Wp/fit/Sambia

From Wikimedia Incubator
< Wp‎ | fit
Wp > fit > Sambia

Sambian tasavalta eli Sambia on sisämaavaltio eteläisessä Aafriikassa. Sen rajakrannit on pohjoisessa Kongon temukraattinen tasavalta, lännessä Angola, etelässä Namibia, Botswana, Zimbabwe ja Mosambik sekä iässä Malawi ja Tansania. Sambian pääkaupunki Lusaka sijaittee maan kaakkoisosassa. Väestö on keskittyny etelhään pääkaupunkin ympäristhöön ja luotheesheen kuparivyöhykheele.

Sambiaa on asuttanheet tuhansia vuosia pyytö-keräiliät ja vaeltavat heimot. Euruuppalaisitten tutkimusmatkailijoitten satunhaisitten vierailuitten alkamisen jälkhiin 1700-luvun lopula Sambia liitethiin asteittain osaks brittiläistä imperiyymiä. Vuona 1923 British South Africa Company luovutti Pohjois-Rhodesiana tunnetun alueen hallinan Britannian hallituksele. Alue ittenäistyi 1964 alueen läpi virtaavan Sambesi-väylän mukhaan Sambiaks nimettynä. Ittenäistymisen jälkhiin maa siirtyi yksipuoluejärjestelmhään presidentti Kenneth Kaundan johola. Kaunda hallitti Sambiassa aina vuotheen 1991 asti, kun maassa piethiin monipuoluevaalit.

Sambian ekonomia on perintheisesti hallinu kuparin intystri, joskin viime vuosina hallitus on pyrkiny monipuolistamhaan ekonomiaa. Maa liukui köyhyytheen 1970-luvula, josta se ei ole vieläkhään päässy poies, ja se on monien Aafriikan maitten taphaan pahasti velkaintunu. Bruttonatsunaalprutykti asukasta kohen on 1 397 dollaria (IMF, PPP arvio 2008) ja noin 64 % väestöstä ellää alle 1,25 dollarila päivässä. Lisäks maan prupleemit on laajale levinheet HIV-tartunat ja AIDS.