑍ、ꃅꊭꋊ[edit]

ꀃꌋꂾꀊꆨ,
ꉒꊂꉒ꒔ꀕ,
ꃅꃴꑍꊭꀕ,
꒔ꊭꇳꆏꉆ,
꒔ꊭꇳꆏꄓ;
ꃽꋰꉖ꒰ꉆ,
ꃽꋯꉖ꒰ꄓ;
ꑴꋯꉘꑎꉆ,
ꑴꋯꉘꑎꄓ;
ꇳꇐꁧꐞꉆ,
ꇳꇐꁧꐞꄓ;
ꏤꏦꇂꐟꉆ,
ꏤꏦꇂꐟꄓ;

ꂸꀮꉗꈌꉆ,
ꂸꀮꉗꈌꄓ;
ꄂꐎꁧꑎꉆ,
ꄂꐎꁧꑎꄓ;
ꃅꃴꃄꇴꌅꊂꑟ。
ꀑꆷꂿꃅꉜ,
ꑓꌧꈨꊂꋘ,
ꇇꎇꌩꀑꉧ,
ꌩꀐꄙꄹꐔ,
ꈌꅑꃪꊂꌃ,
ꃪꌃꇗꄹꐡ,
ꑭꎅꃅꊂꑃ,
ꉾꑟꊰꑋꑟ,
ꋋꆹꃅꊭꋊ。

ꌕ、ꃰꎝꌺꊰꑋ[edit]

ꀃꌋꂾꀊꆨ,
ꉢꑎꆀꐪꊰ,
ꉬꐜꀕꆽꅞ,
ꐈꇁꄔꃅꐞ,
ꈬꑍꐞꃅꈊ,
ꈬꉖꐞꃅꄜ,
ꑍꐞꇳꑐꀕ,
ꌊꐞꁨꇉꀕ,
ꂿꃅ꒔ꃅꐞ,
ꃄꅉ꒔ꃅꐞ,
ꐈꇁꐈꇁꃅ,
ꐈꇁꈥꊉꆲꋒꒆ,
ꅉꃢꀋꆷꆺ,
ꆲꁏꌋꈤꊪ,
ꁍꐛꏃꐛꇁꄾꄿ?
ꁍꐛꏃꐛꇁꂸꄿ。
ꉬꄚꇴꌅꄰ,
ꃱꌺꐛꍝꑌ,
ꐎꀮ꒰ꂾꊪ,
ꄂ꒰ꌋꅪꊪ,
ꏃꃅꉬꐮꎭ,
ꐧꐛꈲꐛꇁꄾꄿ?
ꐧꐛꈲꐛꇁꂸꄿ。
ꐈꇁꌿꁧꌺꇰꒆ,
꒔ꋏꊿꑌꂦ,
ꑍꋏꊿꉆꂦ,
ꌕꋊꄯꁍꂤ,
ꇕꋊꁦꀑꂦ,
ꉬꋊꂿꃅꑟ。
ꉭꇌꊂꉫꇌ,
ꐪꑳꊂꐮꑳ,
ꉉꆹꊂꉇꆹ,
ꌖꑐꊂꌔꑐ,
ꇵꌦꊂꇳꇖ。
ꀑꊃꍆꀕꈌ,
ꐧꊂꐛꑿꈌ,
ꅳꁖꌤꌧꈌ,
ꀀꃶꐪꁙꈌ,
ꐆꁯꐛꊪꈌ,
ꑭꁆꁬꃷꈌ,
ꐧꐛꈲꐛꇁꄾꄿ?
ꐧꐛꈲꐛꇁꂸꄿ。
ꉬꐮꃪꅐꊪ,
ꉬꑎꆏꆹꎻ,

ꉬꄚꇴꌅꄑ,
ꏃꃅꉬꐮꉜ,
ꍍꐎꍍꆈꈬꈨꉼꃯꆏ,
ꐧꐛꈲꐛꇁꑴꄷ。
ꍍꐎꍍꆈꈬꈨꉼꊂꆏ,
ꀑꊂꍆꀕꈌꌠꇔ,
ꌩꋦꈬꊂꎭ;
ꐧꊂꐛꑿꈌꌠꇔ,
ꃪꅪꈬꊂꎭ;
ꅳꁖꌤꌧꈌꌠꇔ,
ꇈꈫꇁꄿꎭ;
ꀀꃹꐪꁙꈌꌦꇔ,
ꊖꑭꁧꃴꎭ;
ꐆꁯꐛꊪꈌꌠꇔ,
ꄹꇭꄺꑓꎭ;
ꐱꈬꀋꆳꈌꌠꇔ,
ꌩꑭꇓꃴꎭ;
ꑭꁆꁬꃷꈌꌠꇔ,
ꊖꆈꁧꊂꎭ。
ꐧꐛꈲꐛꇁꄾꄿ?
ꐧꐛꈲꐛꇁꂸꄿ。
꒔ꊂꂾꈭꐨ,
ꐈꈁꐈꇁꃅ,
ꉬꑎꇱꐛꇁ,
ꇱꍹꌕꈎꐛ,
ꉒꐎꌘꌅꄓ,
ꏃꃅꉬꉎꒆ,
ꃰꅪꌕꁧꐛ,
ꈭꑍꐮꃅꈊ,
ꈬꉖꐮꃅꄜ,
ꁍꐛꇁꂯꐯ,
ꀿꐛꇁꂯꐯ,
ꍍꐎꍍꆈꈬꈨꉼꆏ,
ꐻꐛꊈꊐꇁ,
ꃰꐛꆊꊐꇁ,
ꆲꁏꌗꊐꇁ,
ꉐꐙꌦꊐꇁ,
ꏷꋦꑓꊐꇁ,
ꐈꇁꃰꐛꇁ,
ꃰꎝꌹꊰꑋ。

ꃰꎝꌺꊰꑋ,
ꌦꑌꌠꃘꑟ,
ꌦꀋꑌꌠꃘꑟ。
ꌦꀋꑌꌠꃘꌋꆏ:
꒔ꎝꇈꆏꏜ,
ꏝꅍꀑꆈꈤ,
ꅔꐎꈬꊂꄃ,
ꏜꋦꌕꉐꁋ;
ꑍꎞꇈꆏꌩ,
ꀠꆿꃰꎝꌺ;
ꌕꎞꇊꆏꎺ,
ꎺꋦꁧꑎꄃ;
ꇖꎝꇊꆏꁵꊪ,
ꁵꊪꐂꐞꃰꎝꌺ;
ꉬꎝꇊꆏꁊ,
ꁊꆉꃰꎝꌺ,
ꁊꈤꊫꊂꄃ;
ꃘꎞꇊꆏꇌ꒿,
ꌩꑭꃪꃹꄃ。
ꌦꑌꌠꃘꑟꆏ,
꒔ꎝꇈꆏꀠ,
ꀠꉘꌕꂾꈤ,
ꊫꉻꆻꄧꄃ。
ꀠꉘꌺꒉꆹ,
ꀠꉘꑓꉂꐛ,
ꊖꆈꉻꊂꄃ;
ꀌꀠꌺꇢꆹ,
ꀌꀠꏾꅪꐛ,
ꊫꉻꆻꃹꄃ;
ꀠꉘꌻ꒧ꆹ,
ꀌꀠꐰꇑꐛ,
ꆺꑳ꒰ꃴꄃ,
ꀠꉘꌺꌕꁋ。
ꑍꎝꇊꆏ꒰,
꒰ꉬꌺꒉꈤ,
ꇐꌅꇐ꒜ꐛ,
ꃪꅪꈬꊂꄃ;
꒰ꉬꌺꇢꈤ,

꒰ꇬꁧꆫꐛ,
ꊖꁧꉻꊂꄃ;
꒰ꉬꌻ꒧ꈤ,
ꁮꐞꈌꅪꐛ,
ꊖꉻꆽꃴꄃ;
ꌕꎝꇉꆏꄀ,
ꄀꉘꌺꒉꈤ,
ꅍꅑꌅ꒜ꐛ,
ꃅꈯꄀꌺꐙ,
ꄂꐎꁧꑎꄃ;
ꅍꅑꌅ꒜ꆹ,
ꎺꑌꃱꇌꐙ,
ꄄꁁꎰꆈꄃ;
ꅐꅑꌟꒉꆹ,
ꃅꃴꈭ꒰ꐛ,
ꈭꍪꍫꉘꄃ。
ꄀꉘꌺꇢꆹ,
ꏬꉘꏬꅪꐛ,
ꏬꉘꌺꒉꆹ,
ꏬꆉꀒꈨꐙ,
ꎺꋦꁧꑎꄃ;
ꏬꉘꌺꇢꆹ,
ꀠꑳꅏꐡꐛ,
ꃄꈌꄐꊂꃰ。
ꄀꉘꌻ꒧ꆹ,
ꆪꍝꅐꅪꐙ,
ꇤꇉꆹꀸꄃ。
ꇖꎞꇈꆏꊈ,
ꊇꆈꌕꂾꈤ,
ꇉꈫꌿꊂꄃ,
ꊇꆈꌕꉐꁋ。
ꉬꎞꇉꆏꑙ,
ꑙꅪꌕꂾꈤ,
ꌩꑭꇉꃴꄃ,
ꑙꈤꌕꉐꁋ。
ꃘꎞꇈꆏꊿ,
ꊿꈤꋧꃅꄃ。