Wp/hsn/中華人民共和國

中華人民共和國 (People's Republic of China)

中華人民共和國是亞歐大陸亇東頭、太平洋西邊亇一隻社會主義國家。對1971年起是聯合國高頭中國亇唯一合法代表，也是安理會常任理事國。首都在北京，陸地同湖水有960多萬平方公里，陸上遼共同14隻國家搭界。有13億多人，是世界人最多亇國家。

中國共產黨在第二次國共內戰裡成立中華人民共和國中央人民政府，中華民國盡共產黨趕起到台灣去噠。箇下，憲法高頭寫噠國家由中國共產黨執政。全國有23隻省份（包括管不倒亇台灣省），5隻自治區，4隻直轄市，同倒香港、澳門兩隻特別行政區，香港跟澳門根據一國兩制制度搞高度自治。國家通用語言文字是漢語亇普通話同簡化漢字。衙門高頭行無神論，民間有很多信祖宗亇，也有信佛教跟道教亇。

國旗
國徽

歷史

中國共產黨在1921年成立之後，擇廣州國民政府一路北伐。後背蔣介石同共產黨搞出很多矛盾，就在1927年打擊共產黨。共產黨管亇南昌守備部隊兵變建立噠一隻中國工農紅軍，從南昌街上蹽到湖南、江西、福建等省亇山垰里。共產黨搞起一隻中華蘇維埃共和國。後背蔣介石領導南京國民政府搞噠四次圍剿下失敗噠，最後再用百把萬亇大軍圍攻蘇區首都瑞金，紅軍只有八萬多，打不國民黨贏，長征就架場噠。兩萬多里亇長征路途很造孽，最後南方亇所有紅軍部隊到陝西亇時季，只究得七千多萬噠。

那時喑合日本侵入中國亇北方，蔣介石運神打日本前要先把共產黨給搞熨貼。張學良想先抗日，就在1936年12月兵諫蔣介石，逼起他聯合共產黨去抗日。共產黨就斢噠國號，改作西北邊區，紅軍也改作八路軍同新四軍。抗日戰爭時季，共產黨主要打游擊，領地變很大。抗戰歸完後，國共談判搞聯合政府冇談死火，內戰留時就架場噠。那時社會問題嚴重又美國又毋援助，加上共產黨又有蘇聯搭幫手，還攏來赫多民主黨派，共產黨就把國民黨打台灣去噠，共產黨1949年建立噠中華人民共和國。

1950年，中央政府架場搞土改，地主的土地闔把噠農民，還槍斃噠赫多地主。後背又留時去搞三大改造，生產資料下攏成國有亇。又派志願軍同北朝鲜打美國同韓國。

1957年，三大改造才架場，毛澤東就發動噠“反右”運動，把民主黨派闔打擊盡噠。1958年後中國共產黨又搞出“大躍進”同人民公社化運動，加上1959年中蘇相反，那一時期，中國大陸開始鬧飢荒，餓死噠千把萬人。1966年毛澤東又發動噠持續11年亇“文革”，搞“破四舊”怕冇中國亇古跡古物毀噶大半，經濟也冇發展，紅衛兵等運動還鬥死赫多人。1976年毛澤東去咖噠，華國鋒把“四人幫”跟他里亇親信下抓起來，文革才得散棚。

鄧小平在1978年亇十一屆三中全會上噠台後，改革開放就架場。先在東南沿海搞噠五隻經濟特區做試點，後背全面開放。箇以後中國亇國際影響力也變大噠，GDP也提高噠一大片，不過貧富差距也變大噠。1989年軍隊鎮壓噠八九民運，也惹噠世界批評中國亇民主同人權問題。

中國軍事同航天也進步很大。2003年，神舟五號上噠天，跟倒又放噠幾隻載人衛星，還放噠嫦娥一號奔月球。今日中國陸軍世界最大，2012年還造噠第一隻航母遼寧號。

1997年同1999年，香港跟澳門亇主權闔還把中國。2008年，北京辦噠第29屆夏季奧運會。2010年，上海搞噠一回世博會。

自然地理

中國亇地址東邊低西邊高，從東到西連像爬階基。頂上是青藏高原，西南邊亇喜馬拉雅山最高，喊噠做第一階梯；第二階梯大半是盆地同高原；三一個在大興安嶺、太行山、巫山跟雪峰山亇東邊，平原同丘陵多。

用氣候跟地形亇標準念常分四隻大區，喊北方地區、南方地區、西北地區同倒青藏地區。北方同南方是東部季風區，秦嶺淮河間開，北方同南方要干冷得多。海南、西雙版納有熱帶季雨林，東北就是片子片亇針葉林噠。西北就大半是草原同戈壁灘，夏天熱死巴人，冬天又凍人，還冇么雨下。青藏地區除噠同印度在爭亇藏南，闔是高原氣候。

中國江湖水也多，譬如長江、黃河、珠江、淮河、遼河、海河、黑龍江跟雅魯藏布江箇下大水系，還有七七八八蠻多小水系。超過一平方公里亇湖泊有2700隻，最大亇咸水湖是青海湖，最大亇淡水湖是鄱陽湖。