Wp/fvr/Ra̱ynadʉoŋ Sʉdân dɨó

Ra̱ynadʉoŋ Sʉdân dɨó suŋŋá ta̱gɨd-ii walagal lóó appâ tɨél kí ba̱rʉ'ŋ jombóró'ŋ ere. Ra̱ynadʉoŋ na baíma'ŋ jʉrnyó jaiŋíŋjalgíŋó'ŋ ótá ta̱bʉkwǎ ge suŋŋâŋere Sʉdân'íŋ kwa-lé. ɨt namá ila kéŋá ǎl dééŋ gánniniŋ kí ayé 2011,  tááríkwǎ eŋa 80% ǎl táárí kéyé eréŋsabba-lé, dɨ́eŋ dɨó 84% yáaŋa na 64% ábaŋa.

Ra̱ynadʉoŋ'íŋ téréŋá-sí tɨbbɨ̂t in kɨ̌lʉl áláŋ 80% walagal 95% páágó julupaál-le kí soga waarkwá namaŋ makanáŋ pʉrre'ŋ jetérésuŋŋâ kuro nás nyiíŋí. Eréŋsabba'ŋ ja̱nyʉ nyét ǎl dééŋ gánniniŋ ŋááríŋí áláŋ 35.5% páágó TGN (Téréŋá Gábal Nyétiŋ) kí ayé 2006, kila ayéŋá ka̱rɨkwǎ'ŋ nyokkéjeeŋ bá kéŋá namaŋ pʉrre'ŋ jetérésuŋŋâ'ŋ jʉtʉ́mó ka̱rɨ lʉ́o. Na tááŋá ǎl inlóŋ ná dawyiŋ'íŋ gé ǎl wěle-lé júlíŋítíá julu appâkʉŋo na ittîkʉŋo-lé pʉrre'ŋ eréŋsabba'ŋ jɨgé-lé, na rǎ̱ytá'ŋ jaaba namá kí koraŋa a̱w wala ɨɨs-ii gé; baanya appáŋa'ŋ jʉ́rto míŋ roobaar-lé áláŋ rǎ̱yta korojáwí na kí kuy ǎl írí riíŋ táárí eeŋ (suŋŋáŋ ere Sudân'íŋ túle) na tirge keer gal rǎ̱ytá'ŋ dawyiŋ toy ǎl nîŋ kwa míŋ tóóríg kawyeŋi kí kuy'íŋ koro na baanya dokkéŋa'ŋ walagal keer ǎl kíe koro rǎ̱y kawítíá dawyiŋ'íŋ tin-lé.

Ja̱bɨ́jaráŋá suŋŋâ kʉrʉl kí tin kurrâ pʉrre'ŋ, koróŋjawíŋ na kí kuy íríŋ ra̱ynadʉoŋ, ila ǎl in kayé áláŋ dééŋ gánnineŋjáa ɨɨs'íŋ a̱w-ii Sʉdân'íŋ sʉʉrʉ dawyiŋ'íŋ-le. Waar'íŋ báaljaa nyɨ̌re'ŋ jurgó'ŋ ǎl korojawíŋ sʉʉrʉ keera kí nyokkéŋjeeŋ. Pʉ́la, gemeŋa na kóldí nyétiŋ tánáŋá appáŋa gé, na kurtá suŋŋâ dog kawye. Na rǎ̱ytá kí kuy'íŋ koro na pʉrre'ŋ tɨbbɨ̂t kawye namá suŋŋâŋere kaaŋ gé, maraŋ kurtá'ŋ dawyiŋ nyiíŋís, na nyɨ̌re bʉdde kʉŋo dog kui'íŋ. Jáajaráŋ kí koraŋa a̱w eréŋsabbadargáŋá ba̱rʉ́ŋdɨoŋ namaŋ julupaál'iŋ tááríŋlótáŋ jányíŋis nyíí. In táárí namá in lóóŋála álâŋ súŋŋâŋ waar eŋa kí dawyiŋíŋ lóó'ŋ jányíŋi arrájáaŋsʉŋŋíŋtááríŋ paál.

Toŋíŋkwa'ŋ dawyiŋkwǎŋ suŋŋâ kaaŋ'íŋ téré kwǎ gé in ǎl na̱mɨ́etettebe'ŋ tági, kí illáiŋ ǎl rɨ́ɨ eré soóná'ŋ dawyiŋíŋ lóóŋá ǎl kí kui'íŋ koro kawye na̱mɨ́etettebe appâ-ii kwa-lé. Toŋíŋkwaŋ ra̱ynadʉoŋ kwǎ dog púla na kurtá kawye.