Wp/fit/Meänmaan musiikki
Meänmaan musiikki
[edit | edit source]Meänkielinen musiikki alkoi kehittymhään 1970-luvula kun Hasse Alatalo Norrlåtarissa teki sjiivoja missä laulethiin paikkakunnan vanhoita lauluja. Yhen sjiivan nimi oli Meikäläinen ja se sai monta meänkielistä alkaa miettimhään ommaa kulttuuria ja kieltä. Mutta Hasse lauloi suomeks ja suomen murtheela. 1970-luvun lopussa Läänin Koululautakunta alkoi puhumhaan ete sattaa opettaa suomea paremin jos alkaa opettamhaan paikkakunnan murretta ensin ja sitten liikkuu suomea kohti.1980-luvula se kulttuuriliike sai vauhtia kun alethiin puhumhaan omasta kielestä. Karl Pekkari oli sillon kouluinspehtööri. Sisaret aloit laulamhaan meänkielelä niinku Kaggen & Bengt. Ja meänkieltä puhuthiin teatterilavala kun Tornionlaakson teatteri perustethiin 1986. Teatterissa on hyvin paljon musiikkia luottu. Vuona 2006 oli ensimäinen kerta kun Tornionlaakson artistia osalistuit Euruupan vähemistökielten laulukilpailhuun, Liet Lavlut. Bändi Jord ja SWEBLUL sait aikhaan Interreg prujektin missä alethiin opettamhan nuoria laulamhaan meänkielisiä käänetyjä poppilauluja. 2007 järjestethiin ensi kerran Pohjoismaitten ja Baltian karsintakilpailu Laulun Laulut. Kaks voittajaa menit siittä Liet Lavluthiin 2008 joka piethiin Luulajassa 16-19 lokakuuta. Laulu- ja kulttuurifestivaalhiin tuli yli 15000 kävijää. Se on vieläkin suuriin vähemistökielitten Euruuppalainen laulu- ja kulttuurifestivaali. Pikku nykysin olematon SWEBLUL, joka eusti Ruottin vähemistöjä, järjesti net. Nyt se yhistys on lakkautettu.
Bandi Jord on laulanu toista kymmentä vuotta meänkielelä.
2000-luvula on Raj Raj Band noussu Meänmaan suositumaksi porukaks joka laulaa meänkielelä. 2012 bandi pelasi ensi kerran Suomessa, Suomen Pellossa täyele Sporthallile missä oli 600 toolia.