Wp/hsn/長沙話

長沙方言，又稱長沙話，屬湘語—新湘語個一支。典型個長沙方言是長沙城區跟長沙縣、望城縣所使用個言語（稍有口音差異），寧鄉縣屬長沙方言之長株潭小片，瀏陽除噠西鄉屬長沙方言區外，瀏陽城區跟瀏陽大部分地區屬贛語個宜瀏片方言，瀏陽東部地區還有客家方言，幾乎不得跟長沙方言互通。

地域分區

語言學家多把長益片方言劃分成：長株潭小片、沅益小片、岳陽小片三隻部分，三隻小片區有口音差別，但大致冇得溝通障礙。 長株潭小片包括：長沙城區、長沙縣、望城縣、寧鄉縣、湘陰縣、汨羅市、南縣、株洲城區、株洲縣、湘潭城區、湘潭縣，啯些地方個語言差異幾小； 益沅小片包括：益陽城區、沅江市和桃江縣； 岳陽小片僅有岳陽縣。 狹義個長沙方言只指長沙市區跟噠郊縣附近個口音.

歷史

古楚語

長沙待殷商時期，屬百越族一支，屬揚越之地，又稱“荊蠻”。爾個時候長沙地區個居民使用個語言是古百越語。隨到楚國勢力範圍個擴大，春秋晚期、戰國早期個楚國進入到而今個洞庭湖流域，開發噠當地個經濟，亦帶來噠其俚個古楚語。古楚語是只跟中原個華夏語有幾多差異個語言。《左傳.宣公四年》：“楚人謂乳“穀”，謂虎“於菟”，而《孟子.滕文公下》記載楚國人欲讓其子學齊語個事情，等於是講當時個楚語跟齊語有闔多差異。爾個時候楚語個樣範，而今難得弄清楚噠，但其是湘語個源頭，啯點是不容置疑個。