Wp/hrx/Interlingue

Interlingue is en konstruierd Sproch. Es waar zwischich 1922 un 1947 Occidental genennd. Edgar de Wahl, enner fun de eerste Esperantisde, hod das geschribb. De Wahl waar fun de Statt Tallinn in Eestland, wo im Russische Kaiserreich waar, awer is speder sein eichne Land gebb. Er hod schun seid Kind Deitsch, Russisch, Eestisch un Franzeesisch gesproch un had natierlich Fähichkeed in Sproche.

Interlingue sihd fiel aus wie die remische Sproche: Franzeesisch, Spanisch, Italjenisch, un so weider. De Wahl hod en Reghel krieerd, wo De Wahl sein Reghel genennd gebb is, wo die Ennrunge in Werter rëgulaar gemach hod. Zum Beispiel, die Ennrung fun d (im Wort exploder) noh s (explosion un explosiv) is een rëgulaar Ennrung wemm-ma de Reghel nohgehd.

De Wahl waar mit Esperanto net froh. Er hod bestimmd en Sproch se mache, wo Occidental heesd. Er hod das im Johergang 1922 publizeerd. Im Johergang 1949 hon die Benutzer fun Occidental de Sproch eer Naame in Interlingue geennerd.

Do waare schun fiel Sorte konstruierde Sproche in de Zeid fun de Wahl. Etliche fun denne, wie Esperanto un Ido, sin schëmatisch genennd gebb, wal-se eere eichne Gedanke nohgehn, aach wenn die Werter kinstlicher aussihn. Annre, wie Latino sine Flexione un Idiom Neutral, sin natierlich genennd gebb, wal-se fersughe, wie natierliche Sproche aussesihn. Die Schwierichkeed waar, dass die Kriatore musste raussuche zwischich rëgulaar se sin odder natierlich aussesihn. Louis Couturat, enner fun Ido sein Kriatore, hod das Sellvich im Johrgang 1903 geschribb un hod das en Paradox genennd: "Die internazionaale Werter sin net rëgulaar un die rëgulaare Werter sin net internazionaal." Die Sproch, wo de Wahl krieerd hod, had de Ziel, en Sproch se sin, wo in de sellviche Zeid rëgulaar waar un natierlich ausgesihn hod.