Wp/fvr/Jómo Kenyâta

Jómo Kenyâta (1891 ‑ 22 Koróŋ 1978) Kɨ̂nyá’ŋ tiríjinnidʉŋo kéŋá, naŋ Kɨ̂nyá’ŋ Ba̱rʉ́ŋta̱bʉ díígkʉŋo kéŋá. Kenyâta Kɨ̂nyá’ŋ ta̱bʉ kéŋá, míŋ dítinjaari‑lé ayé 1993 síŋ táas‑lé kí ayé 1978 alá yé way. Na dííg‑le, Bagal Waarkʉŋo táárípiá (1963‑64), naŋ Ba̱rʉ́ŋta̱bʉ eŋa (1964‑1978). Ye‑sí kwa in ka̱sɨŋɨ âl Kɨ̂nyá’ŋ ba̱rʉ’ŋ ja̱gɨdʉŋo kéŋá. Kenyâta gʉʉd‑lé, gʉʉdʉŋoriyâ kéŋá, ná domboreŋa suŋŋâ rímmeŋ piá, na ye-sí lóóŋíti-lé, in kayé ǎl Aprɨgɨ́ŋíŋjɨrgɨ́ŋodʉŋo kwǎ-le kéŋá. Na yé dog Kɨ̂nyá’ŋ âbba oŋŋalkʉŋo kéŋá, Uhûru Kenyâta naŋ Ba̱rʉ́ŋta̱bʉ kéŋá.

Na ba̱rʉ’ŋ daarajarímó na lóóŋá’ŋ kona dog‑si Kenyâta kona ka̱rɨ́ŋɨ, niná Nayróobi’ŋ Jómo Kenyâta Ba̱rʉ́ŋtáas’íŋ Dɨɨroŋ, na Jómo Kenyâta Ba̱rʉ́ŋtáas’íŋ Zappagoreŋjoŋ, na Nayróobi’ŋ oro appâ‑lé, na oroŋa appáŋa Kɨ̂niyá’ŋ deema‑lé, namaŋ akkʉ́raŋa‑lé, namaŋ sooma suŋŋâ-lé, na Ɨsóŋá a̱w-lé (Kenyâta’ŋ Ɨsó, na Jómo Kenyâta’ŋ Ɨsó Tʉʉrɨ́ŋnadʉoŋ na Jɨwɨŋtááríjáaŋ), wěleŋa, na ba̱rʉ’ŋ épéróŋá appáŋa. Na dééŋ jaluŋ ǎl‑si kándé ná Nayróobi’ŋ daara‑lé kee. Kwanyéttíŋba̱gɨ̂ŋeram Kenyâta’ŋ ba̱gɨ kwa nyét’iŋ kilmaŋa‑lé kee. Na Kɨ̂nyá kwanyéttin‑si ʉmelíŋsog‑si ka̱ɨŋɨ, kí dúal Ederáŋ’iŋ soga 20‑lé ayé bi ayé dééŋ ba̱gɨ́’ŋ, namaŋ 2010 dɨó  kʉrɨŋɨ́ŋebede‑lé namá Kenyâta’ŋ Sog‑sí kundíe, nás kí Jee’ŋ Sog kʉldʉŋʉl. Kʉrɨŋɨ́ŋebede dɨwwo’ŋ jɨɨn’íŋ waar Kenyâta’ŋ a̱rɨ́ gal Kɨ̂nyá’ŋ paragíŋrɨdɨ̂n nyét‑lé kéŋám na dáwrâŋrɨdɨ̂n bá délliŋ sɨ́linynya 40 dáwrâŋrɨdɨ̂n-lé ná á kéŋá ba.