Wp/fvr/Páátris Lʉmʉ́mba

Páátris Émeri Lʉmʉ́mba (2 Kuyweél 1925 -17 Taanɨ̂líŋ 1961) Kôŋgo'ŋ tiríjinnidʉŋo na dítǐnjaari'ŋ ta̱bʉ aŋá álá Kôŋgoꞌŋ Jʉmbʉtáŋkuriꞌŋ Kʉldɨ́ŋáŋba̠rʉ'ŋ bagal waarkʉŋo ewelkʉŋo táárí piá míŋ Potáŋ namaŋ Ʉróŋ 1960. Na Kôŋgo'ŋ Bá̱rʉ́'ŋ Júnyúŋo'ŋ (KBJ) tógólo, yé KBJ'ŋ ta̱bʉ kéŋá míŋ 1958 namaŋ dééŋ jaw'ŋ tin-lé Taanɨ̂líŋ 1961. Kí járríŋdorá yé Apríkia'ŋ bá̱rʉ́dʉŋo na Apɨrɨgɨŋ'íŋjɨrgɨ́ŋódʉŋo aŋá, yé táárí appâ piá Kôŋgo'ŋ ja̱ɨŋó'ŋ sábbá ná Baljɨ́ka'ŋ gorgôsíŋba̱rʉ-lé kuro ná kʉldɨŋáŋba̱rʉ dítǐnjaari eŋa.

Kôŋgo'ŋ dítǐnjaari'ŋ ta̱bʉ́ŋ 1960 kí tin ittî, daálima-lé argala kéŋá, namá yé aŋá Kôŋgo'ŋ Jʉ́ʉ́r'íŋ juuŋ. Lʉmʉ́mba A̱kʉ́roŋa'ŋ Jɨrgɨ́ŋó-lé na̱ Bá̱rʉ́ŋá'ŋ Jɨrgɨ́ŋó-lé dóŋáŋjányi kóíŋí Kataŋgan'íŋ jʉ́nsɨ́ŋɨkwǎ'ŋ ka̱lɨjaní'ŋ, álá Baljɨ́ka dɨ́eŋ ka̱rɨ́ŋ kɨɨréliŋi na álá dɨ́eŋ ta̱bʉ Móse Tisômbe aŋá. Marraŋ a̱w dog kawríŋíe ɨdɨ̂ɨŋ ná garib'íŋ ba̱rʉŋa-lé kááreŋjáa kéŋá álá matti Lʉmʉ́mba sa̱dɨ̂gáŋjarri-sí see tɨéliŋi. Kin kááreŋjáaŋa nyǐŋíe-si lia álá Lʉmʉ́mba ta̱bʉ Soopêt'íŋ Jɨrgɨ́ŋó-lé jáwí ná jányíŋi kóíŋí. Kin namá júndíe ná kerkera suŋŋá ɨŋɨ kí Ba̱rʉ́ŋta̱bʉ Ɨ́zɨp Kasa-Bubu na kí tɨ́bóŋá'ŋ tíbó Ɨ́zɨp Désiré Mʉbʉ́tʉ, namaŋ kí A̱kʉ́roŋa'ŋ Jɨrgɨ́ŋó na Baljɨ́ka álá Soopêt'íŋ Jɨrgɨ́ŋó'ŋ sa̱rgɨ ka̱nnɨ̂ŋɨ Deer Lúllâ-lé.

Lia asá Mʉbʉ́tʉ daálima'ŋ mʉŋgʉl piá, Lʉmʉ́mba kóílíŋí áláŋ sa̱kkɨa ná Istánlibil jee kééŋ ka̱rɨjʉ́lokwǎ-lé. Marraŋ dǒra Mʉbʉ́tʉ'ŋ kuri'ŋ taálakwǎ kéyé ná dɨ́mbɨ́l kayé. Namá Kataŋgan'íŋ taálakwǎ-sí dóŋa kayé, namá Kataŋgan'íŋ na Baljɨ́ka'ŋ taálakwǎ'ŋ na sa̱ɨ́noŋa'ŋ ta̱bʉ́ŋ ja̱wrɨ̂ŋwǎy ka̱wŋe. Dééŋ suur-sí namá turba bʉtte-lé kamíŋíe, marraŋ lia kawŋíe ná ka̱rʉ̂l ná jɨttɨ káwe. Lia álá ye-sí ka̱wŋe, kwa suŋŋâ ye-sí Apɨrɨkɨŋ'íŋjɨrgɨ́ŋó'ŋ júnyúŋo appâkʉŋo'ŋ waytólseekʉŋo ka̱gɨle. Kí ayéŋá arráŋjarâŋa júndíe ná ʉ́dóŋá tawrá kʉrʉl Lʉmʉ́mba'ŋ wǎy'íŋ sábbá, na dééŋ suŋŋâ Baljɨ́ka'ŋ na A̱kʉ́roŋa'ŋ Jɨrgɨ́ŋó'ŋ dóŋá dééŋ wǎy-lé. Ayé 2002 Baljɨ́ka séégáŋ kí gapala kwǎ asá yé dééŋ jaw-lé dóŋá kéŋá.