Wp/fvr/Amber Heard
Amber Láura Heard (dééŋ da̱a̱rɨŋ Kósoŋáŋ 22, 1986), Amrɨ̂ka'ŋ jɨ́tɨ́móladʉŋo, allawn na jáítíŋa'ŋ júnyúŋodʉŋo. Yé dééŋ úrí ta̱gɨ̂d jʉʉŋkʉŋos kéŋá ka̱lɨ́ŋ júnyúŋo'ŋjaluŋ-lé All the Boys Love Mandy Lane(2006), naŋ-si ta̱bʉ́ŋ pa̱a̱sɨ́ŋɨ́ nás júnyúŋóŋjaluŋa tuuŋa The Ward (2010), Drive Angry (2011), na London Fields (2018). Yé dog-si jányíŋíŋ dellaŋa kéŋá júnyúŋóŋjaluŋa suŋŋâ-lé, na naŋ tʉske'ŋ jʉ́rtʉ́tʉŋa-lé jɨ́tɨ́móla piá inná Hidden Palms (2007) na The Stand (2020).
Kí ayé 2016, Heard kurajaldódʉŋo eŋa kí Amrɨ́kɨa'ŋ Ba̱rʉkwǎŋarrájáa'ŋ Baaja'ŋ Daara ila-lé ǎl yé taga piiŋi Sanyjaradʉŋo'ŋ Mǐrsâl, ila della-lé ǎl kila kwa kawe inǎl díbéjeélel kí belé ba̱rʉkwǎŋarrájáa'ŋ ulúga-lé na ba̱rʉkwǎŋarrájáa'ŋ baaj-lé. Heard dog dʉldɨ́ŋulúga'ŋ mǐrsál kéŋá Bá̱rʉ́ŋâŋ Jɨrgɨ́ŋóŋ Sedâbtes'íŋ Ájíŋáŋdaara'ŋ ta̱bʉ kéŋa Dʉldɨ́ŋ Ulúga-le.
Heard-sí jɨ́tɨ́móladʉŋo Johnny Depp-si nyaŋá 2015. Dɨ́eŋ jʉ́se namás kí dúwal Dôrŋáŋ 2016 si agíŋé na tʉnyɨlɨŋ-é nyétiŋ perre eŋa addin-lê ǎlsi Heard tuuŋa áláŋ Depp-sí jánseŋ piá kí jʉrrɨ́deb kí toŋ'íŋdurúŋáŋ jʉ́gohóo. Kí ayé 2018, Depp jansáŋda̱lɨ́mes tuuŋa̱ kí Biritânia'ŋ ʉʉ́ŋjanyal The Sun'iŋ dorá murulíŋsibajurró'ŋ deem London dɨó,dɨ́eŋ janyal iláiŋ-lê ǎl Heard'íŋ toŋ'íŋdurúŋáŋ jʉgɨŋhóo-lé. Kí ayé 2019, Depp da̱lɨ́meŋrim keer piá, in della-lé namá Heard'íŋ írí eŋa jerri'íŋrim ila-lé ǎl namaŋ janyal kí kééŋ konaŋ eŋa Wáshington Post'íŋ jírsíŋo "neerɨŋɨŋ jɨttɨ́ŋ"uúŋ Heard dééŋ sabba'ŋ dog da̱lɨ́meŋrim jáwí kí murulíŋjurró magaraŋa ɨɨs rímeŋ piá kila ótá-le ǎl yé piá kí Depp'íŋ mʉrʉljaluŋdʉŋo ila jʉ́gohóo'ŋ belé'ŋ uúŋ ǎl kwa aŋé. Da̱lɨ́meŋrim id eŋa nama tʉske-lé kuro na dééŋ jánseŋ janyal suŋŋá eŋa namaŋ kwa suŋŋâ dééŋǐŋ rímměŋ káwe. Dééŋ jágíŋi-lé, sokotsókótá in-si kʉ̌mé âl kila magaraŋa ɨɨs dog nyét Heard'íŋ jerriŋ'íŋrim-lé âl murulíŋsibajurró kǎ̱íŋ, na bʉ́ló ná Depp'íŋ mʉrʉljaluŋdʉŋo'ŋ belé waarkʉŋo na ɨɨskʉŋo mʉrʉlíŋsibajurró áiba, maraŋ bʉ́ló âl muruljaluŋdʉŋoꞌŋ belé a̱wkʉŋo ǎl kwǎ ná murulíŋsibajurró kéŋá. Jaŋsáŋta̱bʉ namás in arrí, ásáŋ Heard Depp-sí míriŋa $10.35 si jaa na Depp ásáŋ Heard-sí míriŋa $2 jaa. Heard namás dééŋ já̱gɨ́láŋbeléꞌŋ ʉʉ́ŋ ja̱yyʉ bóóyé, galla jáítiŋaꞌŋ kʉnyɨr-lé. Heard liáŋ soga ta̱bʉkwǎ-le bá suur jɨ́gé ná Depp kʉ̂ŋʉl, kí kɨ́eŋ muruljaluŋkwǎ namá in koy dɨ́eŋ jamaŋ-lé ásáŋ Depp míriŋa $1 bóóyé kí arrájáa asitógꞌíŋ dorá.