Wp/fit/Kungliga biblioteket
Ruottin kansaliskirjasto
[edit | edit source]Ruottin kansaliskirjasto oon ruottiksi Kungliga biblioteket (kuninkhaalinen kirjasto). Kirjasto kokoaa ja säilyttää kaikki äänitykset, kuvat ja painetun materiaalin jokka annethaan ulos Ruottissa.
Kirjaston kokoelmat oon kaikile auki, mutta ensi käessä toiminta oon tutkimusmailmaa varten. Materiaalia Ruottin kokoelmasta ei saa lainata kotia, siihen häätyy tutustua kirjastossa. Suurin osa materiaalista säilytethään makasiinissä ja häätyy tilata framile etukätheen.
Kokoelmat
[edit | edit source]Kirjaston kokoelmissa oon rapeat 20 miljoonaa objektia. Kirjoitten lisäksi sielä oon muumuassa julistheita (affischer), kuvia, käsinkirjotettua ja reklaamipainoksia. Audiovisyellissä kokoelmassa oon enämpi ko 7 miljoonaa sisälepelattua tiimaa.
Kirjasto hallittee muumuassa näitten henkilöarkiivia: Astrid Lindgren, August Strindberg ja Dag Hammarskjöld
Velvolisuus-leveransi
[edit | edit source]Nykynen velvolisuus-leveransilaki saannoo ette painetun materiaalin julkasia (utgivare) jos materiaali meinathaan levittää Ruottissa, häätyy lähättää yhen kappalheen joka teoksesta Kansaliskirjasthoon ja kuutheen muuhun tutkimuskirjasthoon. Se joka julkasee musiikkia, filmiä, teeveetä eli raatiota häätyy samala mallin levereerata kopiat kirjasthoon. Mutta joissaki taphauksissa se jällaa vain osia lähätyksistä
Laki perustuu vuen 1661 kanslii-oorninkhiin ko siinä tuli laki siittä ette kaikki kirjanpainajat Ruottissa piit lähättää kaks kappaletta joka kirjotuksesta jonka net olit painanheet, yks meni Valtio-arkiihviin (Riksarkivet) ja toinen Kansaliskirjasthoon. Laki tuli oikeasthaan enämpi sen takia ette kontroleerata mielipie-muo´ostamista ko ette säästää dokymenttiä tuleville polvile.
Kirjastoyhtheistyötä
[edit | edit source]Kansaliskirjasto vastaa siittä ette korkeampi koulutus ja tutkimus saavat tietoja. Siihen kuuluu muumuassa ette neuotella keskheisistä lisensi-sopimuksista joka helpottaa eri tietokanthoin (databas) pääsyä. Kirjasto koortineeraa joitaki ekspertti- ja kompetensiryhmiä jokka tekevät työtä kirjasto¬mailmakysymyksitten kans. Esimerkiksi digitaliseerinki, klassaus-systeemit ja yhtheinen katalooki Libris. Järjestethään kans koulutusta ja annethaan tukea prujektille jokka koskevat kirjastoja.
Viranomhainen
[edit | edit source]Kansaliskirjasto oon valtiolinen viranomhainen ja toimii koulutusdeparttementin alla
Tutkimuskirjasto
[edit | edit source]Kansaliskirjasto oon kans hymanistinen tutkimuskirjasto, joka ostaa tutkimuskirjalisuutta monela eri kielelä
Käynit
[edit | edit source]Kansaliskirjasto oon puistossa Humlegårdenissa Stockholmin keskustassa. Kirjasto oon auki kaikile. Se joka oon yli 18 vuotta ja pystyy näyttämhään legitimasjuunin ette tilata materiaalia kokoelmista. Niile jokka ei asu Ruottissa eli joila ei ole ruottalaista henkilönumeroa, oon erityiset säänöt.