Wp/fit/Taikapäivitten tietoja

Taikatietoja

Ko aurinko Annan päivältä mennee peshään ja Tuohmaan päivältä pallaa pesästä, ja jos nämät päivät oon pilviset niin kesä oon satheinen.

Jos pesäpäivät (8-9 päivää ennen joulunpäivää, leipomapäivät) on kokohnaan sumuset, tullee huono satheinen kesä.

Jos alussa ja lopussa eli koko aijan oon kirkasta, tullee paistekesä.

Aurinko alkaa näkymhään loppiaiselta.

Heikinyönä talvensölkä katkea.

Heikki heinää jakkaa, Paavali tietää paremin.

Jos Paavalin vasten yölä sattaa tie umpheen, tullee nöyrävuosi. Jos puolitiehen, tullee puolivuotta, jos ei tuiskua, tullee täysivuosi.

Jos Paavalin vyönä tuiskua, niin tuiskua lapsilta myllytien.

Jos kovin kylmii Kynttilä, ja Paavali pahon pakkastaa, niin oon nähen nälkävuosi.

Kynttilästä alkaa kevättalvi.

Lumisae laskiaisena ennustaa sääskistä kessää ja huonoa vuotta.

Mutta kirkas ilma oon hyvän vuentulon enne.

”Helmikuu helähtää” sanothaan, koska se on oikea pakkaskuu.

Heikki heinät jakkaa, Paavali puut hakkaa, Matti matheet tappaa. Merkittee: Heikiksi on puolet heinistä kuluhneet, Paavalin aikhoin pittää hakata tekopuut, ja Matista alkaa matheitten kutoma-aika.

Matista köyhän pihti pirtin päälä.

Jos hiostaa seinälä ennen Mattia oon kylmä kesä tiossa.

Ja jos Matinpäivä oon kovin lauha tullee nöyräsää.

Matti viepi lapset seinile.

Mattina oon päivää hihtoa ja yötä nukkua.

Jos vanhaana Maariana on suoja se oon hyvä merkki.

Jos se alkaa puhaltamhaan kahen Marian välilä se puhaltaa kolmesta-yheksään päivää.

Jos pitkäperjantai pakkastaa on kylmä Valpori.

Jos on kuura pitkäperjantaina tullee kylmä koko kevä.

Ruottin suvivyöt oon kahen puolin Tiburtiksen.

Jos Yrjön yön kylmää se kylmää yheksän yötä jälkhiin.

Markusvyö on Ryssän (laukkuryssän) suvivyöt.

Ko on Marjasta häkki heiniä lehmäle ja kaks hevoselle niin se piisaa.

Marja maata paljastaa.

Sen verran lunta Erkkinä aian takana mitä Marjana katon päälä.

Jos Valporin päivänä oon pohjanen tullee huono lypsykesä.

Minkä verran oon lunta vappuna vaola, sen verran oon lunta Erkkinä katola.

Ristinpäivä: kala karhiin lintu siipheen peura kyntheen nauris kuophaan ämmät pirthiin miehet methään.

Jos Moonikkana oon kaunis ilma, tullee varhain kesä.

Jos Moonikka on kaunis ja lauha vyö, tullee kaunis kevä.

Jos Siikismuntti ja Tanislaus kylmää, niin Eskelhiin saakka päätömiehilä verkon lauvala kylmää.

Erkki lurjus turkki päälä, Urbanius paita päälä.

Joka ei Erkkinä venettänsä tervaa, hän ei terva sitä koko kesänä.

Jos nälkäerkkinä on kylmät ilmat, sillon on lämmin kesä.

Juhaneskylmä, -tulva.

Jos juhanuksena sattaa tullee färitön heinä.

Jos ennen päivänpallausta on kuuma, tullee kylmä kesä.

Jos lämpinee jälkhiin vanhaan Juhaneksen tullee hyvä vuosi.

Jaakonhalla.

Mitä Jaakona säätä, sitä Laurina, mitä Laurina sitä Perttulina.

Jos unikeonpäivänä sattaa niin se sattaa 7 viikkoa sen jälkhiin.

Se vietti satheela Laurin, ei tullu pakkasta.

Laurista repo koiven koihuun heittää.

Perttuli syksyksi kääntää.

Päiväna Perttulin perästä ei katoaa kaste kalhveesta eikä kuura haon alta.

Ei päivää Perttulin perästä ole sirppiä seihnään säästämistä.

Ei katoaa kaste kalhveesta eikä halla haon takkaa.

Jos ei ole Mikkelin riitheitä, ei ole pyhämiesten suvia.

Konttaamalla se Mikkeliksi talvi tullee.

Mikkelinaikana se pouvathaan jos tullee lumitalvi.

Jos sivu sitte Mikkelin mennee lehenlähtö, se mennee lumen ottoki sivu Erkin.

Kova tuuli Mikkelinä ja lehti lähtee, ja sillon on kova suvi Erkin viikola.

Mikkeliltä on välistä koko talvi, välistä mennee pyhämiehhiin.

Minkä vertaa lentiä Mikkelinä, sen verran Erkin aikana lunta.

Linnunrata näyttää tulleeko kova lumitalvi ja millä aijala tullee lunta.

Se oon syys jos on iän pää ja kevä on lännen pää.

Mikkelin aikana se pouvathaan.

Ko lehti Mikkelin aikana lähtee, lumi lähte Erkiksi.

Simunansuvet.

Jos kylmää ennen Simoa, kyllä ne Simunan suvet tulevat.

Simuna siltaa tekkee, Martti maale pääsee Antti aisoja pannee, Nikolau nittoo net kiini.

Pyhämiesten suvi.

Jos marraskuussa on lauhat niin on kylmät Jaakon aikana. Jos marraskuu on kylmä ei ole pakkasta koko talvena

Jos on usva uutenavuona, on halla heinäkuussa ja talvi keskelä kessää.

Jos sumuaa uuvenvuoenyö, se pakkanen pillaa ohrankylvönki.

Sen enämpi tähtiä taivhaala uuvenvuoenvyölä, sitä enämpi on hilloja.

Jos uuvenvuoenyö on pilvinen, se on huono merkki. Se vastaa vielä ohrankylvössä ja muussaki kylvössä.

Jos mätäkkä alkaa pouviksi se oon poutia, jos satheela alkaa oon satheita seittemän viikkoa.

Kattokaa

Lissää tietoja: Kansansusko