Wp/hrx/Frucht

Die Frucht fun ener Planz is die Totaliteet fun de Orgaane, wo aus ener Blieh rauskomme, un wo die Planzesome bis zu eerer Reifung umgewe.^[1] Fricht bilde aus Prinzip nore die Planze, wo en zuner Fruchtknode besitze (Angiosperme). Bei de Gimnosperme gebbd-s nore freie Some.

Aan de Bildung fun ener Frucht kenne auserm Fruchtblaat mannichmol annre Orgaane deelhole, zum Beispiel de Blieheboddem un die Bliehehill. Die Frucht diend fer die Some aussebreide. Demnoh ob die Some fun de Frucht ingesperd bleive odder im reife Zustand freigesetzd werre, unnerscheed-ma zwischich Schlies- und Straufricht.

Im allgemeene Sprochgebrauch werd unnich Fricht aach Oobst ferstann un net immer gebbd-s en klaarer Unnerschitt zwischich Some un Frucht.

Struktuer

En Frucht bestehd aus eenem odder etliche Some, wo fun ener Fruchtwand, dem Përikarrep, umgebb sin. Beim Përikarrep unnerscheed-ma dann awer drei Schichte:^[2]

Ëxokarrep – eiserst Schicht
Mësokarrep – mittelst Schicht
Ëndokarrep – innerst Schicht

Bei de Persch uffem Bild rechts, zum Beispiel, bild das Ëndokarrep de harte Kern, wo de Some umgebbd. Das Mësokarrep is fleischich, und das Ëxokarrep bild die sammtich Perschescheels.

Das Përikarrep werd wärend de Frucht eerem Reifungsprozess aus de Blieh eerem Fruchtknode gebild. Fer die Indeelung fun de Fricht is-es wichtich sich draanerinnre, dass de Fruchtknode aus enem odder ferschiedne mitnanner ferwachsne Fruchtbletter (Karpelle) bestehd.

Rëferenze

↑ Fricht un Some
↑ Beck CB (22. April 2010). An Introduction to Plant Structure and Development: Plant Anatomy for the Twenty-First Century. Cambridge University Press. ISBN 978-1-139-48636-1.

[1] Fricht un Some

[2] Beck CB (22. April 2010). An Introduction to Plant Structure and Development: Plant Anatomy for the Twenty-First Century. Cambridge University Press. ISBN 978-1-139-48636-1.

[1]

[2]