Wp/hrx/Freie Inhalte

De Logo aan de Tela is en Creative Commons Lizenz, un das Papier lehd aus, uff Khmer, dass das Bild uffner Inhalt is.

Freie Inhalte (eng. free content) sin alle Sorte kriative Werrke, wie z. B. Kunstwerrke, Bücher, Softwareprogramme odder annre kriative Inhalte, wo-s defor nore minimaale Copyright- un annre rechtliche Limitazione gebbd iwer Nutzung, Ennrung un Ferbreidung gebbd. Es hanneld sich um Werrke odder Ausdrucksforrme, wo fun jedeennem fer qualkär Zweck, in manniche Fell aach fer komersiaale Zwecke, frei studeerd, aangewennd, kopieerd un ferennerd werre kenne. Freie Inhalte umfasse alle effentliche Werrke sowie dorrich Copyright geschitzde Werke, wo die Lizenze die Dëfinizion fun freiem kulturaalem Werrik rëspëkteere un prësërveere.

In de meerste Lenner, ferlehnd die Berner Abmachung de Copyrightbesitzer padrongmesich die Kontroll iwer eer Werrke. Desweche misse dorrich Copyright geschitzde Inhalte fun de Autore ausdricklich als frei dëklareerd werre, was in de Reghel dorrich Rëferenzieerung odder die Inklusion fun Lizenzbestimmunge im Werrik gemach werd. Das Recht zu de Weiderferwennung fun diese Sorte Werrke werd fun de Autore in ener Lizenz ferlehnd, wo als frei Lizenz, Lizenz zu freier Ferbreidung odder uffne Lizenz gekennd is. Diese Freiheed, wo die Benutzer krien fer das Werrik weiderseferwenne (d. h. das Recht, diese Werrke frei se benutze, se studeere, zu ferennre odder se ferbreide, oft aach fer komersiaale Zwecke), sin oft mit fum Autoer geweelde Ferflichtunge (de uerpringliche Autoer se ziteere, die uerspringlich Lizenz beim weiderferwennde Inhalt se behalle) odder Limitazione (keen kommersiaal Ferwennung, Ferbodd fun bestimmde Midje) ferbunn. Es gebbd ferschiedne padroniseerde Lizenze mit unnerschittliche Opzione, wo defun die Autore weele kenne, was fer denne besser diend.