Wp/fvr/Tasât
.svg)
Tasât Kʉldɨŋa'ŋba̠rʉ-ii séŋá'ŋ ere, naŋ yé ba̠rʉŋa kela-lé-ii asá dééŋ sʉʉrʉʉ́rrɨ́ŋ, naŋ Apríkɨyáŋ túlékʉŋo-lé kee. Na dééŋ deemkuri-sí in ka̱rɨ́a Aŋjamména. Na Tasât sí Paránsa bawa namaŋ kí ayé 1960. Naŋ suŋŋâ táábeŋ kɨ́ŋɨ kí wajaŋa na ireŋa na óráŋá namaŋ kórŋá. Na kí ayé 2011 kɨ́eŋ kwǎŋdíígíŋá nii ka̠ɨŋ 11,525,000 Tasât dɨó.
Na dɨ́eŋ belé séŋá'ŋ Solóŋ na Paránsa. Na kɨ́eŋ tá̠á̠rɨ́ŋá Misíŋá na Mʉslɨma gé, na kɨ́eŋ kwa suŋŋâ ge ná toldoma kawe.
Na Tasât dá̱ldɨ́ŋá'ŋ ba̠rʉ 21 appâkʉŋo-lé-ii. Naŋ Péru-lé ittíríg ittî-ii naŋ Apríkɨ́ya Sa̠ɨ́d-lé ittíríg appâ-ii. Na ba̠rʉŋa asá kíe kinaŋa gé Lɨ́bɨa rɨ́ɨ'ŋ ere, na Apríkɨya'ŋ Kʉldɨŋá'ŋba̠rʉ Túlékʉŋo sa̠ɨ́d'íŋ ere, na Sʉdân sǎba'ŋ ere, na Kamirôn na Nɨjɨ́rɨa na Néjar dʉ́gʉ́'ŋ ere.
Na ba̠rʉ́'ŋ Deemkuri nii kee 1,060 kɨ́ɨ́lʉ́mɨɨtás na dakki saasuŋá áláŋ baar'íŋgaarí Douala Ka̠merôn-lé. Na dééŋ lóó karra-ii baar na ba̠rʉ-lé na lóóda̠wlo negeb appâ-lé, naŋ lóóŋá lóóŋá Tasât-sí ín ka̠rɨ́a “Apríkɨ́ya'ŋ kilmá waytól”.
Na Tasât'íŋ Baw'íŋpáaj saasuŋá appâkʉŋŋi Tasât dɨó na a̠w saasuŋá appâkʉŋŋi Apríkɨya dɨó. Na 7,000 ayéŋá asá bɨtʉl Tasât'íŋ Baw sarrâba nii kéŋá 330,000 kɨ́ɨ́lʉ́mɨɨtás, na naa sarrâba nii 17,806 kɨ́ɨ́lʉ́mɨɨtás. Tasât saasuŋá kurrá-ii síbít-lé ɨ́de Emi Koussi'íŋ negeb-lé.
Na dééŋ sʉʉrʉ́ŋ sabba dǎyŋá kurrâŋa na appâŋa na dǎy'íŋpáaj'íŋ táas-lé na ɨdɨ̂ɨ́ŋi ná kíaŋa'ŋ lóó tullê-ii, na kosoota-lé na ka̠nsʉkwǎ appâŋa-lé. Na Tasât rooŋasaraba appáŋas kee ná ín ka̠rɨ́a Sari na Logone.