Wp/fit/Eero Mäntyranta

Eero Antero Mäntyranta (s. 20. marraskuuta 1937 Turtola) on entinen kilpahiihtoja ja olympiavoittaja. Hän on kaikkitten aijotten menestynheimpiä suomalaishiihtojia. Hän oli mukana neljässä olympiaatissa, joissa hän voitti seittemän meteljia. Urheilu-uransa aikhaan Mäntyranta toimi tullimiehenä ja liikunnanohjaajana ja urheilu-uran jälkhiin yrittäjänä. Hän eusti Pellon Ponsi -urheiluseuraa vuoesta 1955 lähtien.

Menestyttyään vuoen 1964 talviolympialaisissa Innsbruckissa Mäntyranta sai kilpailuitten jälkhiin pitopaikan mukhaan lempinimen "Mister Seefeld".

Mäntyrannale myönnethiin opetusministeriön Pro Urheilu -tunnustuspalkinto vuona 2000. Pellossa on Eero Mäntyrannan patsas, Eeron Patsas. Pellossa oli kans Eero Mäntyranta -myseymmi.

Mäntyranta on ensimäinen suomalainen dopingista kärähtänyt urheilija. Hänet saithiin kiini amfetamiinin käytöstä SM-kilpailussa vuona 1972, mutta sitä salathiin. Sapporon olympialaisitten jälkhiin asia tuli ilmi ja Mäntyranta kiisti asian. Mäntyranta on myöhemin myöntänt käyttänheen hormoonia, jokka ei vielä hänen kilpauransa aikana olheet kiellettyjä. Mäntyrannan hemoglobiiniarvot on luontaisesti huomattavan korkeat.