Wp/hrx/E-Mail

Do där Print zeichd de Ingangskate odder "Inbox" fun enem Email-Klïent. Benutzer kenne neie Emails sihn un Dings se mache, sowie Mënsaasche se lese, dëleteere, salveere odder beantworte.

E-Mail (englisch: electronic mail fer "ëlëktronisch Post" odder "ëlëktronischer Brief") is en Mëtod fer Mënsaasche mit ëlëktronische Gereed se ferschicke un se bekomme. Es is im speede 20. Joherhunnerd als die digitaal Version fun de Post konzipeerd waar (doher e- + mail). E-mail is en ëwerall forhand un aarich weid ferbreid Kommunikazionsmittel. Heitsedaagh is en E-Mail-Adress oft als primeer un nodwennich Deel fun fiele Prozesse in Ferkeer, Hannel, Rëghierung, Bildung un annre Domeene fum deeghliche Leve in de meerste Lenner aangesihn.

E-Mail funkzioneerd iwich Komputatoernetzwerrke, hauptsechlich das Internet, un aach iwich lokaale Netzwerrke. Aktuaale E-Mail-Sisteme basieere sich uff enem Store-and-Forward-Modell ("Speichre-un-Weiderferschicke"-Modell). E-Mail Server akzëpteere, ferschicke weider, liwre un speichre Mënsaasche. Net die Benutzer un aach net eer Komputatoer misse gleichzeidich online sin. Sie misse sich ferbinne normaalerweis mit enem Mailserver odder en Webmail-Interfass fer Mënsaasche se ferschicke odder bekomme odder runnerselaade.