Wp/fit/Verentypheyttäjä
Veren typheyttäjä
[edit | edit source]Ylheinen tieto on jopa kaikissa kylissä ette verentypheyttäjällä pittää olla hyvät hamphaat, rohkea ja hään saattaa opettaa nuoreman siihen konsthiin jos nuoremalla on hyvät hamphaat. Kompelusvaarassa Elis Baltzari tiesi ette se vaatii voimia tehhä noitakonstia ja typheyttää verta. Jokkut ei halunheet sen takia typheyttää pikkuhaavoja.
Ei tarvitte kuitenkhaan nähhä potilasta, telefuunin kautta mennee hyvin. Veren vuoto nokasta on tavalinen typheytystyö. Nokan ympäriltä valkenee ja verenvuoto typheyttyy kohta varsin. Häätyy kuitekki jollakin laila tuntea ja saa kuvan ihmisestä ja tietää kenen poika se on. Perine on vieläkin aika ylheinen, mutta ei siitä liikakhaan puhuta julkisuuessa. Praamailu ja kerskailu ei sanota kehittävän typheyttäjän lahjoja. Rohkeus ja kova usko voimhaan on tärkeä lahja.
Typheyttäjä lukkee välistä ramsoja, eli sannoo jotaki, ja yks mennee näin: -Mene kotia; en mie saata imettää; joo, se on heittäny. Ja sillon veren vuoto heitti. Nilivaaran typheyttäjä sanoi: -Tysti tyyni juoksemasta, vesi virta alemaks. Jos oli saanu verenmyrkytyksen sanothiin: -Haava piä varas, kyllä vesi varas pittää, haava piä varas, kyllä lämmin varas pittää, haava piä varas, kyllä kylmä varas pittää. Sen piti sanoa 3 kertaa. Moskojärvessä piti typheyttäjä ottaa kiini vasemasta nimettömästä sormesta ja lukea raamatun sanoja, mutta kauheita silti, ittelleen. Sillon veri typheytti niin kätevästi ette mies menehtyi. Typheyttäjä saattaa typheyttä jonka se tuntee että s’oon kasvon muoto silmäin eessä, sanothaan Masuunissa.
Mutta on tietoja ette verisuonetkin, jokka on poikki on parantunheet kun on lahjakas typheyttäjä. Yks typheyttäjä Jellivaarassa typheytti hurjan veren vuoon yheltä hevoselta. Se oli varma merkki ettei ole psykolokia eli sellaista, mutta muut voimat vallassa, meinaavat tietonantajat. Lääkäritki väitethään välistä käytettävän typheyttäjän konstia - kuitekki 1980-luvula.
Kainulasjärven Lassi salvo orin ja se epäonnistui ja veri alko valoaamhaan ja Lassi typheytti siltä veren. Veri olis juoksenu kuivhiin, jos sitä ei olis typheytetty.
Kattokaa
[edit | edit source]Lissää tietoja: Kansansusko